JOHN 11 - KETHOLESI KESAO N.T. (BSI)

Lazarus sa keta

¹ Thümapü püza Lazarus lezino mhathi bata, Bethany rünalü Mary mu püsazüpü Martha ni ra.

² Mary tirü khapü Jisu kenhü kesüpü, pü pitha ri pü Jisu phezini shüsü, püprü-o Lazarus mhathi bata.

³ Süla pülipüni mi ketsüpü Jisu cesü, de poti, Hihe, no pükhrü ketao mhathi bate.

⁴ Jisu süo sekeyice poti, kethi hio sata ketola mo, vele Niepoo zapo zale kethila, Jihova Nu zapozale thiyi ketola.

⁵ Hitüce Jisu Martha, püjürapü mu Lazarus hiko khrü phi tayo.

⁶ Pü süse keyisa zho kena lüthü bata, pü keba thethilü.

⁷ Süsa pü sajiko cepoti, uko ta Judea lü sala kho tokhe.

⁸ Pü sajiko püce poti, Jews miko ketsüpü nva toli ba tila, Kemethao, no sülü sala kho tola?

⁹ Jisu ukoce poti, tüso kebace bavüdo kerikena ba mome? Thüma kehopüri tüso kebace chota lize püphe mesü vaho, kekrelamori pü cejülü keveo ngo kebala.

¹⁰ Vele kehopü sheri tüzülü ta lize, püphe meshü yito, kekrelamori keve püyo ta kemola.

¹¹ Pü mha süko posü, süsalü pü ukoce poti, “Uko züo Lazarus zü bate, vele I tavo de pü kesümeco süto.”

¹² Süsa püsajiko püce poti, “Pü züba lize uzho ba zotho.”

¹³ Sizo sheri Jisu püsü poba, vele uko kelüce pü zürelü keba lübata.

¹⁴ Süsa Jisu ukoce po metsü metsesü, “Lazarus sa tele.”

¹⁵ “I nekola anü tipü ba, I süce ba kemola; nekopo melü yive ketola: kehothi sheri uko ta püce vo khe.”

¹⁶ Süsa Thomas, cüpü Didymus (nube) lezi ketao püzükoce poti, “ukori tavo püzü sata khe.”

Jisu rhüla kesüo, mu kerhüroo zo.

¹⁷ Süsa Jisu tavori, pü khapü makhrelü khrü keva tüsozho da keta ngoyi.

¹⁸ Bethany hi Jerusalem zü kemecumo, furlong keripüngu lebi zo.

¹⁹ Jews miko kekro ta Mary mu Martha nice vori ba, uko tavo uni lü thomelu ketola, uni prüo lano.

²⁰ Süsa Martha Jisu vori kezü sesü metha tavo püzü kesü, vele Mary püthilü bazo.

²¹ Süsa Martha Jisu cepode, mhace no hice ba lize, aprü-o sata ho vele.

²² Vele I sekeba, tsühi sheri no Jihova ce mhakehopü sheri chosü lize, Jihova khapü ntsü sü zoto.

²³ Jisu püce poti, “Nprüo rhüla sürito.”

²⁴ Martha püce posala sü, I sekeba pü thela nha rhü sala sürito.

²⁵ Jisu püce po, I rhüla kesüo zo, mu kerhüro yozo; amelü ketami sata zori pü rhüla yito.

²⁶ Kehopü sheri rhü kebalü amelü keyimi sata ho. No sü melü teme?

²⁷ Thenopü püce poti, Ile, I melüte Niepoo, no Khrista zole, Jihova Nu, cejülü vori tole ketao zo.

²⁸ Thenopü pokevasa ta pücholü vota, de vo pü sazüpü Mary cüsü, püce mekhrü de poti, Kemethao hice voribale mu ncü bale zisü.

Jisu krata

²⁹ Thenopü süsesü metha rekri ta püce vo.

³⁰ Hice Jisu rünalü vori molu, vele Martha püzü kesüti thethilü balu.

