JOHN 3 - KETHOLESI KESAO N.T. (BSI)

Nicodemus tüzü Jisu cekevo

¹ Pharisee mipü püza Nicodemus lesi de Jews miko kekha tayo.

² Thüma süo tüzülü ta Jisu ce vori de püce poti, Rabbi, hako se keba no Jihova celü kevori kemetha mipü tazo; mipüri no mha ungo thi kesüko thi keyidi, Jihova püzü ta kemosa.

³ Jisu püfü kelakesü, Kethozo, I nce potü süto, thümapü menu kesala kemosa pü Jihova kede ngo yiho.

⁴ Nicodemus püce pola kesü, Mipü pethi ketasa kedipü bide menu kesala yi veta? Pü sala püzu valü lüde va kena menu tome?

⁵ Jisu püce poti, I nce potü süto, thümapü jü mu Rüpülü menu yi kemosa pü Jihova kede balü lü yiho.

⁶ Uthi upho kemenu sü uthi upho zo, Rüpülü kemenu sü rüpüzo.

⁷ Nngo hite, I nce kepo No menu kesala moze su zi kesüla.

⁸ Tükhra pütho pümedora khra votayo, no püfü seto, vele dirapü khra vori sheri no seyomo, mu khra dipüce vota sheri seriho, sübi kehopü sheri Rüpülü kemenu sü bizo.

⁹ Nicodemus püce pode, Dipü bide sizi tata?

¹⁰ Jisu püce poti, No Israel mi kemetha mipü, sizide mha süko se mola?

¹¹ I nce potü süto, hako ha kese kengoko poyo, mu kengo süko zhopo thiyo, neko zhopo süko melü yomo.

¹² Mhace I cejülü ju nekoce posü zori neko melü mo lize, I tülü ju neko ce pota tisa neko dipübi melü yiveta?

¹³ Thüma püri tüyo khomo zolu, vele pü tüyo kiri, thüma Nuo tüyo tayo.

¹⁴ Moses nhatsalü tenhi pü kesübi, thüma Nuo ri püsü zoto.

¹⁵ Kehopü sheri pü melü keyiko kata hozo, vele kechothe kerhü ngo yito.

¹⁶ Jihova cejüo khrüthori zode pü Nu pule-o kha süzo, thüma kehopüri pü melü keyimi shütaho, vele kechothe kerhü ngo yito.

¹⁷ Kekrelamori Jihova pü Nu ketsüpü cejüo mejo va ketola mo, vele cejüo po püyo kelayi ketola.

¹⁸ Pü melü keyimi sümi mejo vaho, vele melü kemomi tsüri mejo vatazo, kekrelamori pü Jihova khakesü Nuo melü mo ketala.

¹⁹ Kemejo süosü hihi, keveo cejülü vorite, thümako kezü unüku keveo ceri, kekrelamori uko mhathoko kesu tila.

²⁰ Kekrelamori mhakesu kethiko keveo retsüyo, mori kevelü vori yomo, umhathoko mengo sümo ketola.

²¹ Vele ketholü hü ketako keveo ce voriyo, pü mhathoko mengosü ketola, uko mhathoko Jihova medolü thi tila.

Jisu mu John jülo kepüo

²² Hisalü Jisu mu püsajiko ta Judea cejülü vota, pü sülü bade mipü jülompü sü.

²³ John sheri Aenon lü Salim kemenoce mipü jülompü ba, süce jü kekro ba tila, uko ta vori de jülo püyi.

²⁴ Kekrelamori John tüpü thejü thi molu süce.

²⁵ John sajiko mu Jews miko dolü mhakebu ta, uthi kemesa keyi zhola.

²⁶ Uko ta John cevode pü ketsoti, Rabbi, pü nzü Jordan khüco ketao no pü zhopo thi kebao, Hihe, thüma metü ta püce vota züle.

²⁷ John ukofü kelakesü, Thümapü utho mhapüri thiyiho, tüyo khapü pütsüsü kemosa.

²⁸ Neko akepo füko seba, süko zhopoko nekozo, A kepo, I Khrista mo, vele pü mhüjülü a ketsü kesüo.

²⁹ Pü zhosapü yi ketio sü zhosao zo, vele pü khrethoko püzüba de püfüko se reni pünü rechü bayo, zhosao fü kesela, hiohi akenü mu thitso süte.

³⁰ Pü zho mama ta mozesu, mu I tsü (ni) mama ta moze su.

Mipü tüyo kekiri

³¹ Pü mesoyo kiri ketio metüko pi, pü cejülü vori lize cejü zo, cejülü jüko poyo, tüyo kevori yosü metüko pi.

³² Pü se mu ngo tiko posüzo sheri thüma püri melüyi mote.

³³ Pü zhopo melü keyimi Jihova sü kethozo ti tha süyo.

³⁴ Kekrelamori Jihova ketsü kesüo Jihova jüko po süyo, Jihova Kemesa Rüpü mede kemo kha pü tsüsü.

³⁵ Po no Nuo khrü, mha metü khapü pübelü süte.

³⁶ Pü Nuo melü keyimi kechothe kehü ngo yite, somi Nuo melü mota sheri kehü ngo yi ho, vele Jihova lekhu püyo ba tayo.