JOHN 21 - KETHOLESI KESAO N.T. (BSI)

Jisu püsajiko mi thüna mengo kesü

¹ Hisalü Jisu püpü methakeyiko mengosü Tiberias jükezho khülü, hibide.

² Uko kezü ketako, Simon Peter, Thomas cüpü Didymus kethio, Nathanael Cana mi Galilee lü, Zebedee nuni, püsajimi kekre kena sa.

³ Simon Peter ukoce poti, hano tatsü füthi tatoho. Ukori püce poti, hako sheri nzü tsü tole. Side uko kezü tsüta, uko rekri rulü lüta. Vele süzi mhapüri tüyimo.

⁴ Vele keshu rena Jisu jüpo cethayi, vele uko süo Jisu tho ziti semo.

⁵ Süsa Jisu ukoce poti, natsi miko neko ketico hupü tame? Uko püfü kho kesü, Mo.

⁶ Pü ukoce poti, neko jal (füketüfü) kehüpü ru thezaco süte, neko ngoyi toho. Süla uko kehüpü ru thezaco sü, siri uko khu kekro boyi ketala jal tü süsa yi hota.

⁷ Süla Jisu kekhrü sajio Peter ce poti, Niepoo tele. Simon Peter Niepoo tele siti se kesüce, pü füketü füne khipü püzheyi, (kekrelamori pü mechü tatila), de ta jülü lüta.

⁸ Pü saji kekreko ru keni püyo vorita, kekrelamori süce cejü keso zü kemecuba kemola, (botho kra kenapü püzo), jal lü füko süsapü vori.

⁹ Uko taphe cejü tsoyi mu metha, uko megikrapü methi meto keba ngoyi, mu füko süsa tsükhrida sheri bade

¹⁰ Jisu ukoce poti, Fü püvorite, neko tsüce tü keyi.

¹¹ Simon Peter tavo füko süsa pü cejü pheri, khu kezho kekro ta, krapü hepüngu sü; fü kekro ta sheri jal pa (kro) tamo.

¹² Jisu ukoce poti, “Tavori de mhati yite.” Uko mipüri “no sopü”? zimota. Pü Niepoo zoti seba ketala.

¹³ Jisu tavori de tsükhri mu khu ri pü uko tsüsü.

¹⁴ Hiohi vasüo Jisu püpü methakeyiko mengo kesü, pü sa keva salü rhüla sü ketasa.

Jisu mu Peter ni

¹⁵ Uko mhati ketasa, Jisu Simon Peter cepoti, Simon Jonas nu, no hikoceri (füko) akhrüku yome? Pü poti, Ile, Niepoo, I nkhrü yoti no seba. No akuko vathi yite.

¹⁶ Va kenao ri püce poti, Simon, Jonas nu, no akhrü yome? Ile, no seba, I nkhrü yoti. Püce posa kesü, No akunuko thekü yite.

¹⁷ Pü vasüo ri poti, Simon, Jonas nu, No akhrü yome? Peter pülü suta. Püce vasüo ri No akhrü yome? Sizi ketala. Püce po sala kesü, Niepoo no mha metü seba, I nkhrü yoti sheri seba. Jisu püce poti, “A kunuko thekü yite.”

¹⁸ I nce potü süto, no khresa kebace ntho nche phayi to, mu dipüce vonyü ba sheri ta no voto; vele no pethi (tsa) ketasa no nbe chopü mikekre po nche pha süto, de nzü vonyü kemora vo tato.

¹⁹ Kepo hio püco tisa, dipü sü (sa) thide Therüoza thimelesü to sheri poba. Pü hiko po kevasa püce po kesü, “Asa meji yite.”

Jisu mu pü kekhrü sajio

²⁰ Süsa Peter regü prari Jisu khrü ketao püsa meji kezü ngoyi, pü Jisu khoroyo mengu püba theva mhaco tülü, Jisu ce pü poti, Niepoo, sopü ntü süla?

²¹ Peter püfü sekesü, Pü Jisu ce Niepoo thüma hio dipü bi tata?

²² Jisu püce poti, Mhace amedo lize I vori kemoce püpo tsizi bate, nla süsü kedipü ta? No asa meji yite.

²³ Süla methakeyiko dolü kepoti, saji süo sataho le zi tayo, siri Jisu püce sizi sümo, Pü sataho; vele amedo lize püpo fü bate I vori kemoce, nlano süsü kedipü ta?

²⁴ Pü saji hio süko pü po sü, mu hiko tho risü; mu hako se keba pü zhopo ketho zo.

²⁵ Jisu thi kesü kekre kekro riba, süko püpü tho ketosa, I a kelüce cejü lesiko thotsü keyimo, tho kezüko thoto lize. Amen.