JOHN 12 - KETHOLESI KESAO N.T. (BSI)

Mary tirü pü Jisu kenhü kesü

¹ Cukevo nye mhüjü zho shurü kebalü Jisu ta Bethany lü kho, Lazarus celü, püthi merhü kesüo.

² Uko theva-o pümesoyi de püpo mhatiyi, Martha rena püreyisü, vele Lazarus uko dolü mipü püzü miz yo mhati ba.

³ Mary tirü püma kerü (spikenard) pound pü lapü Jisu phezi kenhüsü de püpitha pü süva; mharü kethenyü süo celü metü chu bata.

⁴ Süsa püsajiko dolü mipü Judas Iscariot, Simon nu hisa pü tüsü ketoo poti,

⁵ Tirü kenhü ketio zhupü pence kra kena khriyi mano, de khapü kedimiko tsüsü mano?

⁶ Hio kepo, pü kedimi kekhrü lamo, vele pü keregomi tila, pü presa lekho khiyo, mu presa rego tayo tila.

⁷ Süla Jisu poti, “Thenopü kebü hite, pü akekhrüne kesü kesüla zo.

⁸ Kekrelamori neko kedimi züta süto, vele neko azü ta süho.”

Lazarus dokhri vaketo mharhü thiketa.

⁹ Jews miko kekro tavori, pü süce kebala, Jisu lebi la zo mori, Lazarus sheri pe ketola Jisu pü sa ketalü phü merhü kesüla.

¹⁰ Vele thevo kezhoko mharhü Lazarus sheri mesa va keto rhüta.

¹¹ Kekrelamori püla Jews miko kekro sheri ta ketala, mu Jisu melüta.

Jisu melemelu ta Jerusalem lü kelü

¹² Süsanha thüma kekro ta thenyelü vori, uko Jisu ta Jerusalem lü lü kezü sekeyice.

¹³ Uko revüniko thüpü mu sü kemejo coko rhopü, de püzü kesüto vori; uko se rekrü de Hosanna, Thejo kepütho Israelmi kedeo, Niepoo zalü vori kezüo.

¹⁴ Jisu gadanu püyo bayi, thopü kemeta bide.

¹⁵ Mpe hite, Zion nupü, Hihe nkedeo gadanu (tholi) püyo vori züho.

¹⁶ Mhahiko methakeyiko therace se bamo, vele Jisu zapozale thi kevasa uko sa lü vorita, hiko metü püju thopü meta tila, uko mhatho hiko thipü püyo sü.

¹⁷ Thüma püzü ketako mha hiko Lazarus mhakhrelü phü merhü kesü ngo mu seba.

¹⁸ Pü mha hiko ungo mhatho thi kesüla thümako tavo püpe toli vori.

¹⁹ Pharisee miko uko dolü kepoti, neko mhapüri thiyi mo keta lü bame? Hihe, cejü metü püsa meji tazü.

Greek mihu Jisu penyü keta

²⁰ Thenyelü vori de reshü thi ketoko humi Greekmi.

²¹ Thüma süko ta Bethsaidalü Philip cevori, Galilee lü, püce poti hako Jisu penyü tale.

²² Philip tavo Andrew ce posü, süsa Andrew mu Philip ni kezüvo Jisu ce posü.

²³ Jisu unice pokesü, pütü (bavüdo) vori bate, thüma Nuo zapozale thita keto sü.

²⁴ I nekoce potü süto, teha retu cejü tsü de sata kemosa süo pü lebi ba tayo, vele süo mhace sata süze püse kekro zhüyi yo.

²⁵ Somino pü kerhüro khrüta sheri katato, mu sopüno cejü hilü pü kerhüro khrümo (ngometsü) tato sheri kechothe kehü ngoyito.

²⁶ Mhace humi achoyi thiyo lize, püpo asa meji yite; I dipüce ba sheri püpo sülü ba yito: mhace humi achoyi thiyo lize a Po pü rho süto.

²⁷ Tsühi alü kemezhe bate, I dipü pota? Apo pütü hilü akela süte, vele püco hiola I pütü hilü vori.

²⁸ Apo, nzapo zapozale thi yite. Süsa tülü füphrapü kiri, poti, I zapozale thi süzo mu thisa süto.

²⁹ Thümako süce kebako süo sesü, de poti, tüsü süle; kekreko poti, tüyo choyipü püce jü posüle.

³⁰ Jisu ukofü kela kesü, Füphra hio Alamo, vele nekola.

³¹ Tsühi cejüo neketi bate, hisa cejülü kekha keba kezhoo hu vato.

³² I cejülü tasü ketasa thüma metü tüsüpü aceco vori tato.

³³ Pü kepo hio pü düpü sü thito sheri süo poba.

³⁴ Thümako püfü kela kesü, Hako thezholü thopü kemeta sekeba Messiah kechothe ba sütole ziba; no dipüla thüma Nuo tasü tatole siziba? Thüma Nuo sü sopüta?

³⁵ Jisu ukoce poti, pütü dopü keve neko zübato. Keve kebace neko kevelü tayite, sizi moze kezüo nekoce vori tato; kekrelamori kezülü ketami pü dipüce vozü sheri seyomo. (Thümako melütho keta).

³⁶ Keve nekoce kebace neko keve melü yite, sizino keveo nuneko thi yite. Jisu jü hiko po kesüsa pü tavo mi kedira vota.

³⁷ Vele pü mha kekro ungo mhathoko thisü zori uko pü melü muta.

³⁸ Hihi thajü Isaiah saju kepoo popü kemeta thitsü sü ketola zo, “Niepoo sopü hafü melüyi ta, Niepoo bechopü somi yo sü?”

³⁹ Side uko pü melü mota, kekrelamori Isaiah posa kesü;

⁴⁰ Pü uko mhü thi mece ve, uko melü sheri thipü (revo) daduve; side ukopo ngomo ketola, mu uko melüpo mhalüyi mo ketola: uko thelü redeyi de sürhoyi ketolü.

⁴¹ Isaiah hiko po kesü püzapozale kethi ngotila mu püju posü.

⁴² Sizosheri mikekha keta kezhomi kekro sheri pü melüyi, vele Pharisee miko la phra mese zomo, kekrelamori uko synagogue kolü hupü chozu süva ketola.

⁴³ Kekrelamori uko Therüopo uko chu keti ceri thümapo uko chuti menyüku tila.

Jisu kemetha jüko

⁴⁴ Jisu semeto de poti, “amelü keyimi, amelü mori aketsü kesüo melü yi.”

⁴⁵ Akengomi aketsü kesüo ngo sütazo.

⁴⁶ I cejülü keveo thi vori, somi amelüyi sheri kezülü bati mesü mote.

⁴⁷ Humi mhace ajüko sede melü mota lize, I pü mejomo, kekrelamori I cejüo mejo tole vorimo; vele cejüo kelayi ketola vori.

⁴⁸ Pü amela kevao ajüko yimute, mipü pü mejo tato, I jüpo kesü jü süo thela nha pü mejo tato.

⁴⁹ Kekrelamori akepoko atho amedo lamo, vele a Po aketsü kesüo, pü khapü atsü kesü, I po kesü mesüleno.

⁵⁰ I sekeba pü khakesü jüko kechothe kerhü zo, I kehopü posü zori a Po acepo kesüko la I pü po sü.