HENREWKO 13 - KETHOLESI KESAO N.T. (BSI)

¹ Sazüjüra kekhrü po bazote.

² Reso sekemo thüma kemeso rekramota hite, sizi kesülü humi lüba kemolü tüyo choyimi sheri mesoyiyo.

³ Keropü ropü ketako (thejümi) rekrasüte, uko züde neko sheri pha mu ropü ketabi süte, kemetsulü kemezhe ketako zü nekori kemezhe süte neko sheri tepho pü lü bazoti la.

⁴ Kesükeritisü metü la therho püzo, thezi merho kemo, vele thethenu kemeho mu kekhrükezü ketako Jihova mejo motaho.

⁵ Neko mhakepo keti kolü kemeho kemenyü sahi zote, mu ne kedipü ba sheri süko khi ne thevü thita te, kekrelamori püpo kesü, “I neko khavaho mori rekramo taho,” sizi sü.

⁶ Süla uthepu shude poyive, “Niepoo sü a kekhrühio zo, mu thüma dipü thipü ayo süto sheri I mpe mo.”

⁷ Neko pi kekha yotiko rekra sala süte, Jihova jü khi nekoce po kesü miko; uko kepo zho dipü bi vorito sheri uko kemelü sameji yite.

⁸ Jisu Khrista, ndo sheri, tha sheri mu kechothe kemhazo.

⁹ Thezho ketekhri mu kekrekre tipo uhüpü tata hite, süo sü kekrelamori kekhrü ungokeyi khipü uthi kethepu ketü süyo; ketikekra lümo, süopo umeni dapü tari meveyi yomo tila.

¹⁰ U kereshüba püba, miz yo yitho thi kesü thethilü mha keti mezi püri di.

¹¹ Kekrelamori khonu süko thi upho yo thüza thevo kerekrüo kephoma la kereshü salaco chozulü khipü methü süyo.

¹² Sübi Jisu sheri pütho püza khapü kharü sa chozu laco kemezhesü.

¹³ Uko süla chozu laco ta puce vokhe, thothü thethi sa kharü salaco, püzhoshu kesüko khipü yide.

¹⁴ Ekrelamori hice uko nadelü tasü keto bamo, vele hisa vori ketopü phuzü.

¹⁵ Jisu Püyo rütho thechu thisü pü Jihova tsü sü khe, umülü se kethezü kha püza chu süto khe.

¹⁶ Vele mhakeve kethi mu mhapü mizü keza tiko rekramo ta hite, kekrelamori rütho süko Jihova pü nüzo tila.

¹⁷ N pi kekha timiko jüzü thite, mu süko khrikhro tate, süko n kerhüro pe (meza) tayo tila, uko mhatho hisa posü to, ukopo ulüsu mode thite, unüde thisüte; kekrelamori ulüsude thito lize nekola kemeve di tato.

¹⁸ Hako lari kechothi süte, ha kelüce halü mezi tazo, mhametülü jütho keta ha medozo.

¹⁹ Vele I nekopo thikenyü apo meze la nekoce vori keto thisü te.

²⁰ Tsühi Jihova ngokemezhe Niepo Jisu sülü khakesü teko kefü kezhoo, jükho thi kesü zalü kecho thela.

²¹ Mhatho kehopü lü sheri nethi meve tsütso kesü, pümhüjülü pünü keti nezü mhatho thi tate, Jisu Khrista yolü zapozale kechothe ta keyi thite, Amen.

²² Azüneko I nekoce po kenyü kemezhe zori hunehu tahitarho zote, kekrelamori I lesitho nekoce kesü kedopü lebizo;

²³ Usazüo Timothy hesü keva neko se batetho mhace I ta nekoce vori lize püzü vorito mezelü neko zü kesü tato.

²⁴ Neko pi kekha kebako salam khatsüsü züho, mu kemesamiko metü tsü sasü ho. Italy lü kebako neko kelu süzüho.

²⁵ Ngokemezhe kekhrüpo neko metü yo bayite. Amen.