HENREWKO 6 - KETHOLESI KESAO N.T. (BSI)

¹ Süla Khrista ju shudü jüko khapü meta de vetsütso keto lü metoyi khe, kesa mhatho shudüjü thelü redekeyi laco zota mode kemelü Jihova ceco va keyi lü metoyi khe.

² Jülokepü zho, ubechopü mila kechokethi, kesalü rhüla kesü, mu kechothe la usheco thi keto.

³ Mha hiko thizoto, mhace Jihova pü medo tisa.

⁴ Kekrelamori vapü humi kevelü tava mu tülü zhüko metha ri va, mu Kemesa Rüpü phremi ri thi tato;

⁵ Jihova jü keve methava, mu hisa vori keto cejü kekuko ri methava,

⁶ Mhace uko tsüsa sala keto, Jihova Nu gu sala ukoyo thi süte, side püpü thengalü sü sala bate.

⁷ Kekrelamori türüpü cejülü kesüce cejü jü süo krayi, side nhapo thü prari, khakesü tirü süo bi, uko Jihova thejo ngoyi.

⁸ Vele tsahu mu hushi hü kesüriko khavayo, süko reshu meno bate, pü thelalü melü thü keva zo.

⁹ Vele ukekhrümiko, neko süce vekuti seba keta ha melü tüpü bazo, kelakeyi sade po keba hibiti po bazo sheri.

¹⁰ Kekrelamori Jihova mezi motalhozo ne kekhrü mhatho thi kesüko rekramo taho, neko pü zalü thi kesüko, neko kemesakoyo thi kesü mu yithothi kesüko.

¹¹ Mu ha kemenyü neko kehopü pü sheri sürhü sürho de ne kemeri tavo thelatso keyilü tüpü bazo tho.

¹² Neko metsüta hite, vele kemelülü sügüsühe pü reshupü kemeta jüo kalü la mhathi ketako süko sajimi thi yite.

¹³ Kekrelamori Jihova reshujü thipü Abraham cesü, kekrelamori puce zhokuti ba samo, pütho reshu pü püyo sü.

¹⁴ Pü pokesü, I thejo kha n yo sü ketho zoto, mu thimekro kesü n mehü mekro süto.

¹⁵ Mu sübi, pü sügüsühe de gü keyila pü thejo süo ngoyi.

¹⁶ Kekrelamori thüma lize reshu thipü upi kezho mice süyo, mu reshu thi kesü ketükesoti basamo tade thela thiva yo.

¹⁷ Süsü bi Jihova sheri pü medolü kalü khasütsü keto pü mharhü rederele kemo reshu pü thi kemetü süzo.

¹⁸ Rede kemo mha kena sü Jihova meda yo kemo, upono süo melütüpü ulüluba keto, ukemeri püyo rezhüyi leo mu u mhüjülü khakesüo thezü kemetüyi ketola.

¹⁹ Kemeri süo u kerhüro fükela ba, kethozo ba kemetü zoto siti kenani mu süo füha salü kemesatho thethilü lute.

²⁰ Umhüjü ukola talü ketao, süo Jisu zo, thevo kerekrüo kechothe Melchizedec zhorele biti.