JOHN 14 - KETHOLESI KESAO N.T. (BSI)

Jisu cho kethoo zo Poo celü kevo

¹ Nlü kemezhe tasu, neko Jihova melü bayi, mu amelüri bayite.

² Apo celü thüma ba baphi, mhace sizimo süze I nekoce posüva tevele, I tavo theba kesü pü neko füba tato.

³ Mhace I tavo nekola theba kesüyi ta lize, I sala tavori to; side neko zü akeba thethilü vori tato: akeba thethilü neko sheri bayi ketola.

⁴ I vota keto neko seba mu choo sheri neko se bate.

⁵ Thomas püce poti, Niepoo hako nekevo choo semole, dipübi hako cho süo seyita?

⁶ Jisu poti, I cho-ozo, kethoo mu kerhüo zo; mipüri Poo celü vo keyi bamo vele ayo lebi.

⁷ Mhace neko ase ba tisa neko a Po sheri se batato, tha yowi neko Poo se bate mu püngori süte.

⁸ Philip püce poti, Niepoo Poo sü pü hako mhüngo thi süte size hakola tso tato.

⁹ Jisu püce poti, Philip neko azü pütü kecho vorite, siziri, neko ase mo zola? A ngo kevami Poo sheri ngo vazo, süla dipüla neko Poo khipü hako mhüngo thi süte zibata?

¹⁰ Neko I Poo lüba mu Poo alü ba siti neko semo zo me? I jüpo kesüko atho ala jüpo sü mozo, vele Poo alü ba de mhathoko thi tazo.

¹¹ I a Poo celü ba ti melüyite, mu Poo alü bati sheri, mo sheri mhathoko la sheri amelü yite.

¹² I nekoce potü süto, amelü keyimi amhatho kethiko pü sheri thiyi to, mu mhatho süko ceri zhokuti thi yito; kekrelamori I a Po celü vota tokezüla.

¹³ Neko azalü mhakehopü cho zori I süko thipü tsü süto, sizi keyilü Nu-ola Poo zale thiyito.

¹⁴ Mhace neko azalü mhacho lize, I süko thipü neko tsü süto.

Kemesa Rüpü khasü keto reshujü

¹⁵ Mhace neko akhrü yo lize, I jü khapü neko ketsüko thi mu züyite.

¹⁶ I Poo ce mhacho süto, mu pü thelü thokemelu khapü neko tsü süto, side pü neko zü kechothe ba tato.

¹⁷ Ketho Rüpü, cejüo süo ngoyi keho, kekrelamori püse püngo kemola; vele neko püse bate, pü neko zü kebala, mu neko zü tasü tato.

¹⁸ I neko khapü thelü thokemelu kedi thi vaho, I nekoce vorito.

¹⁹ Vele pütü dopü cejüo ango motato, vele neko angoto; kekrelamori I rhüta zo tila, neko sheri rhüta zoto.

²⁰ Sünha neko I a Po zü keta seyito, neko alü ba mu I neko lü kebala.

²¹ Sopüno akepoko kha püta mu züyi sheri pü akhrüta; pü akhrü ketao sü a Po sheri khrü tazo: I sheri pü khrüto, mu I akhapü pü mese mengo süto.

²² Judas (Iscariot kemoo), poti, Niepoo no dipü bide pü hako mese mengo süto vele cejüo mese mengo süho-ena?

²³ Jisu püfü kelakesü, mhace thümao akhrü süze ajüko khipü bato, size a Po pü khrüto süsa a Po hani püce vorito, mu pülü hani ba tato.

²⁴ Pü akhrü kemoo ajüko pü baho, neko ajü kepo keseko atho ajü mozo, vele a Po aketsü kesüo jüko zo.

²⁵ I jü hiko kepo neko se bate, tsühi I neko zü kebalü.

²⁶ Vele thelü thokemelu süosü Kemesa Rüpü, a Po azalü ketsüpü neko ce süto, pü mha metü pü neko metha süto; mu nekopo mha metü neko salü la vorito, I neko ce po kesü metüko.

²⁷ Thelü thsi zi tipü khapü neko tsü süto, alü thelü kemenüpü neko tsü süto; cejüo khapü mi ketsü biho, I khapü neko ketsüno. Neko lü keho kerü thi tasu, mori mpe ri tahi.

²⁸ Neko tsühi I nekoce kepoko se bate, I ta tato, nekoce sala vorito. Mhace neko a khrüyo lize, neko rechü yite, kekrelamori I a Po celü vota to kezüla; kekrelamori a Po ace zhoku.

²⁹ Mha süko thi vori keta mhüjü I nekoce posüve, mha süko thi vori taze neko süko seyi mu melüyi ketola.

³⁰ Hisalü I neko zü mhakepo phizo hote, cejülü kezho miko ta vori tazü mu ala mhapüri bamo te.

³¹ Vele cejüo po I a Po khrü keta seyi ketola, apo thi ketopü a Po khapü atsüsü, sübide I thi süte, Khe, uko tasü takhe, de ta vo tato.