JAMES 4 - KETHOLESI KESAO N.T. (BSI)

Cejüo zü khretho kethi

¹ Dipühla ne dolü küzhe mu küpali kütsü sütayo? Ne münyü yolü ne dolü küzhe bata mo me?

² Ne mha münyüyo vele süko bamo. Süla mi dokhriyo, mu mha mühoyo, vele ngoyi yomo. Süla ne küzhe mu küpaliyo. Sin ne ngoyi mo, kükrelamole ne choyo mo.

³ Ne choyo siri ngoyiyo mo, kükrelamole ne ngo küyi püh ne nü ne nyüko thinyüsa de cho küzüo choyo mo.

⁴ Kürügü kürüzhümiko! cejüo zü khretho küthie Jihova ngomvu zo kütsü she mo me? Süla kühopühri cejüo zü khretho küthimi pütho püpüh Jihova mürhami thitayo.

⁵ Mori Ropü khapüh uyolü süküvao uroküne münyü Kütholisi po küsü kümüchü püh zo kütsü lüyo me?

⁶ Sileri pü ngokümüzhe khamükro süyo. Süla Kütholüsi po kütsü, Jihova kümüko kütsümi müsüh thiyo, ngokümüzhe püh rünusai kütsümi tsüyo.

⁷ Ne khapüh Jihova tsüyi. Thürüküshü müsüh thiyi. Sileo pü ne thürhü tato,

⁸ Jihova müno voyi, sio Pü ri ne müno voyi to. Vajokütako, ne be thikümüsayi, lü künako ne lü thikümüsayi.

⁹ Ne thükri thiyi, nelü kümüzheyi mu kraite, ne künyüpüh kükra thiyi mu ne künü po thüjüküzü thita te.

¹⁰ Nepoo mhüdzülü netho ne thipüh nünusai sileo Pü ne müsü süto.

Mi mejo hinokesü

¹¹ A züneko, huniehu thahi, kühopühri pü zümi tha mori lü müjo leo thüzhoo tha mu thüzhoo müjo bate, thüzho müjo taleo thüzhoo thi mu zü kümomi te mu thüzhoo cope küthimi te.

¹² Thüzho kha küsüo mu copeo mipüh lübi zo. Süo thono küla süyive mu müka variyi ve. Vele n zanuo lü müjo kütsüo no sopüh mu?

Sodo la kümüha hino küsü

¹³ Tsü rünisüphi, nekoe “Tha mori sühdo uko rüna lulü mori hiolü vo de tüce püh sülü hü no hethoheli thi de prayito,” süzi poyo.

¹⁴ Sin sühdo dipüh bi tosi neko süo shemo. Ne kühü hi dipüh-ah? Ne thüzüh mhü u mhüngo thi masü de ditayo kütsü kro püh zo.

¹⁵ Si kütao mole “Nepoo müdo leo uko rhüba de mha hio mori luo thito,” neko süzi pote.

¹⁶ Süsübi, ne kümako mu kümüha kümave tayo, Kümüha küta süko mütü kükri,

¹⁷ Kühopühri thiküzüo she zori thi moleo, pü phoma tazo.