JOHN 9 - KETHOLESI KESAO N.T. (BSI)

Umhü ce de menu keyi thümapü thipü mhango kesü

¹ Jisu tapra kezüce mipü umhü ce de menu keyi mipü zü kesüyi.

² Pü sajiko püce ketso de poti, Kemethao, thüma hio lame mode upo uzu kephoma la thüma hio mhüce de menu yita?

³ Jisu ukoce poti, thüma hio kephoma lari mo, mori ukrüne la rimo, vele püyo Jihova mhatho thipü mi mese mengo sü ketolazo.

⁴ A ketsü kesüo mhathoko I thisü moze su, tüso kebace; tüzü vori talize mipüri mhatho thimo tato.

⁵ I cejülü keba the, I cejü keveo zo.

⁶ Pü jü süko posü de mhütsapü cejü sü renyo pü nyoba thiyi, renyo pü mhüceo mhü kenhüsü.

⁷ Püce po kesü, tavo de Siloam zalü jüpü khrü vate, (Siloam, püco ketsü kesü). Pü ta vota, de jüpü khrüsü siri mhango vori ta.

⁸ Pü zanu miko mu sümhüjü pü kengo miko pümhü kece ngo; side uko kepoti, thüma hio umhü ce de mhakhrü ti kebao zomome?

⁹ Humi poti, püzole, kekre miko poti, pübizo tipüle, sizi bata. Vele pü po kesü, I püzole.

¹⁰ Süla uko püce poti, dipü bide nmhü mhango yita?

¹¹ Pü ukofü kela kesü, Thümapü Jisu lezi tipü, nyoba khapü amhü kenhüsü, side ace poti, tavo Siloam zalü tavo khrü vate zisü. Side I tavo khrüva de mhango yi tele.

¹² Süsa uko püce poti, pü dipüce vota? Mu pü po kesü, I se mole.

Pharisee miko theju ketso kega kesü

¹³ Uko umhü keceo tüzü Pharisee miko cevo.

¹⁴ Sünhasü Sabbath zho, Jisu renyopü nyoba thiyi de püpo mhango keyi nhasü.

¹⁵ Süsa Pharisee miko pü ketso de dipübi pü mhango ta sheri. Pü uko ce poti, Pü nyoba khipü amhü kenhüsü, I khrüva side mhango praritele.

¹⁶ Süla humi poti, Thüma hio Therümi mhatho mo, kekrelamori pü Sabbath tüsozho rhomo. Humi poti, kephomi dipübi de mhatho ungo thiyi veta? Thüma dolü kelakre de kebü ta.

¹⁷ Uko mhüceo ketso sala de poti, no dipüle pü lüba, nmhü thipü mhango kesüo? Pü po kesü, pü saju kepo mipü zo.

¹⁸ Vele Jews miko pü kepo melü muta, pümhü ce de mhangoyi, süla uko püpo püzuni cüsü.

¹⁹ Uko uni ketso de hiohi neni nu zome, neko poti pümhüce zode menuyi le kebao, dipü bide pü tsühi mhango pra rita?

²⁰ Püpo püzuni ukofü kela de po kesü, Hani se keba hiohi hani nuzo, umhüce de menuyi.

²¹ Vele dipü colü pü mhangoyi teshi, hani semole, mori sopü pümhü khri sü sheri, hani süri semo; püsü pethite, pü ketsote: pütho püju posüto.

²² Jü hiko pükrüni posü, kekrelamori uni Jews miko mpe ketala; kekrelamori Jews miko metü sopüno püpü Khrista leno poto sheri synagogue lü pühu va keto uko medo keta seba ketala.

²³ Süla pükrüni poti, pü pethite, pü ketsote sita.

²⁴ Süla uko umhü cede mhango ketao cüsala sü, de püce poti, Jihova mezale püchu süte, hako püse keba thüma hio kephoma mizo.

²⁵ Pü ukofü kela kesü, Pü kephomami me mosheri I semo, mhapü I seba süosü I thajü amhüceri tsühi I mhangote.

²⁶ Uko pü ketso sala de poti, pü n yo kedipü thisüla? Dipü bide nmhüthipü mhango süta?

²⁷ Pü ukofü kela kesü, I neko ce po süve, neko reni mute; dithito süo ketso sala ba? Nekori pü sajimi thita nyü bame?

²⁸ Süsa uko pü kerhe de poti, No pü sajimite, vele hako Moses sajimiko.

²⁹ Hako se keba Jihova Moses ce jüpo, thüma hiola zono hako semo pü dipüce vori sheri.

³⁰ Thümao ukofü kelade ukoce po kesü, pü hicehi mha ungo thi kesü neko pü dipüce vori sheri semo zori, pü amhü thipü mhango süte.

³¹ Tsühi uko se keyi Jihova kephomami mipüri fü reni mo zolu, vele mhace humi Jihova reshü mu pü medo thiyo lize pü sümi fü reniyo.

³² Cejü thiyi culü vo tha ketso mipüri umhü cede menu keyimi thi meve kesü semo zolu.

³³ Mhace thüma hio Jihova celü vorimo lize pü mhapüri thi yiho.

³⁴ Uko püfü kela kesü, no kephomalü menuyi side hako metha tola? Uko pü hupü chozu süva.

³⁵ Jisu pühu chozu sü keva seyi, tavo püngoyi de püce poti, “No Jihova Nu melü teme?”

³⁶ Püfü kelakesü, “Niepoo püsopü sheri I pü melüyi ketola?”

³⁷ Jisu püce po kesü, “No püngo bate, mu püzü kerethi kethao zo.”

³⁸ Püpo kesü, “Niepoo I melüte.” Mu tatsü pü reshüta.

³⁹ Jisu poti, I cejülü sheco la vori, mhakengo miko po ngomo ta ketola, mhango kemo mikopo mhangoyi ketola.

⁴⁰ Pharisee miko jü süko se kesüce püce poti, hakori mhücemi thite me?

⁴¹ Jisu ukoce pokesü, neko mhüce lize kephoma baho, vele neko tsühi poti, “hako mhango ba,” süla ne kephoma bate.