JAMES 3 - KETHOLESI KESAO N.T. (BSI)

Uta kükhaküyi

¹ A züneko, mi kükro kümüthami thi hi, kükrelamole u mi müthao kütsüko kütso mürühku kütosheba küta la.

² U mütüh mha kükrolü kükri tayo, mhanuü mi pühne pü dzüpolü kükrio moleo, pü vetsü kütsümite, pü umo photüh ri kükhayi ve.

³ Mha kütsüne püh khi gura ta khayi kütace pü u dzüzüyi yo, side pü resü u müdolü voyiyo.

⁴ Lüsüte, ru tho zhophi bari tükhra khrade po hüpü tazo ri ru küthomi ru küthosüh kütsüne püh püh ru repüh pü müdo co voyiyo.

⁵ Sükümha u müyi ri u moyo zatsüh pühzo, vele kümüha swü kütsü poyi yo, lüsüte, me ne püh yolü kütsa küdithüdü ri tovayo mu!.

⁶ U müyi ri me pühzo, u mo yolü zatsüh dolü umüyi-e küphoma cejülü tate. Süo umo mütü thi mürho vayo. Mu u kühüzhorüle zho mütü tovayo, süo meza meo lü tovayo.

⁷ Thümae thi müra, guküta khonu mu dzüküzholü küta lümi kükhayi ve, mu thümae süko kükha vozü zo.

⁸ Vele mipüh ri umüyi kükhayi mozo, süsü müyhumüzhe küta mhaküshü püh zo mu küsa rüh tshuzo

⁹ Süo pühu Poo mu Nepoo tshuyo mu süo püh Jihova rhilü thiküyi thüma ri rüswü tayo.

¹⁰ Tapühlü jopüh mi kütsü mu mi rüswü kütsü ri paiyo. A züneko, mhahiko hizi zü mozo.

¹¹ Dzüpra cepühlü dzüsi mu dzükhu pai ve me?

¹² A züneko, chüdühbo yolü Olive she mori khubero yo chüdüh zhüyi ve me? Küza dzülü dzüsi krüpayo mo.

Müsolü küvo mhashe co kena

¹³ Ne dolü somine mhashe mu mhaco mhala sheyo? Pü po kühü zhorüle küve süo mününu kütsü mhashe yolü küvo mhatho tha mi kasüte.

¹⁴ Vele ne lülü mi ngo uro swü kütsü mu utho uzhozhü lüphüh kütsü baleo süsüla kümüha hi mu küthoo püh kümüda thiva hi.

¹⁵ Si kütsü mhasheo müsoyolü kimo mu Ropü ceco mo, vele cejüo ceco muthürüküshü ceco zo.

¹⁶ Kükrelamole mi ngo uro kütsü mu utho uzhozhü külü kübara kübvüküli mu mhaküshü dolümi bayo kütsüla.

¹⁷ Vele müsoyolü küki mhashee thürao müsa, süsa küzüküve, uzhoküve, küdzüzüyi kürüyi, mi phikümüzhe tshu küpü mu u mhatho she küzhü, unü shemükre kümo mu küthüzaküthüra kümo zo.

¹⁸ Küzüveo kütsümi küzüve de kümatho she lüsüyo.