JAMES 2 - KETHOLESI KESAO N.T. (BSI)

Unü shekrehi no kütsü

¹ A züneko, zale küthi Nepo Jisu mülüyi küta bi humiyo unü shekreta hite

² Mipühne süna bekha ni mu khümüne küve süh de ne kühulü vo mu küdimi püh khümüne küshü süh no vo.

³ Mu süce ne khümüne küve küsüh-o she mükre de puce, no hice thüba küvelü bayite, isi, vele küdio ce, “tsüce thayi mori ki a phekhrolü bayi” sileo.

⁴ Netho ne dolü khokükre mu ne lüdo küshülü mi lü kükreta mome?

⁵ Kükhrü a züneko, rünisüte, Jihova cejü hilü küdimiko küdapüh kümülü ceco mhakünemi mu pü khrüyo kütsümi la dzüphra thisü küva küde rüve kasükalü thita

⁶ Vele neko küdimi rhomote. Ne müswü kütsüko mu ne süsazü shetiba lü voyo kütsüko mhaküneko mome?

⁷ Thüza küve tho püh ne tsü küva süo thayo kütsü süko thozo mome?

⁸ Kütholüsi lü küdezhoo ngoküyi “No n sühzanümi khrüpüh n tho n kükhrü biyite” si kütsüo müji tsoyileo, no vezove.

⁹ Siri ne humiyo ne nü she mükre tale-o ne küjo thita zo, mu sino thüzho po ne müjo püh thezho küvarhümi thi bate.

¹⁰ Sileo kühopühri thüzho mütü züyo zori, mhaco püh lü vace taleo, mütülü jotazo.

¹¹ Sileo “kükhrüküzü hi” sizü poküsü “Mi dokhri hi” si kütsü ri pobazo. Süla no mi khrülizü mo zori mi dokhri leo no thüzho küvarhümi thitazo

¹² Süla hephahephü zhoo lü ne müzi cope thiküto lü de dzüpo mu thizoyite,

¹³ Vele mi ngomüzhe kümomi ngomüzhe mozo de pü she kütito, siri ngokümüzhee dzünyolü kuyi zoto.

Kümülü mhatho kedikesa

¹⁴ A züneko, mi pühne pü kümülü baleno pozo ri pü mhatho dileo küdipüh kümve bayo? Pü kümülü sü pü külayi ve me?

¹⁵ Mhace ne sazüdzüra mori ne lipüne püh müchü mu thatha va di ta kütsüce.

¹⁶ Neko mipüh sümi ce nelü rüyi tate mu me müguyi mu mhati müguyite, süri umo la sühmoküshü mhapührei khasü moleo küdipüh kümve bayo?

¹⁷ Süsü bi kümülü ri pü mhatho dileo küsazo.

¹⁸ Vele humi sü, noe kümülü ba, I a mhatho ba, süzi poto. N mhatho sa mono n kümülü tha a kasüte, mu I a mhathoyolü a kümülü thasü n kato.

¹⁹ Jihova püh bazo kütsü no mülüyo, Süsü vezo, thürüküshü zori süsü mülü mu mprü de rüshürüsabayo.

²⁰ No mhalükümo-o, kümülü mhatho sa kümosa kümüchüzo kütsü no sheyi to me ma?

²¹ Ukrü unyü Abraham pü nu Isaac püh rüshübayo khaküsü la pü mhathoyolü pü püh müzi leta mo me?

²² No shebato, kümülü pü mhatho zü kübesüh de mhathi, mu mhatho yolü kümülü ve zhochüküyi zo

²³ Kütholüsi mütsüküva po küsü, Abraham Jihova mülü, sülapü püh matho isite, mu pü cü püh Jihova züo site.

²⁴ No shebato, mipüh-e pü kümülü lübi mole pü mhatho ri sa kütsü la müziyiyo.

²⁵ Süsü bi, Rahab küthapü ri choyimi müsoyi de sümi kütsü püh cho kükreco sü küva la pü müziyi ta mo me?

²⁶ Süsü la u mo ri u ropü sa moleo küsazo, sübi kümülü ri mhatho sa moleo küsazo.