EPHESUSMIKO 3 - KETHOLESI KESAO N.T. (BSI)

¹ I Paul nüko Judakümoko zhozhü külü na Jisu Khrista dzu thi tate.

² Mhanu nükoyi u Jihova ngokümüzhe lü nüko khapüh a mülü küvaseyi lizo.

³ Püe kümükhrü kümüva dzüko püh a müse müngo süde I-e küdzütholü thopüh nüko prü küvako.

⁴ Nüko süko phide a mhasee Khrista celü dzü kümüsühkozo kütsü seyito.

⁵ Süo vapüh thüma nuko po seyi mote. Veli Ropü lüno külha püh pükümüsa Apostelko mu sadzuküseko mhüngo thisüte.

⁶ Mha süo Judakümoko pori pü kalüko thidemopüh thi mu Khrista dzüyiküve lüno po püh kümüta koyi zhürhüh thite.

⁷ u Jihova ngokümüzhe kha a prü süde pü küku küsührhü kütsümhatho na I ri püyithomi thiyi.

⁸ I-e kümüsako dolü kütsüo ceyi tsüku kütsüyo, ngokümüzhe lü khapüha küprü Khrista celü phuphayi külho ceneko püh Judakümoko ce zhopothi küto na.

⁹ Thüma mütüko po u Jihova mhamütü thi küsüyo küra thoce cedzü-o mhüdzülü küvapüh kütako Jisu Khrista yolü jü kümüsühko ngoyi.

¹⁰ Side tsü tüyolü mhakükhayo küzhoko mu kükuko po kühu yolü Jihova doküve lünyiko seyi kütona.

¹¹ A Nyepoo Jisu Khrista yolü küchothe pü mharhü püh kütako thitsüküsü zo.

¹² Süyo na uko pü kümülü lü u küthüpu neyi mu püzühde küse küyi zo.

¹³ Süna I nüko po zapozale thiyi küto na kümüzhe kübako lüpüh nükolü thathi tahi noyo.

¹⁴ Mha süo na u Nyepoo Jisu Khrista Niepo mhüdzülü chietü pü de.

¹⁵ Pü yolü tüyo mu cedzülüri thüye zatho mütü thoyi.

¹⁶ Pü po pü zapozale küthi cene kopüh nüko prü, pü Ropü po küku khanüko lhülü mao thi mükusü küto na.

¹⁷ Side kümülü lü Khrista po nüko mülülü bayi mu nüko me pokralü pükükhrülü bayi kütona.

¹⁸ Mu pü kümüsako mütü zühde pü küzho, kücho, kümüsüh mu kürükrüseyi ve küto na.

¹⁹ Khrista kükhrü se küyi na mhase ngoyi de u Jihova celü u küswukülhu thiyite.

²⁰ Tsüo pü küku uko yolü mhathi kütao züh uko cho mu lüyi külho mhu uko thi müne mükro phi süte.

²¹ Khrista Jisu zalü zapozale küthi-o po tüpho mütü mu cedzü külakütso pü kühulü bayi. Amen.