HENREWKO 9 - KETHOLESI KESAO N.T. (BSI)

¹ Süsa jükho kerao zosheri kemesa zhoko yitho kethila cejülü kereshüce bayo.

² Kereshüce therao thipü kemetalü mefibü kemeto mu miz, kepe tsükhrida, cüpü kereshüce ziyo.

³ Füha keyo kenao salü kereshüba süo cüpü kemesatho, siyo.

⁴ Sülü suna lezho, mharükethenyü thüti khu (fü) mu suna pü jütsüjükho bü pükhü metü nyho, suna lekhulü manna (tsükhri) kha mezü, mu Aaron thü pü prari kebao riba, mu miz yo jükho thipü kemetao riba.

⁵ Süo pilü zapozale Cherubim niba phimezhe kesü bahu püba (ukhri), süko tsühi uko püpü po mekre sü hote.

⁶ Tsühi mha hikola thezho thi meta, thevomiko pütü metülü ta kereshüce theralü vo süyo; Jihova zhoko zü mu thitsosü ketola.

⁷ Vele cebü ha kenalü kelü thevo kerekrüo lebi tetse pülü vapü lebi kelü zo, thüza samo de lü yomo, süo khipü rütho thisü pütho pula mu süsa thümako kekri kelako metüla.

⁸ Kemesa Rüpü zasi thaka kha kesü kemesatho chode thipü mesemengo sümo zolu, kereshüce kerao balu tithe;

⁹ Pü hüpi hizi kebathe, süce mhakha kesüko, mu rütho thi kesüko kenani, yitho kethilü pü thipü vetsü vetso mesaketa thisü mozo, ulü kelü umedoko laco.

¹⁰ Themu ketilü, mu hezo kekralü, mu uphe ube metü kemesa, ufüneko meni kemesa ti dolüniko, uthi upho zhoreleko, mha süko thi kedeva kemothe mipo thino mi kemu thipü miyo kesü lebi zolu.

¹¹ Vele Jisu Khrista thevo kerekrüo thide vori ketasa mhakeve vorite, zhoku kereshüce vetsütso ku, thüma be khi thimo, süo kepo ce kengoo mo.

¹² Mori tenyü teko za rimo, vele pütho püza khipü ta kemesa thethilü, urhapü kechothe lü kesü ngoyi.

¹³ Kekrelamori thodo, tenyüza mu tholine kethü nyopha khipü kegüsü mesakemoko yo, mu süko uthi upho sheri thi mesayo mhalize.

¹⁴ Khrista za dithedü süpi tata, pü kechothe Rüpü pütho kha rütho thipü Jihova tsü sü ta lize, kerho kokemo reshü, neko kelü kemedo thopha thophro süte kesa mhathoko metülü, rhü keta Jihova (Jihova) yitho kethilü.

¹⁵ Püco hiola jutsüjükho lü metsulü (thedolü) kethao thite jükho kerao khrolü vajopü sata ketakori rhayi ketola pü sa süve, cükeyiko kechothe kalü popü kemetao ngoyi ketola.

¹⁶ Kekrelamori jükho dipüce khapü meta sheri jükho sülü po kesüo sa moze kesuri ba.

¹⁷ Kekrelamori jutsüjükho süo thümao sa kevasa thipü tsü süyo, sizi molize jükho phra kesüo rhü kebathe jü keku bamo tila.

¹⁸ Jükho kerao thüza sa mode thimo.

¹⁹ Kekrelamori Moses thüma metüko la thezho thopü kemeta püpü lü thüza metho, tenyü za mu jü kegüpü merezü ti thimafü vasü, mu Hyssop (süjü) sükhujü kegüpü lesida vasü mu thüma metüko sheri vasü.

²⁰ Pokesü, “thüza hiohi Jihova jükho pü khapü neko zü phakerhü püthi kesü zhü,” zisü.

²¹ Süpi sheri thüzao kegüpü reshüce mu mhabü khi yitho thi kebako kenani va süyo.

²² Mu mhametüko thezholü thopü kemeta bi thüza khipü thi kemesa süyo, mu thüza samode kejovakeyi bamo.

²³ Süosü tülü mhahüpü zo sheri mhako thi kemesa moze su ta lize tülü zhü kethoko süko ceri rütho vekuti moze suku tazo.

²⁴ Kekrelmori Khrista thethi kemesa ube khipü kethilü talü timo ri, süo ketho hüpüzo tila; vele tülü lü ketho kethilü, tsühi uko metü la Jihova mhüjülü bate.

²⁵ Thevo kerekrüo tetse metsü thüza khipü kemesa thethilü talüyo, vele Khrista tsü kenu pütho pü khipü rütho thisü zo baho.

²⁶ Kekrelamori pü cejü thikeyi culü tsükenu pü kemezhe moze su tato, vele tsühi cejü valalü vapü cejü mhüngolü kephoma thi medi sü keto la pütho püpü reshü thi süte.

²⁷ Thüma po vapü sa süto, vele süsalü sheco thito (püshe ketito).

²⁸ Süla Khrista kephoma kekro khipü de pü khipü rütho thisü, mu pekeyiko pü vakena sala vori tice kephoma samo de kelakeyi ngoyito.