JOHN 6 - KETHOLESI KESAO N.T. (BSI)

Mi nye püngu vathi kesü

¹ Hisalü Jisu ta Galilee jü kezholü kita, Tibarias jükezho laco.

² Makro püsa meji vorita, kekrelamori uko mha ungo kethiko ngo kesüla, kethimiko thi kesürho kesüko lari.

³ Jisu ta cejütuyo khota, sülü pü sajiko zü babata.

⁴ Jews miko thenyepü, takepranye meno bata.

⁵ Süce Jisu pümhü khrüpü pe süri, thüma kekro ta püce vori tazü, pü Philip ce pode, dirapü tsükhri khri püvo hikopo ti yita?

⁶ Pü medephi kesü zo, kekrelamori pü sheri seba pü dipü thi sü to sheri.

⁷ Philip püfü kelasü, penny (presa) krakena (tekhri shurü zhokra) zori ukola ti kemegu ngo yiho, mipü tho kedopüpü lebi zo sheri.

⁸ Pü saji mipü za Andrew, Simon Peter sazüo, püce poti,

⁹ Khresa mipü hice chütsükhri püngu mu fü kenine kena pü tale, vele süko makro hi thedüla dipü bita?

¹⁰ Jisu poti, Thümako po ba yite. Nha süce ba shu. Süla thümako bayi, mi nye püngu.

¹¹ Jisu tsükhri püyi, pükemeza fü posü, side khapü thüma ba kebako zasü, fü sheri moze kesudü khapü zasü.

¹² Uko ti megu keyisa, pü sajiko cepoti, timesho keyiko pfü kengu yite, usü püri khava hite.

¹³ Süla uko pfü kenguyi, uko tisho chütsükhri kengupü merha kerikenalü chuyi,

¹⁴ Süsa thümako kengo, Jisu ungo mhatho thi kesü la poti, Kethozo thüma hiohi saju kese mipü cejülü vori tole po ketao tazo.

¹⁵ Uko kelüce pükemu thide pü tüpü püpo kede thita keto rhüta, pü lebi tasü cejütuyo vota.

Jisu jüpi chota

¹⁶ Theva vorita, pü sajiko ta jü kezholü kita.

¹⁷ Uko ta rulü lüta, side ta Capernaun kevaco vo tazü. Tüzü vorita, Jisu ukoce vori mo bata.

¹⁸ Jü rephü süta, tükhra kerüla.

¹⁹ Süla uko thehethide ru thopü miledo sü/da pü tata, uko Jisu jüpi tavori kezü ngoyi, ru meno pheri kezüce uko meprüta.

²⁰ Vele pü ukoce pode, I zole meprü hite.

²¹ Süsa uko püzüpü rulü kesü umedode züyi, siziyi metha uko ta cejü kesolü voyita.

²² Süsanha thüma jükhü kebako ru kekre di keta, methakeyiko kevori ruo zo kemosa, Jisu ru sülü methakeyiko züde lü mota, vele methakeyiko lebi tata.

²³ Sizi kebace ru kekrehu Tiberias laco vori, uko tsükhri keti thethi kemenoce, Niepoo kethezü kha kesü sa.

Tülü tsükhri

²⁴ Thümako Jisu sülü keba ngomo ketala, mori methakeyiko sheri sülü phu medi ketala, uko ru thopü Capernaun lü Jisu phu vorita.

²⁵ Uko tavori jükhü kekre laco pü ngoyi, uko püce poti, Rabbi (kemethao) dipü tüce no hilü vota?

²⁶ Jisu ukoce poti, I neko ce potü süto, Neko aphu ketahi mha ungo thi kesüko kengola mo, vele kekrelamori neko mhati megu keyi lanozo.

²⁷ Ketikekra suta ketokola mhathi hite, vele ketico kechothe kehülü tayo tikola mhathi yite; süo thüma Nuo khapü neko tsü süto; kekrelamori Therü Poo püyo mohor vü süte.

²⁸ Süsa uko püce poti, Jihova mhathoko hako thiyi ketola kedipü thiti mesü?

²⁹ Jisu uko jü kelakesü, Mhatho hiohi Jihova mhatho zo, neko pü ketsü kesüo melü keyi.

³⁰ Süla uko püce poti, süsa no zasi kedipü thisü hako meka süta, hako po ngo de melüyi ketola. No dipü mhatho thi süta?

³¹ Hako potsa neko rayho thilü manna keti thopü meta, Pü tüyo tsükhri rüpü ukopo ti.

³² Jisu ukoce poti, I nekoce potü süto, Moses tüyo tsükhri kha sümo, vele a Po tüyo tsükhri khapü uko tsü ketho.

³³ Kekrelamori Jihova tsükhri tüyo kiri, kehü khapü cejüo tsüsü.

³⁴ Süsa uko poti, Niepoo tsükhri süo kechothe khapü hako tsü süte.

