HENREWKO 4 - KETHOLESI KESAO N.T. (BSI)

¹ Süla uko mülüyi tokhe, kemosa jüpopü utsü kemeta pü kerelü thethilü lüyi mota ze su, kehopüri ne süo tsoyi mota ze suho.

² Kekrelamori uko ce jüyikeve zhopo uko thisüve, uko ce po kesü bi; vele zhopo uko la meveyi mote, kemelü khipü reni keyi meveyi mo ketala kemelü khi renyi mote.

³ Uko pü melü ketako pü kerelü thethilü lute pü hibi posü, “I alüdalü reshu sü, mhace uko a kerelü lü lüri hote; mhathoko cejü meju lü thitso metava sheri.”

⁴ Kekrelamori pü thethi kekre puce pola kesü zho thüna nha pü mhathoko yo relüyi.

⁵ Mu thethi hice posa kesü, “mhace uko a kerelü lü talüri ze.”

⁶ Ngokeyi, süla humi talü to, sülü, mu humi talü mote, melü kemola. Zhopo thisü zori.

⁷ Süsa sheri tüsozho che sala sü David yo po kesü, “tha pütü kecho salü, posakesü, ‘tha’, neko mhace melüyi to lize, püfü se kesüce ne melü khri mu rüta hite.”

⁸ Kekrelamori mhace Joshua kerelü pü uko tsüsü lize, süsa pü tüsozho kekrepü posü moto me.

⁹ Sülü Jihova thümako la kerelü thethi püba.

¹⁰ Kekrelamori pü pü kerelü thethilü lü tice, pü pü mhathoko lü relüto, Jihova sheri pü mhathoko lü relü ketabi.

¹¹ Süla uko kerelü thethilü lüyi ketola mhatho thisü khe, sizi kemosa thüma humi melü kemoko thajü thipü mipo se mu ngo ketako bi retu ta ketola.

¹² Kekrelamori Niepo Jihova jü rhü mu rekri züte, keku kene, mu zecho yi keve ceri veku, u kerhüro mu u rüpü zükhro kekre süyo, u kerüko mu ukelü urolü kebako, ukelü medoko mu u thitole medo kebako metü zükhro kekre süde seyi tayo.

¹³ Mori kerhü khonu pü mhüjülü mese mengo sü kemo püri di, vele mhametüko pümhü ce methu mu keva küyi bamo, uko sheri pü mhüjülü baphrü zo.

¹⁴ Ngo keba uko la thevo kerekrü püba, pü tükolü tayo, Jisu Jihova Nu, uko zho rele (kemelü) khi kemetüpü tazo khe.

¹⁵ Kekrelamori u thathi kebace uphimezheyi keho Thevo kezhoo la mori, vele püco metülü uko bi zode dophi pü kedozo, siri pü kephoma thimo.

¹⁶ Süla uko thepu shu zode ngokemezhe kedebalü ta vokhe, side uko phikemezhe ngoyi ketola, mu utsakhulü ngokemezhe pü kekhrühi süo ngoyi ketola.