JOHN 16 - KETHOLESI KESAO N.T. (BSI)

¹ I hiko popü nekoce kesü nekopo ayo jo tamo ketola.

² Uko synagogue cekolü neko hu vato, Ile, humi neko dokhri tisü Jihova choyi thi bale lüto.

³ Mu uko mha siziti nekoyo thi süto, kekrelamori uko a Po ri mu ari semo tila.

⁴ Vele I mejümera nekoce posüve, siziti vori keto, süce neko nesa lüyi to, sizi keto ukoju pü I nekoce po kesüko. I Theralü neko zü ketace po süte.

⁵ Vele I ta a Po aketsü kesüo ce votato, vele neko mipüri aketsomo, “no dipüce votata”?

⁶ Vele I mha hiko pü nekoce pokesüla, neko lü su bate.

Kemesa Rüpü mhatho ju

⁷ Sizizo sheri I nekoce ketho posüto, I ta keta nekola kevezo, kekrelamori I tata molize, thelü tho kemelu voriho; vele I mhace tata süze I pü ketsüpü nekoce süto.

⁸ Pü vori tisa cejü kephoma mejo süto, kemezi mu sheco po süto.

⁹ Kephoma kekrelamori a melümo ketala.

¹⁰ Kemezi, kekrelamori I ta a Po celü votato kezüla, neko ango samo tato.

¹¹ Sheco, kemejo, kekrelamori cejülü kedeko mejopü mezüte.

¹² I mhakekro nekoce posü ketoba, vele neko süko tsühi seyi ho.

¹³ Kehothi sheri ketho Rüpü kevorice pü neko cho thapü kethokolü süto; pütho püju po taho, vele pü keseko pü po süto, mu vori ketoko pü nekoce po süto.

¹⁴ Pü apo pü zapozale thi süto, kekrelamori pü acelü ngo keyila, süko khapü neko mese mengo süto.

¹⁵ Apo celü mhakeba metüko azhüzo, süla I nekoce kepo, pü azhü khipü neko mengo süto.

Lüsu pü kenü thi keva

¹⁶ Dopü neko angomo tato, süsa pütü dopü neko angoto, kekrelamori I a Po celü vota tozü tila.

¹⁷ Süsa pü sajiko hunehu ketso de dopü neko angomo tato, süsa pütü dopü neko angoto, I a Po celü vota to zü tila, süsü dipü po bata?

¹⁸ Süsa uko poti, Pü kepo pütü dopü sizi tisü dipü po bata?

¹⁹ Hice, Jisu uko kelü se keyi uko pü ketsonyü ba keta, neko “pütü dopü” süo ketso nyü bame, neko dopü angomo ta ketosü, mu dopü ango sala to, siti?

²⁰ I nekoce potü süto, neko krato mu neko lü shü tato, vele cejüo unü phito, neko thelü shüshu tato, vele neko lü keshü süo kenuco neko nüshu de rechü tato.

²¹ Thenomi nukemenulü ulü kemezhe bayo, pütü vori ketala; vele pünu menu kevasa pü mezheko rekra motayo, kekrelamori thepu mipü menupü cejülü sü ketala.

²² Neko süla tsücehi nekolü su bate, vele I neko zü kengo sala to, neko melü nelü nenü phi tato, mu kenü süo mipüri necelü süpü tata ho.

²³ Sünha neko mhapüri aketso sa hote. I nekoce potü süto, neko mha kehopüri azalü cho süze a Po süo khapü neko tsü zoto.

²⁴ Tsüketso neko azalü mhapüri chomo zolu, chote, khapü neko tsü süto, side nepo nenüko thitsüyi ketola.

Sajiko thelü kelu

²⁵ Mha hiko I jüvelü nekoce po süte, vele pütüpü vorito süce I jüvelü nekoce pomo tato, vele a Po khapü mhotsu neko mengo süto.

²⁶ Sünha neko azalü mhachoto, I a Poce nekola mhacho süto siziti I nekoce posü mome.

²⁷ Kekrelamori a Po akhrü yo, neko akhrü tila mu I a Po celü vorizo ti melü ketala.

²⁸ I a Po celü vorizo, I cejülü vori; mu I cejüo khava tatato, side ta a Po ce votato.

²⁹ Pü sajiko pü ketso, Hihe, no tsühi jüpo mesa mesho süte, jüvelü po mori.

³⁰ Tsühi hako nkepoko se mesa mesho bate, mipüri nketso mori vete, No Jihova celü vori zo ti hako melü bate.

³¹ Jisu uko ketsode, Neko melü teme?

³² Hihe, pütüpü vori zü, mu tsühi vori tso bate, neko huphrüpü pre tato, utho ucelü votato, side alebi batato. Sizi sheri alebi bamo, kekrelamori a Po azü kebala.

³³ Mhahiko I nekoce kepo nekopo ayo nelü menü ba ketola. Cejülü neko kemezhe zoto, vele neko nezü vekrü yite; I cejüo pi kuyi ketala.