HENREWKO 7 - KETHOLESI KESAO N.T. (BSI)

¹ Kekrelamori Melchizedec Salem lü kede hio Therü kerekrüthoo thevo (mvo) tila, Abraham kedeko dokhri vade sala vori kezüce püzü kesü mu reliphri putsü.

² Abraham sheri pümha püzhü zakerizapü khipü putsü sü, püzaco thera po kesü, “kemezi kedeo” mu sü salü “Salem kedeo,” süosü kezükeve kedeo;

³ Püpo di, püzu di, pü hükeye kevori shuye ri bamo, pü mehü kesü shudü bamo mu pü kehü thela ri di; vele pü thipü Therü kezhoo Nu thisü, thevo thesüta ketola.

⁴ Tsühi thüma hio didü zhoshi lüsüphi, ukrü utsüpumi Abraham tho zori mhava keyiko zakeri zapü khi pütsü.

⁵ Levi nunuko sheri sizi ta kethozo, uko thevo mereko ngo mu thita, thezholü jüko khapü kemeta, zakeri zapü thümako celü khiyi, süosü usazüjürako celü, süko Abraham valü prari tiko.

⁶ Vele püshuye phrimo ri Abraham celü zakeri zapü khiyi, reshupü kemeta zalü jopü tsüsü.

⁷ Mhakehopü lüri kepide ta kemo jü, thejo pü mitsü kesüo thejo pükeyio ce zhoku, veku. (Act. 20: 35)

⁸ Hice lize zakeri zapü uko celü pükeyio satamode rhütazo ziti zhopo ba.

⁹ I posasüyi velize, Levi zosheri keri zapü khiyi, Abraham zakeri zapü khakesü bi.

¹⁰ Kekrelamori pü püpo valü balutice, Melchizedec püzü khasü.

¹¹ Mhace Levimiko thevo kethizhoko vetsütso mesazo lize, kekrelamori thümako thezho süo khrolü mhangoyi yo tila, dipüla thevo kekrepü Melchizedec zho biti vori moze suta, mu Aaron zhorele lü meji kemo, thimosuta süse?

¹² Kekrelamori thevo merebü sheri kedetayo, thezho sheri thi kede moze kesu ne.

¹³ Mhahiko popü kemeta shuye kekrepü pometa, shuye süo mipüri reshü bayo ku mozolu.

¹⁴ Kekrelamori süo setüküyi uko Niepoo Judah shuyelü hü vori, shuye süo la Moses thevo mhathola mhapüri posümo.

¹⁵ Süpi sheri semeku keyi kekrelamori thevo kekrepü Melchizedec zhorele biti tapra ri keto popü meta.

¹⁶ Pü thikesü, uthiupho zhorelelü kemo jükha kesüko, vele keku pü thela kedi kerhü.

¹⁷ Süo ju hibi popü meta; “no thevo mipü Melchizedec zhorele biti lü kechothe tato.”

¹⁸ Kekrelamori jü khakesü himhüjü ketao khisa mote süo thathi te, meve mo ketala.

¹⁹ Thezho mhapüri thi meve tsütso sü yomo, vele veku keto kemeri khipü vori yo; süo yolü u süsa püvo Jihova (Jihova) menosü.

²⁰ Süsübi pü thipü thevo thikesü reshu jü samo de püthi sümo;

²¹ Kekrelamori thevo kekreko reshu sa mode thevo thi, vele thevo hio no reshulü thi, jü pula popü kemeta, “Niepoo reshu sü mu pülü rede taho,” No kechothe thevo Melchizedec zhorele biti lü.

²² Hibi tilü Jisu thipü (jamin) thepü püyite jutsüjükho veku tiola.

²³ Thevo kekro tazo ketho kekrelamori kesapo uko mediva va ketala.

²⁴ Vele thüma hio kechothe tasü tazo, thevo mhatho redereleyo kemola.

²⁵ Süyono pü mi kelayi veba keta kekhotholü ketako zori püza khi Jihova ce vori keyiko, pü kechothe rhü keta bi ukola pü mezhemelo sü ba ketala.

²⁶ Kekrelamori pü thevo kerükrüthoo uko thita pü mesa, mi methi menimo, püthimerho vamo, kephomako ceri kreku, mu tülü ceri rekrüku.

²⁷ Thevo kekreko tüsonha rütho khasüyo, therao pütho pü kephoma kola, mu süsalü thümako kephomala; pü süko bi tamo tüsonha rütho khi mori vete, kekrelamori pü vapü thi süve mu pütho püpho khasü te.

²⁸ Kekrelamori thümako thipü thevo kerekrü thi kesüko thathi, vele jü khakesü reshujü süo thezholü Nuo thisü; pü thikemesa pü kechothelü süve.