³¹ Jews miko thenopü zü pücelü kebako pülü thomelu ba, thenopü rekri tosü keta ngode püsa mejivo, uko kelüce thenopü tavo thekri thi toli zütho ziba.

³² Süsa Mary vo Jisu keba ngoyi de tatsü püphelü pü reshüta, de poti, Niepoo, mhace no hice ba lize aprüo sata ho vele.

³³ Jisu thenopü kekra ngosü mu Jews mikori kra keta ngosü, pü rüpü melo bata, pülü kemezhe bata.

³⁴ Pü poti, neko pü khapü dipüce mezü? Uko püce poti, Niepoo, tavori pete.

³⁵ Jisu krata.

³⁶ Süsa Jews miko poti, Hihe, pü didüpüri pükhrü sheri!

³⁷ Humi poti, pü mimhü thimeve kesüo thüma hio pori samo tati thiyi ve mome?

Jisu Lazarus phü merhü kesü

³⁸ Jisu pülü panyo de ta mhakhre cephe. Mhakhre süo kece cepü mu ketsü kezhopü khipü gü metha.

³⁹ Jisu poti, Neko ketsüo püvate. Martha kesao lipü poti, pü sa mena tatole, Niepoo, kekrelamori pü sa keta zho date.

⁴⁰ Jisu püce poti, I nce posü mome, mhace no melüyi lize no Jihova zapozale ngoto.

⁴¹ Süsa uko ketsüo püva, kesao khapü kemezülü. Jisu pümhü pü tüpede poti, Apo, no afü reni kebala nmeza.

⁴² No afü reni sü tayo keti I seba, vele thümako azü kethako la I hihi posü, no aketsü süzo keti ukopo seyi ketola.

⁴³ Pü süko po kesüsa se de füphra meto shusü, “Lazarus, tasüri te.”

⁴⁴ Sa ketao tasü rita, püphe pübe kesa füne khipü phapü süri; püzü sheri füpü kezhü meta. Jisu ukoce poti, “Püphrü süte, side püpo tavo tate.”

⁴⁵ Süsa Jews miko kekro Mary vori kebako, mha süko Jisu thikesü ngo de pü melüyi.

Jisu dokhri va keto dorhü

⁴⁶ Vele humi ta Pharisee koce vota, mu Jisu thikesüko pü ukoce posü.

⁴⁷ Süsa thevo kezhoko mu Pharisee miko kenguyi de kerethita, de uko poti, Uko kedipü bita? Thüma hio mha ungo keti kekro thi süte.

⁴⁸ Mhace uko pü khapü hizi zo ba ketosa, thüma metü pü melü tato; mu Roman miko tavori de uko thethi mu urüna sheri püyi tate.

⁴⁹ Mipü püza Caiphas lezitio, tütse sülü thevo kezhoo thiba; püpoti, Neko mhapüri semo.

⁵⁰ Mori ukola moze kesu lüri yomo, mipüpo thümakola sa keta mesü, size shuye metü katamo ketola.

⁵¹ Jü hio kepo pütho zomo, vele tütse hilü pü thevo kezhoo thiba tila, pü saju kepo Jisu po shuyela sa keta mesü ziba.

⁵² Shuye süo lebi lamo, vele Jihova nuneko hupre kevako züvo kenguyi ketola risa.

⁵³ Süla sünha yowino pü dokhri va keto rhü tata.

⁵⁴ Jisu süla melemelu Jewsmi dolü ta mota, vele rezü rüna mi kedira vota, rünapü Ephraim lü vota. Mu sülü püsajiko zü bata.

⁵⁵ Jewsmi cukevo nye meno bata, thüma kekro uthi kemesa ketola ta Jerusalem lü voba.

⁵⁶ Süla uko Jisu phu bata, uko dolü kepoti, kereshücelü kebace, “Pü thenyelü vori mota lize neko dipü biti lüba”?

⁵⁷ Thevo kezhoko mu Pharisee miko jü khakesü, mhace humi pü dipüce ba sheri se lize po kemese süte, pütüyi ketola.