JOHN 19 - KETHOLESI KESAO N.T. (BSI)

Jisu neketi de pü mesa keva

¹ Pilate-e Jisu tüpü methi sü.

² Thipaheko tsahu pira thipü püpiyo sü, mu mere keti füpü pü pü menesü.

³ Pükrünyü de poti, He! Jews miko kedeo, sisü de uko bezi phrepü püvü.

⁴ Pilate-e ta sala ukoce pra, de ukoce poti, Hihe, I püzü nekoce prari züho, nekopo seyi keto I püyo kejo püri ngoyi mozo.

⁵ Süsa Jisu tsahu pirapü, fü kemere be. Pilate-e ukoce poti, Hihe, thüma sü.

⁶ Thevo kezhoko mu kezhomiko pü ngo kesüce, semeto de poti, Püpü gu vate, pügu vate. Pilate-e ukoce poti, Neko püzü püvo gu vate; kekrelamori I püyo kejo ngoyi mozo.

⁷ Jews miko püce poti, hako thezho püba; mu pü thezholü sata ti mesüzo, kekrelamori pütho püpopü Jihova Nu zole zi ketala.

⁸ Pilate-e süo se kesüsa mpe sukuta.

⁹ Pü ta sala lü sheco balü bayi de Jisu ketsoti, No dipüce vori la? Vele Jisu jüpo mota.

¹⁰ Süsa Pilate-e püce poti, No ace mhaposü home? I npü guvari ve mu nkela sürive ti I keku keba no semome?

¹¹ Jisu püfü kela kesü, no mhapü ceri ametsuyi hozo, mesoyo khapü ntsü kemosa; süla atüpü ntsü kesüo kephoma kro kute.

¹² Hisalü Pilate-e pükelasü keto rhüta, vele Jews miko se kechü de poti, No mhace thüma hio khasüva ketosa no Caesar khrethomi mote; kehopüri utho ukhipü kedemi le sitimi Caesar metsu yo.

¹³ Pilate-e süko se keyice Jisu zü prari, pü sheco bayo bayi, cehükhro (nyho kemesa kesülü) vele Hebrewmi jülü Gabbatha ziyo.

¹⁴ Sünhasü deoba zho püngu nha cukevo nyela kerede keto tü, keba shurü (12:00) pü po kesü, Hihe neko Kedeo.

¹⁵ Vele uko se rekrü de poti, püpo ta tate, ta tate, pügu vate. Pilate-e ukoce poti, I neko Kedeopü guva tome? Thevo kezhoko poti, hako kede bamo, vele Caesar lebizo.

Jisu pü gu keva

¹⁶ Süla pü pükhapü uko tsüva, guvano de. Uko Jisu zü tata.

¹⁷ Pütho pü cross (nphemedü sü) püde ta mipifürolü vota, Hebrew miko jülü Golgotha.

¹⁸ Sülü uko püpü guva, mi kekre kena sheri pü püsagu, püchü luco hico, mu Jisu metsulü.

¹⁹ Pilate-e thüzapü thopü cross yo sü, tho kesüosü hibi, “Jisu Nazarethmi Jews miko Kedeo.”

²⁰ Jews miko thüma kekro sheri hio phrisü, kekrelamori Jisu kegu thethi nade zü kemeno tila; mu süo thopü Hebrew lü, Greek lü mu Latin lü sü.

²¹ Süsa Jews thevo kezhoko Pilate-e cepoti, Jews miko Kedeo ziti tho hite; vele pü po kesü, I Jews miko Kedeo.

²² Pilate-e posala kesü, I dipü thova sheri tho süvazo.

²³ Süsa thipaheko Jisu gu keva salü, püfüneko püyi, de keza zada thiyi; bola mesoyo (coat) utherü bamo, uvolü ki uphe ketso.

²⁴ Süla uko udolü kepo de uko cekhro va hi khe, vele khüle heve hesu pe khe; sopüza thito sheri, thopü kemeta ketho lesi jüko tsüyi ketola: “uko afüneko khipü kezayi mu a bola pü khüle (hevehesu) thide khiyi.” Hiko thipaheko thisü.

²⁵ Cross (nphemedüsü) phece kethako püzu, püsazüpü, Mary Cleophas cemi, mu Mary Magdalene.

²⁶ Jisu püzu mu püsajio, pükekhrüo süce ketha ngosü, püzuce poti, tsüce! Thenopü n Nu sü.

²⁷ Süsa püsajio cepoti, Nzu peyite, süyovilü püzu züvo pücelü thekütata.

²⁸ Hisalü, Jisu mhametüko thitso sü ketala, thopü kemeta jü-opo tsüyi ketola, I therite, side posü.

²⁹ Hice kephrojü mhabüpülü chuba, fünhe pülü süo süyi (metsüyi) kekhujü khapü sülüsü, de püvo pütalü süsü.

³⁰ Jisu süo krayi de poti, Tsüte, mu nekütsüta de pürüpü khasüva. (Jisu tsü chepha kesü, kengupü).

³¹ Jews miko cukevonye la mhakesü keyi tüta, themoko po bati mesümo, Sabbath nha, kekrelamori Sabbath nhasü tüso kezho tila. Uko tavo Pilate-e ce choti, uko pheko dochu va keto choyi, side uko pü tata ketola.

³² Side thipaheko taphe kerao phe dochu sü, mu kekreo püzü gupü kemezü-o phe niri dochusü.

³³ Vele uko phe Jisu ngo tice, pü sazü keta ngoyi, püpheni dochu mota.

³⁴ Vele thipahe mipü püngu khipü Jisu tsü züsü, süce thüza mu jü kesa krü kirita.

³⁵ Thüma hiko kengo-o ngo kethozo, mu pükepoko kethozo; pü sekeba pükepoko kethozo, sübi nekopo melüyi ketola.

³⁶ Mhahiko thi, ketho lesi po tsoyi ketola, Püro püri dochu mozo siziti popü kemeta.

³⁷ Ketholesi kekrepülü popü kemeta, uko pütsü zükesüo peto (phuto).

Jisu kekhrü

³⁸ Hisalü, Joseph Arimathea püsaji mipü, vele mekhrü tayo kekrelamori Jews miko kempela, pü tavo Pilate-e ce Jisu mo cho, mu Pilate-e khapü pütsüsü. Pü süla tavo Jisu mo khiyi.

³⁹ Nicodemus sheri tavori, pü tüzülü Jisu ce kevoo, mharü kethenyü aloe mu myrrh kere keti Kg. hepüngu khi vori.

⁴⁰ Side uko Jisu mo püyi, mharükenyüko kesa fünhe khipü pü kezhüsü, Jews miko kesa kekhrü zho bide.

⁴¹ Hice Jisu kegu thilü tizhe püba, tizhe sülü mhakhre püba. Sülü kesamo püri pü khrü molu.

⁴² Sülü uko Jisu mo khapü khrüva, sünha cukevonye la keredeti tü ketala; mu mhakhre uko meno kebalari sa.