Galatiamiko 4 - KETHOLESI KESAO N.T. (BSI)

¹ Tsühi a kepo, kalüo zo sheri pü natsi kebathe micetami zü kekremo, pü tho metüpi Niepo thi bazori.

² Vele pü kemetha mu püpi kekhati püpo keda metayo.

³ Uko sheri sübizo, uko natsi kebece, cejülü zho cebi uko phapü tazo (kemelümiko thezholü rhayi keta).

⁴ Vele pütü tsovori ketasa, Jihova pü Nuo ketsüsü, thenomipü yo pü thisü, thezholü pü thiyi.

⁵ Thezho khro ketako rhayi ketola, side upo pü nutho thita ketola.

⁶ Mu neko nutho thi ketala Jihova pü Rüpü ketsü (pü nu Rüpü) pü umelü lü sü, side pü kra “Abba, Apo” siba.

⁷ Süla neko cetami mote vele nutho nu thi te, mu mhace pünu thita lize pü kalümi sheri thite Khrista yo lüno.

⁸ Sisheri neko Jihova se kemoce neko Therü kemoko choyi thita.

⁹ Vele tsühi, neko Jihova seyi te, mori Jihova neko se bate, dipü bide neko regü sala vo khrü ketimi kethathi zhokereyilü vo tata, sülü neko thejü kethi kemenyü lü vo sala ta tome?

¹⁰ Neko tüsozhoko, tekhriko mu pütüko, mu tetseko phi bayo,

¹¹ I neko methi (mpe) ba tele, molize I mhatho thipü neko yo kesü kemethu thita ketola.

¹² Asazüjürako, I neko ce choyo, “abiyite” kekrelamori I sheri neko bizo tila, neko areza sümo

¹³ Neko seba I therace kukemolü (kethathilü) I jüyikeve zhopo thi neko ce vori.

¹⁴ Ala medo kephi sü upho uthi neko mela va kemo, mori lümo tamo, vele akhipü tüyo jüyimi pü bi, Jihova celü kevori, Khrista Jisu celü. (Galatiami thezho kezülü thejo medi keva).

¹⁵ Süsa neko kedipü thejo poba? I neko jüko seba, neko mhace thiyi vetolize, netho nemhüko sheri celapü atsü va keto thizo;

¹⁶ I neko ce jütho kepola neko akhipü ne ngomuni thita mome?

¹⁷ Uko ne thipü neko hüshüsü, vele vetamo, ile, uko neko saphri mote, ne ukoyo mhathi sü ketala.

¹⁸ Vele mhakevelü ulü hü tive pütü metülü, mu I neko züba tice lebi mo (thezho mu ngokemezhe ni kezü tayomo).

¹⁹ A nune keniko, I thenomi nunu vathi thide Khrista neko lülü hüyi kemothe.

²⁰ I tsühi neko zü keba menyü zole, mu afü redesü, kekrelamori I neko melü tüyi kemola.

²¹ Ace posüte, neko thezho khro ta kenyüko, neko thezho reni sü mo teme?

²² Thopü kemeta, Abraham pünu kenane, mipü thezhokhro keta nu mu kekre ukekha diti nu.

²³ Vele thezhokhro ketao nu uthiupho zholü nu; vele kekhakedi thenopü nu jü popü kemetalü.

²⁴ Süosü jüpü kemede kesü, mha hinihi jükho kena, püo lize Sinai cejütu yo Agar yo hü keyi thezho khro ketapü.

²⁵ Agar sü Sinai tuyo Arabia lü, mu Jerusalem lü fükho tsühi thi kesü mu pü nune zü thejü thi keta pü.

²⁶ Vele Jerusalem lü kebao upi, süo ukekha kedi, süpü uko metü zu.

²⁷ Süo thopü kemeta, Rechü süte, no nudipü thopha prari te, no menu vathi thi kemopü, krasüte, methu ketapü pünu kekro menu süte, pünopu pü kebace kro ku te.

²⁸ Tsühi uko sazüjüra kethiko Isaac celü kevori nuko, jüphrapü kemetalü.

²⁹ Vele uthi upho medolü menu keyi nuneko tsühi Rüpülü nuko methi meni kebako.

³⁰ Sizo sheri thopü kemeta dipü biba? Thenopü mu pünu thezhokhro ketani hu meta ve, thezhokhro ketapü mu pünuni po ukekha kedi pü mu pünuni kalü thiho.

³¹ Süla tsühi, azüneko, uko thezhokhro ketapü nuneko mote, vele ukekha kedipü nu te.