HENREWKO 10 - KETHOLESI KESAO N.T. (BSI)

¹ Thezho hisa mhakeve vori keto khripü ba, pühü tüo zomo, tetse metsü rüthoko thisü kevorio hisa vori ketoo hü thatü sümo.

² Kekrelamori reshü khakesü hi lata su; kekrelamori reshümiko uko kephomako khrü kemesa tsova lize kephoma rekramo tato veli.

³ Vele rütho kethi metsü uko kephomako tetse metsü rekra sü tazo.

⁴ Kekrelamori thodo mu tenyü za kephoma thimedi vaho tila.

⁵ Süola pü cejülü kevorice poti, rütho mu mhakha kesü no nmedo mote, vele no athi apho khapü atsü.

⁶ Kethü reshü mu rüthoko kephomala thi kesü no nnüyi mote.

⁷ Süce I pokesü, “hihe, ‘I tavorite’ (lesida kekrolü aju thopü meta) n nü n medo thisü ketola, O Jihova!”

⁸ Süpi posa kesü, rütho, mhakha kesü, kethüreshü, mu kephomala mhakha kesüko no nmedo mote, nkenü sükolü dite; thezholü reshü kethiko.

⁹ Süce püpo kesü, “hihe, I n medo thi ketola tavori te, O Jihova” pü kerao khi düva, mu kenao thisü ketola.

¹⁰ Mhathi kemesa kesü mhatho hilü Jisu Khrista püthi püpho khipü rütho thisü vapü pütü hisa laco vori keto metü la sheri.

¹¹ Thevoko kehopü ri tüsonha reshü thi keba mhatho kethisa thisala bayo, süo kephoma khiva yomo.

¹² Vele thüma hio rütho pü thi kevasa kechothe la thi süte side pü Jihova valaco bate.

¹³ Hibi ketala pü ngomuko khi pü phezho thiva keto meri bate.

¹⁴ Rüthopü thi kesüla kechothe uko thi kemeve.

¹⁵ Sübi Kemesa Rüpü sheri uko ce zhopo thisü te, pü süsalü posa kesü;

¹⁶ Tüsozho vo ketako salü I jütsüjükho thisü ketoo sü hiohi zo, Niepoo po süte, I athezhoko kha uko melülü süto mu uko kelülü I lesitho süto.

¹⁷ Uko kephomako mu kejokemuko I rekra samo tato.

¹⁸ Tsühi kejo keva sü hiohi zo, kephoma la rütho kethi basa mote.

¹⁹ Azüneko, usüla Jisu za khipü thepu de kemesatho thethilü talü yo.

²⁰ Pü uthi kemesa sü kevala kehü kesa cholü fü hapü yo kemeta süo püthi püpho.

²¹ Jihova celü u thevo kerekrü pü bate.

²² Umelü kethothi ukemelü thi kemetüpü pü meno voyi khe; ukelü mesakemoko püza kegü vasü, mu uthi upho jülü khrükemesa va de;

²³ Uko kemelü regü reve ta hide uphra kesüo lü thishu thitha zo tokhe, (püphra kesü jü melü shüzo tila).

²⁴ Mu süla kekhrülü hunehu hü mu hunehu rele medode mhatho keveko thiyi to khe.

²⁵ Uko tavo kengu kehu tiko lüpü mhatho kemo thiva hi, humi tho sübi tazo sheri, vele hunehu tahitarho, pütü umenoku ta kezüla u süko thiba zokhe.

²⁶ Kekrelamori mhace umhaseketho ngoyi ketasa utho kenyülü kephoma thita lize süsa kephoma rütho thi keto basa mote.

²⁷ Vele kemere thizo küto sheco melü kemetsumiko thüva keto zote.

²⁸ Thüma Moses thezho khakesü kemetsüko phikemezhe bamo, mi kena mori misü zhopo kha kesülü dokhri vayo.

²⁹ Sazho dithedü rükuti somi Jihova Nu kedüda kesüko yo süta, thüzalü jükho thi keyiko, sülü pü thi kemesayi kesüo pü mha mesakemo püthi ketasa, mu Kemesa Rüpü kelakeyi kekhrü khakesüo khipü mhatho kemopü thi kevasa?

³⁰ Kekrelamori uko püse bate, pokesü, khüpo sü azhü, I thipü tsüsüto, Niepoo poyo; süsa sheri Niepoo po kesü pü thümako sheco thito.

³¹ Süosü mha kempe shupü zo rhüketa Jihova belü lü ketosü.

³² Vele ne rekra sala süte, hijü tülü neko thi metovesü neko kemethi kekro zü ketü vori.

³³ Huce mipo neko pe keti mhapü thi, ne meshu, ne methimeni, humi mipo u methi kesüko sheri zü kemekro püthi tayo.

³⁴ Kekrelamori neko angomezhe ayo kekhrü khasü keropü apha aropü ketalü, mu ne mhakha aketesü (mhavapü atsü) neko tülü süce vekuti seba, mu mha sülü kebako kechothe ta sü keto.

³⁵ Süla ne kemeri süo kelhu va hite, mhakha neko zhokhro shula sü keto kezho ba tila.

³⁶ Neko sügüsüheti ba moze su, ne Jihova medo thi kesü salü, neko kalü jü popü neko tsüpü kemeta ngoyi ketola.

³⁷ Kekrelamori pütü kedopü salü pü vori tole kebao vori zoto, mu menu taho.

³⁸ Tsühi kemelü la kemethomi rhüyi zoto, vele mhace thüma humi tsüsata lize, akerhüro thüma süo la anümo tato.

³⁹ Vele uko thüma size timi mo, tsüsa tade medi kevapü thita mo, vele kemelü kenemi ukerhüro ri kelayi ketomi zo.