³⁵ Jisu ukoce poti, I kehü tsükhri süo zo, ace kevorimi mhapüceri meri taho; mu ace kevorimi mhapü ceri theri ri taho.

³⁶ Vele I nekoce kepo, neko ango süte, vele amelü yomo.

³⁷ Apo khapü atsü kesü metü ace vorito, ace kevorimi I mhapü ceri hu vaho.

³⁸ Kekrelamori I tüyo kiri zo, atho amedo kethila kiri mo, vele aketsü kesüo nü thi ketola vori.

³⁹ Hiohi a Po aketsü kesüo medozo, pü khapü aketsüko mipüri medi vakemo, vele thüla tünha süko phu mesüyi ketola.

⁴⁰ Hiohi aketsü kesüo medozo, kehopüri Nuo kengoko pü melü keyi, kechothe kerhü ngoyi ketola, thüla tü nha pü kelayi ketola.

⁴¹ Jews miko uko dolü kemeli shuta, kekrelamori pü kepo, I tüyo kiri ti tsükhri da yozo si kesüla.

⁴² Uko poti, hiohi Jisu zo mome, Joseph nu, püpo püzu uko se baze? Dipüla pü tüyo kirile poba?

⁴³ Jisu ukoce poti, neko dolü panyo (kebu) hite,

⁴⁴ Mipüri ace vori yiho a Po tho pü tüsüpü vori zo kemosa, mu thela nha pü phu mesü yito.

⁴⁵ Saju kepoko hiziti thopü meta, uko metü Therüoju pü metha süto. Thüma kehopüri sekeyimi Poo se yite, mu ace vorito.

⁴⁶ Mipüri Poo sü ngomo, pücelü kevorio lebi tho zo kemosa, pü Poo sü ngo.

⁴⁷ I nekoce potü süto, amelü keyimi kerhü ngoyi bate.

⁴⁸ I kerhü tsükhrida süozo.

⁴⁹ Nekrü netsüpumi rayho thilü manna ti ketho, side sarite.

⁵⁰ Hiohi tüyo kevori tsükhri da yozo, thüma püti keyimi sata yiho.

⁵¹ I kerhü tsükhri da yozo tüyo kevorio, mhace thüma kehopüri püti keyimi pü kechothe rhü tato; tsükhri da süo athi apho hiozo, cejüopo kerhü ngoyi ketola I ta vori.

⁵² Jews miko uko dolü kemelita, de poti, thüma hio kedipü bide püthi püsü ukopo tiyi vetole po bata?

⁵³ Süsa Jisu ukoce poti, I potü süto, neko thüma Nuo thi ti mu püzakra kemosa nekoyo kerhü di.

⁵⁴ Kehopüri athi ti mu azakra keyimi kechothe kerhü nete, mu thüla nha I püphu mesü yito.

⁵⁵ Athi sü themu kethozo, mu azari kekra zhüzo.

⁵⁶ Somi athi ti mu aza kra sheri sümi alü ba yito, mu I pülü hüto.

⁵⁷ Rhü keta Po a ketsüsü, I a Polü hüyo, süla ati ketimi alü hüto.

⁵⁸ Tsükhri da hio tülü kiri, nepotsa neko manna ti de sa keta bimo, somi tsükhri hio tiyi sheri kechothe rhü tato.

⁵⁹ Pü hiko Capernaun lü synagogue lü popü mi metha kesüko.

Kechothe kerhü jüko

⁶⁰ Pü sajiko süko se kesüce thüma kekro poti, mha hio jü kerü shupü te, sopü süko seyi veta?

⁶¹ Jisu pü sajiko du kebu ba keta pülü sesüta, pü ukoce poti, mha hikola neko nümo teme?

⁶² Mhace neko Nuo ta tüyo kho keta ngo de pü thajü keba thilü kho taze di bi ta?

⁶³ Rüpü tho kerhü khasüyo, uthi upho zono mhapüri thi yiho, I nekoce jüpo kesüko rüpüzo mu kerhü zo.

⁶⁴ Vele neko dolü humi melü kemoba. Kekrelamori theralü Jisu somi melümo sheri seba, mu sopüno pü tüsü to sheri seba tila.

⁶⁵ Pü poti, I süla neko cepoba, mipüri ace vori yiho, a Po tho khapü atsü sü zo kemosa.

⁶⁶ Süyovilü pü sajiko kekro tata, püzü tasa mota.

⁶⁷ Jisu pü saji mi keri kena koce poti, Neko sheri tata nyü bame?

⁶⁸ Süsa Simon Peter püce poti, Niepoo hako sopüce vokha? No kechothe kerhü jüko ba.

⁶⁹ Hako melü tazo, no Khrista kethozo, Jihova rhü keta Nuo zo.

⁷⁰ Jisu ukoce poti, I neko mi keri kena kedayi mome, vele neko mipü therü keshü.

⁷¹ Pü Iscariot Judas, Simon nu poba. Kekrelamori pü hisa pü tüpü mice sü ketola, püri keri kena kodolü mipü.