JOHN 17 - KETHOLESI KESAO N.T. (BSI)

Jisu pü sajiko la cho kesü

¹ Jisu jü hiko po kevasa, pümhüpü tü pede poti, Apo pütü sü vori tso bate, n Nupü zapozale thi süte, n Nu sheri npü zapozale thisü ketola.

² No keku pü pütsüsü uthiupho metükopi, kechothe kerhüpü no khatsü kesü metüko yo.

³ Hihi kechothe kehü, No Therü kethoo zo mu Jisu Khrista no ketsü kesüo zole ti seyi keto.

⁴ I cejülü npü zapozale thi süho, I mhathoko thitso süte, no apo thino kha kesüko.

⁵ Tsühi, O a Po, cejü thi keyi mhüjü no athipü zapo zale thi kesübi, apü zapozale thi süte. I nza phrapü cejülü no thüma khapü aketsüko mhüjülü süte, mu uko njü züyite.

⁶ Cejülü thümako no khipü aketsüko ce I nza thipü mengo süte, süko nzhüzo no khapü aketsüko, mu uko njü zü yiteho.

⁷ Tsühi uko seyi keta no khapü aketsüko nzhü zoleti seyite.

⁸ Kekrelamori njüko no khapü atsü kesüko pü uko tsü süte, uko süko khiyite, I ncelü vorizoleti se bate, mu no aketsü kesü uko melü yite.

⁹ I ukola kecho thi süte, cejüola kecho thimo, vele no khapü atsü kesükola, süko nzhüzo.

¹⁰ Azhü metüko nzhüzo. Mu nzhü metüko azhüzo, I sükolü zapozale thi süte.

¹¹ Tsühi I cejüolü zhü mote, vele hiko cejüolü balu, I nce vori tato. Kemesa Poo, no uko yoyite, nzalü, no khapü aketsüko, ukopo pü thiyite, avu kezü pü kethibi.

¹² I cejülü uko zü kebace, nzalü I uko yopüba; mipü sheri medi vamo, vele kekri keta nuo lebi: jüopo tsüyi ketola.

¹³ Tsüsa I ta nce vori tato, mhahiko I cejüo ce posüve, ukopo ayo uko kenü tsüyi ketola.

¹⁴ I njüko khapü tsü süte, cejüo uko phi metsüte, kekrelamori uko cejüo mo tila, I sheri cejüo mo ketibi.

¹⁵ Npo cejülü uko züyi tate sizi I chomo, vele mhakesulü npo uko yoyi te ziti.

¹⁶ Uko cejüo mote, I sheri cejüo kemobi.

¹⁷ Uko thi kemesa yite, nketho-o yono, njü kethozo.

¹⁸ No aketsüpü cejülü kesü bi, I sheri uko ketsüpü cejülü süzüho.

¹⁹ Ukola I athi kemesa tayo, siziti ukopo sheri nketholü uthi kemesa ta ketola.

²⁰ Akecho hiko lebi la mori, vele uko jükolü melü vori ketoko la sheri.

²¹ Sizide uko metü kezü püthi yi ve ketola, no a Po alüba mu I nlüba, sübi ukopo sheri uvuyo püthiyi ketola; side cejüopo no aketsü süzo ti seyi ketola.

²² No zapozale khapü atsü kesüko, I khapü uko tsü süte, sizide ukopo avu pü kethibi uko pori pü thiyi ketola.

²³ I ukolüba, no alüba, side ukopo kezü püthi meveshuyi ketola, side cejüopo no aketsü kesü seyi ketola, mu no uko khrü tazo, no akekhrü bi.

²⁴ Apo, no khapü aketsükopo akebalü bayi ketola, side ukopo azapozale ngo, no pü aketsü, kekrelamori cejü thikeyi mhüjü no akhrü keta la.

²⁵ O Kemezi Po, cejüo nsemo, vele I nseba, mu hiko no aketsü kesü se bate.

²⁶ I nza pü hala mese süte, mu posü zoto, kekhrü no kha aketsü pori ukoyo bayi ketola, I sheri ukolü bayi ketola.