CORINTHMIKO KÜRAO 5 - KETHOLESI KESAO N.T. (BSI)

¹ Mimetü kepo keba neko dolü kekhrükezü ti batele ziba, Gentile miko dolü zori theza sübiti bazoyo kemo, humi upone cemi züba keta.

² Neko kemeko ulü kerekrü bate, ulü su ulü kemezhe mori, mha sübi thita ketako neko dolü khivate.

³ Kekrelamori athi apho zono neko züba mota kethozo, vele rüpülü neko zü bazo, neko mezi mu mezi kemo mese süte, I neko züba tibi, somi mhatho hibiti thiba sheri.

⁴ Uko Niepo Jisu Khristaa zalü neko tavo kengu keyice, a rüpü uko Niepoo Jisu Khristaa kekulü neko züba.

⁵ Thüma sümi khapü Satan belü sü vate, püthi püpho mekava ketola, side pü rüpü Niepo Jisu tüso zhonha kelayi ketola.

⁶ Ntho nthipü zapozale thizo keba vemo, Khre kedopüla photü po khrü keta seba mo zome?

⁷ Süla khre kevüo huphra vate, sizi lize neko khre kesa thita ketola; neko khre kevüpo neko merho va kemoko. Kekrelamori Khrista khipü ukola ta kepra nyelü rütho thi süte.

⁸ Süla uko thenye nye tokhe, khre kevüo mori, mori hunehu meshu kemo, keretse kethi mo, vele khre khasü kemo tsükhri, kesürhü mu ketho.

⁹ I lesithopü neko tsü kesülü nekopo kerezhü miko zü kemekro hino süzo.

¹⁰ Sizizotamo, metükolü, cejülü kerezhümiko, mha kemeho miko, mizhü süketimiko, marhe kereshü miko, kekrelamori sizi talize neko cejüo khava tata moze su tato,

¹¹ Vele tsühi I lesi tho kesü, süko zü kemekro hite, mhace cüpü sazüjüra thiyi keta humi regürezhüta, mhakemeho mi thita, mori marhe reshüta, mizü kezheta, mori hezo kra mezüta, mori mizhü kesü tita, sümi züde mhati mhakra hite.

¹² Kekrelamori I chozu keta süko zü dipü thita? Neko ukrolü kebako sheco thi motame?

¹³ Vele Jihova sekemoko zori sheco thi bayo, Süla neko dolü thüma kesuko khipü düvate.