Galatiamiko 1 - KETHOLESI KESAO N.T. (BSI)

Kelu kesü

¹ Paul apostle mipü, thüma celü mo, vele Jisu Khrista mu Poo Jihova celü, püthi merhü kesüo.

² Uko sazüjürako azü kebako, thopü Galatiamiko ce kesü.

³ Phikezhe kekhrü po neko yo ba keyi thite, mu thelü kenü Jihova ukopo celü kevori mu u Niepo Jisu Khrista celü kevori.

⁴ Uko kephomako la pü khapü utsüsü, side tsüdo cejülü mha kesuko lü uphuyi ketola, Jihova mharhülü mu uko Poo zalü.

⁵ Püpo kechothe zapozale thiyite; Amen (jüpo mu lesi ketholü).

⁶ Ango zo, (umahü) neko rekri (dithemolü) Khrista phikemezhe kekhrü jüyi kevelü neko cükeyilü rede keta.

⁷ Süosü thüma kekremi mo, vele humi neko kebü kesü Khrista jüyikeve thipü kebü kesü.

⁸ Vele hako sheri, mori tüyo jüyi mitho tülü kiri zo sheri, jüyikeve hako zhopo thiketa mode kekre zhopo thita lize püpo reshu kepüo thitate.

⁹ Himhüjü hako poketa bi, mu tsühi sheri I pokesü bi, mhace thüma humi zhopo kekre potayo lize hako ngokeyi jüyikeve kemopü, poyo lize püpo reshu kepüo thite.

Paul zhopo jüyikeve rüpülü kehala kesü, thüma zhorele lü kemo

¹⁰ I thüma nü, tsühi, thinyü de jüpo züme, mori Jihova nü thinyü zü? Mori I thüma medo thi kenyü phu züme? Kekrelamori I thüma nü medo thinyü ta yo lize I Khrista cetami kethi mesümo.

¹¹ Vele I jükeve po keta hio thüma celü vorimo siti I zhopo thi neko cesü yo.

¹² Kekrelamori I süo thüma celü ngoyi mo tila, mori I süo metha sümo, vele Jisu Khrista celü kehala kesüzo.

¹³ Neko thajü Jewmiko mha kepo keti keba sesü te, uko nanifü, dipü bide I Jihova kehu methi meni, thi kesü pi kezü sheri, mu süo vameka süri.

¹⁴ Jewmiko a shuyelü anani kütso meveyi, azü ketü kethedü tiko dülü ukopi thisü; aponeko zho relekolü alü keni mezüri ta ketala.

¹⁵ Vele Jihova pünü pü medo ketace, pü azu nobulü athi süphra mekre mu pü kekhrü kene lü acüyi.

¹⁶ Pünu kehala ace sü, apo therünamiko ce jüyikeve poketola, sizi metha I uthi uza medo zü tamo.

¹⁷ Sizo mori I ta Jerusalem lüri vomo, amhüjü apostle thi ketako celü, vele I ta Arabia lü vo, mu ta sala Damascus lü vori;

¹⁸ Süsa tetse sü (3) sa lü I tavo Peter zü kesü ketola, mu zho keripüngu (15) püzü ba.

¹⁹ Vele I apostle kekreko ngomo, James Niepoo sazüo lebi ngo.

²⁰ Tsühi I lesi thopü neko tsü kesüko, Hihe, Jihova mhüjülü I meda mozo.

²¹ Süsa laco I ta Syria mu Cilicia khüko whivo.

²² Judealü kehuceko se bamo, Khrista lü ta ketako.

²³ Vele uko seti lebi, “thajü uko methi meni ketao tsüdo jüyikeve zhopo thipü pü meka keva kehuko ce süba tele.”

²⁴ Mu uko ala Niepoo zapo zale thisü ta.