EPHESUSMIKO 6 - KETHOLESI KESAO N.T. (BSI)

¹ Mi nuneko Nyepoo zalü ne krüneko dzü zühyi, sizo pü tüzo kütsü na

² Ne po ne zu rhoyi, dzü hio khaküsü dzü küratho-o.

³ Südziyi lizo ne na veto mu ne cedzü lü rhüh choyi to.

⁴ Mu mikrüneko nüko nuneko lü va kürüda hi, veli Nyepoo zalü püko tahitarho mu thükü müzho süyi.

⁵ Cetako nüko thiyolü ne mhu kükhayo küzhoko khritshürüsüsayi mulü püh thide Khrista yolü küta kümha de uko dzüzüh yi.

⁶ Thüma nü thi küto na mi mhüngoce lübi yitho thita mode Khrista cetami thide ne mülü lü u Jihova müdo-o thiyi.

⁷ Nüko thüma yi thi moli Nyepoo yi thi ba kütsü na nüko küsührhüh zode yitho thiyi.

⁸ Midzü küthi-o ri kümoo ri se yite. Thüma mhatho küve thi küsüko mütü Nyepoo celü zhokhro ngoyi zoto.

⁹ Mu mimhu nyepomiko ne cetami küthiküdü zo tahi, kükrenamoli tüyoküba mütüko khrükütü kütsüo nemhu nyepothi küba na.

¹⁰ A kükhrükodzü vala lü, Nyepoo küku mu kümütü lü nüko thüpubayi

¹¹ u Jihova rineko khi püyi side thürü küsuo dorhüko ne mütsuküphece thayi ve küto na.

¹² Uko-e u thi u za züh kümürha moli küzhokoyi, kükukoyi, cedzü hilü küzühlü kütako kükhayo küzhokoyi mu tüyolü küsu ropükoyi zühde kümürhayo küzho na.

¹³ Süna u Jihova rineko khi püyi de tüsozho küsu nha thayi vekütona mu side thazoyi.

¹⁴ Side küthoo süh ne checo phayi, kümathoo püh ne mülü küyoo thiyi.

¹⁵ Küzühküve, dzüyiküve püh ne küsüh küsüo püh ne pheku thiyi.

¹⁶ Mha mütü mhu kümülü giyo khi püyi side kürüdzüo me püh lüce tsaküthiko brühmhüyi küto na.

¹⁷ Mu külaküyi püh ne pirüh thiyi mu ropü zecho süo u Jihova dzüo khi pühyi.

¹⁸ Cho mütü mo de cho dolüni thi mu ropü lü ne müzhe mülo, khwülila mu rhorhü pü de kümüsako nayi choba zoyi.

¹⁹ A nayi choba zoyite side dzü hayi küve püh a prü küto na mu dzüpotoli a ta müku küyi ce thüpu de dzüyiküve küsühkürülüko po püh pükopo seyive küto na.

²⁰ Süyo na a phapüh yitho thi küyi kümha a popo molizo küsuo thüpüde poyi küto na.

²¹ Kükhrü sazüho mu dzüthode Nyepoo yitho thiyoküzho-o Tychicus celü a mhatho mu I di püh thiyo shi kütsü nüko seyi to.

²² Mhatho süyo na a tho pü kütsü püh nüko ce süho, side nüko po hani mhathoko seyi de nüko lü thüpuyi küto na.

²³ Küzühküve po a kükhrüko züh bayi mu kükhrü lü kümülü u Jihova Poo mu Nyepo Jisu Khrista celü küvo-o po nüko züh bayi,

²⁴ Ngokümüzhe po kütho thide u Nyepo Jisu Khrista khrüyo küzhoko züh bayi te. Amen.