CORINTHMIKO KÜRAO 9 - KETHOLESI KESAO N.T. (BSI)

Paul kepo, pü apostle mipü zo

¹ I apostle mome? I hekevami moteme? I uko Niepo Jisu Khrista ngo sü mome? Nekohi Niepoo zalü amhatho mome?

² Mhace I mi kekre mila I apostle mota sheri, nekola I apostle zo; kekrelamori I apostle zo tisü mohor a yo vü keyi Niepoo la nekoyo.

³ I kelakesüfü ukofükho kesü, a pe adojü kebako la hiohi.

⁴ Ha mhati mhakra keti keku di teme?

⁵ Hako ulipü neko ucemi chotha züta ti thiyi su teme, apostle kekreko bi, u sazü jürako neko Niepoo yo baketako bi mu Cephas (neko bi).

⁶ Mori I mu Barnaba hani lebi, mhatho thiyi su bateme? (Somi jüyikeve methayo sheri jüyikeve lü hü mozesu).

⁷ Somi therilü lavo sheri pütho pü medolü tavo yome? Mori humi khubü yi te pü meta de püse timo keba bame? Mori metho meri de pü nojü krakemo ba me?

⁸ Mha hiko kepo I thüma zholü po bame? Mori thezholü süko pomo zome?

⁹ Kekrelamori Moses lesida lü thopü kemeta, no thodo zü teha ni kebace püta phava hite, Jihova thodoko kekhrüla posüme?

¹⁰ Mori pü ukola mhaposü mome? Kekrelamori uko lazo, sejo mozo; uko la thosüzo; süla tefü (yite) he ketiko ukemeri kebala thi ba, mu niyo tiko sheri ukemeri kebala teha ni bayo.

¹¹ Mhace hako rüpü tsava thi nekoyo sü neko thi upho zhüko rü sala keyi süo mhakezhome?

¹² Mhace kekremi keku hilü nekoyo keku bata lize, hako süko ceri kukuti mesüzo. Sizo sheri hako nekoyo sizi yomo (keku süo khi yomo). Vele mha metülü kemezhe tazo, kemosa jüyi keveo Khrista chokha thiva su tila.

¹³ Neko semo teme, kemesa choyi kethi mi kereshücelü mhakemesalü hü moze kesu? Mu reshü bayo kezü mhathi kebako sheri sübizo mome?

¹⁴ Niepoo mhatholü jüyikeve po ketola kenhü keyiko jüyi kevelü hüti mesü zo.

¹⁵ Vele I mha süko püri khitamo, mori mhahiko püri I tho sümo; nekopo thipü ayo süno ziti, kekrelamori ala zono kesa veku, thüma kehopü sheri azapozale khipü kemethu thiva keti ce sheri.

¹⁶ Kekrelamori I jüyikeve zhopo thita sheri I mhapü lari zapozale thita mozo, moze kesu khapü ayo sü kevala, ile, I jüyikeve zhopo thimo ketosa, kesukerho ayo!

¹⁷ Kekrelamori I mhace anü amedolü mha hio thita lize, azhokhro ngoyi to; vele mhace anü amedo metsu de thiyo lize jüyikeve keza kesülü kha amesülü sü kevala.

¹⁸ Kedipü azhokhro ba? Kethozo, I jüyikeve kepoce mikethu kesü püma thipü atsü no ziyomo, side jüyikeve keku I kebü vamo ketola.

Yi tholü zhokhro mu mhatho zho ketho

¹⁹ Kekrelamori thüma metü celü akekha püri bamozo sheri I athipü metüko thekümi thi tazo, sizi lize pra meve sayi ketola.

²⁰ Jewsmiko ce I Jewsmi thi yo, side Jewmiko züpü vori ketola; uko thezhoo khrikhro ketako zü de thezhoo khrota, side thezho kezümi püzü vori ketola;

²¹ Thezho kediko zü ketace thezho kedimi bi, (Jihova zhoko kedimi) Khrista zhozü; side thezho kedimi zü vori ketola.

²² Kethathimi zü ketace I sheri kethathiko bi, side uko zü vori ketola; athipü thüma kehopü sheri bisü, sizi keyilü humi kelayiketola.

²³ I mhatho hibi thiyo züyi keve lano, sizi keyilü I sheri neko züde zhürhü thite.

²⁴ Neko semo zome, takemerha tilü metü tasü zori mipü lebi vekeyi zhokhro ngoyi yo? Süla neko tasüte, süo ngoyi ketola.

²⁵ Thüma kehopüri thehe kethilü u kethükerü moze su, mha metülü tsüdo uko thi kebao kata keto dopülebi la kedepira süo phu tayo, vele uko suta keho kedepira la.

²⁶ I süla ta kemerha tazo, setü kemozhü lamo, I süo merha tazo, humi tükhra zü kevü tayo, vele I süko bi tamo.

²⁷ Vele I athi apho kekhapü akhro süyi, sizi kemosa I mice jüyikeve posü süce mipo a hu kedü kevami thita mo ketola.