JOHN 10 - KETHOLESI KESAO N.T. (BSI)

Jisu teko kefü keveo

¹ I nekoce potü süto, cekhalü talü teko krolü lü kemomi, vele sazho mele kelümi, süo keregomi mu mizhü süketimi zo.

² Vele cekhalü kelü süo teko kefü-o zo.

³ Cekha kefüo cekha khripü pütsü süyo, teko kro püfü seyo; pü teko koza cü süyo; mu teko chotha zü ta voyo.

⁴ Pü koko züpra rize pü uko mhüjülü tara voyo, mu teko kro püsa meji tavoyo, kekrelamori uko püfü seyo tila.

⁵ Uko sekemomi sa meji yomo, vele pücelü tatayo, uko sekemo miko fü semo ketala.

⁶ Jüve hio Jisu ukoce posü, vele mhasüko pü kedipüla poba sheri uko semo.

⁷ Süla Jisu püsaji koce poti, I nekoce potü süto, I teko kro kharü yozo.

⁸ Amhüjü kevoriko metü keregomi mu süketi miko zo, vele teko kro uko fü reni mote.

⁹ I kharüo zo, kehopüri ayo kelümi, pü kelayi to; pü tapra talüde püco ngo yito.

¹⁰ Keregomi rego toli voriyo, mi dokhri tolino, mi meka sü tolino, vele I mipo kehü ngoyi ketola, mu süo ngo shuyi ketola.

¹¹ I teko kefü keveo zo, teko kefü keveo püpho khapü teko kroko la kha süyo.

¹² Vele püzho khrizü ketami, teko kroko püzhü kemola sace vori kezü ngo süde pü tata yo, sace vori de teko kro tüva mu hupho vayo.

¹³ Püzho khrizü ketao mipo püzho khripü ketala, teko kro khrü phi menu yomo.

¹⁴ I teko kefü keveo zo, akokro seba mu azhüko aseba.

¹⁵ Apo aseba, sübi I sheri a Po seba, apho khapü teko kro tsü süto.

¹⁶ Ako kekre kropü ba, süko teko kro hilü bamo, süko sheri züpü kro hilü vori moze su, süko afü seyito; side hiko zü kropü thi tato, teko kefü ri püzo tato.

¹⁷ Süla a Po aphi pünüyo, kekrelamori I apho khapü sü ketola, side I khila yito.

¹⁸ Mipüri süo acelü pü tata mo, atho kha kesü zo. Süo khasü keto akekuba, mu püsalayi keto sheri a keku ba. Hio thino khakesü jü a Po celü I ngoyi.

¹⁹ Jews miko dolü kelakreta jü hiko kepola.

²⁰ Thüma kekro uko dolü poti, pü therü kesu zütale, pü nyote; neko dito püfü reni ba?

²¹ Kekreko poti, Jü hiko kepo therü kesu zü ketami jü mole, therükesu mimhü thipü mhangoyi veme?

²² Tüsü tüce, Jerusalem lü kereshüce thi kemesa ti thenye tülü.

²³ Jisu Solomon cehükhro kereshüce lü taba.

²⁴ Süsa Jews miko tavo pühu metuyi, de püce poti, dithepü no hakopo lüyi su bazota? Mhace no Khrista le zize hakoce po kemetse vate.

²⁵ Jisu ukoce poti, I nekoce posüzo vele neko melü mute, mhatho kethiko I a Po zalü thi tazo; süko azhopo zo.

²⁶ Vele neko melü mute, kekrelamori neko ateko kro mo tila, sizi I neko ceposüte.

²⁷ Akoko afü seyo, I süko seba mu uko asameji yo.

²⁸ I kechothe kerhüpü uko tsü süyo, uko mhapü ceri su taho, mori mipüri abelü süpü tataho.

²⁹ Apo süko pü aketsüo metüko ceri zhoku, mu mipüri a Po belü süko süpü tata ho.

³⁰ I mu a Po hani püzo.

³¹ Süsa Jews miko ketsüpü püva to züta.

³² Jisu ukoce poti, I apo celü mhakeve kekro thipü neko mekasü; mhatho sükola neko ketsüpü ava tome?

³³ Jews miko püfü kelasü de poti, mhatho keve kola hako ketsüpü nva tomo; vele no Niepoo zhoshu tila; no thüma zori ntho npü Jihova thi ketala.

³⁴ Jisu ukoce poti, nethezholü thopü kemeta, akepo “neko therü mizo.”

³⁵ Mhace pü süko cüpü therümi le zi sütaze, Jihova celü vori keta ketholesi jü khipü mole zi va ho.

³⁶ Apo ketsü kesüo, püthi kemesa sü de ketsüpü cejülü sü, size neko püpü Jihova zhoshu bale siziyi veme: I neko ce kepo I Jihova Nu zo zi kesü.

³⁷ Mhace I a Po mhathoko thiyo mo tisa amelü hite.

³⁸ Vele mhace I thiyo tisa neko amelü mota sheri mhathola melü yite, zize neko seyito mu melü yi tato; a Po alüta mu I pülü tazo.

³⁹ Süla uko pütüyi tatole süta, vele pü uko belü therü tata.

⁴⁰ Süsa pü ta John therace mipü jülopü kesü thethilü Jordan rükhüco cuvota de sülü bata

⁴¹ Thüma kekro ta püce vo de poti John ungo mhatho thi mo, vele John thüma hiola po pü kemeta metüko kethozo.

⁴² Thüma kekro sülü pü melüyi.