CORINTHMIKO KÜNAO 9 - KETHOLESI KESAO N.T. (BSI)

¹ A po kümüsako kükhrühi ju tho nieko tsü mori ve,

² Nieko sü thi nsa batsü I she ba tsüla, süla I Macedoniami mhüdzülü Achaia nzisa kürüdeyi te sino nieko la kümühayi, mu nieko lünyio la uko mi kükro hüyi;

³ Sizori I uzüko kütsüküsü no ha niela kümüha kütako po dzüchü thita mo kütola: I nieko thiyito le po küsü bi nieko po kürüdeyi kütola,

⁴ Simo tsüsa Macedonia lü humi ha zü vodeno nie kürüdeyi kümo ngoyi ta tsüsa ha münga tato, nie mülükhropü kübalü.

⁵ Süla I lü kütsü uzüko müdzümüra kütsüpüh nieko ciesü no nieko himhüdzü phrapüh kümüta bi nieko kümuthi tsüo mono nie nüsai no khaküsüko kürüdeyi tayo ve küto lü kütsü la.

⁶ Püco no hihi: kühopühri tsava müdo küsüo rüh mütsa to, mu kühopühri tsava münyhü küsüo rüh mükro to.

⁷ Kühopühri ulü u mpe küyi bi khasü moyoshü, ulüsühsayi mori thimoyoshümo sihi, kükrelamole Nyepoo Jihova unüsai no khaküsümi phi unüyo.

⁸ Mu Jihova thüjo kükretsü mütü püh nie kuchuhkühi thisüyive, sino mha kühopühlüri nie küchuhkühikhasüno nie münyhü süo püh mhatho küve thiyito.

⁹ Süo thopüh kümüta, “Pü mha küzapüh lucehice süve, püh küdimiko zave; Pü kümatho küchothe bato.”

¹⁰ Kühopühri tsapüh tsa küvami tsü küsüo mu kütico püh lüva thi küsümi nie cienye mu nie bete, tsa mu mhatho sheri thimükro süto.

¹¹ Nie mphrüshü küsüla mha mütü lü niethi münyesü, mu süla hayo nie Nyepoo kümüza poto.

¹² Kükrelamole yitho hio kümüsako tsakhu vaphi kütsülübi mo no tsole kükremi kükro po küthüzü püh Jihova tsüyo.

¹³ Yitho hio thi dojü küsülü uko Jihova chuhyito nie thi kürünu püh Khrista dzüyiküveo khro süküyi la, mu uyo mu kükremi yori mphrü küsüla.

¹⁴ Uko niela cho kübace nie münyüto, süo Jihova ngokümüzhe rükri zo kütsü küba la.

¹⁵ Jihova müzave pophayi kündi thügüuo la.