CORINTHMIKO KÜNAO 6 - KETHOLESI KESAO N.T. (BSI)

¹ Süla uküzü pü choyimi thi küta bi, niepo Jihova cielü küpa ngokümüzheo khi kümüchü lü hinon niecie poyo.

² Kükrelamole Pü po kütsü “I pütü tüce n khü künyiyi te, mu külaküyi tüsonha n khrühi sü” si mba. Süla pütü küve sü tsüce hizo mo külaküyi tüso sü tsüce hi zo.

³ Ha mipüh chokha ri thiyo mo, mipo ha yitho tha mo küto la,

⁴ Sitsüo mole mha kühopühlüri ha Jihova yitho thiyi küshümi tsü thasüyo, murümu kütsü, kümüthi, kümüzhie kütsü, tsakhu,

⁵ Ha küvü, thüdzüküthi, kübvü kütsü, mhatho küthi, zümo kütsü, tükhü küthi,

⁶ kümüsa kühü, mhashe, sügüsühü, mphrü, Kümüsa Ropü, kükhrü kütho,

⁷ dzütho küpo, mu Jihova küku; kümatho rinyie püh ha zaco mu ha veco,

⁸ thürho mu zhoswü lü, zhopo küve mu zhopo küshü lü, hapüh mi küdo kütsümi thi, vele kedzüthomi zo,

⁹ püh she kümomi thi vele she mveri, püh sa kütami thi vele he rhühbazo, müthimünyi vele müsa va mo;

¹⁰ lüzhe küpümi thi vele hanü süh tayo, mha küdimi thi vele mi kükro thipüh mhanie ve, mhapühri küdimi thi vele mha mütü batsü.

¹¹ Hehe Korinthiako, ha mhotsu niece dzüpoyo ha mülü khakhri müzho püh.

¹² Halü niela tsakhu mo vele nietho nielü thi tsakhu ve.

¹³ Süla no I nieko ce küpo bi niepo nie thi müyoyi noyo.

¹⁴ Mülükümomi zü küzhotü upüh pü kürhü hite; kümatho mu kürüzhüni kükrorhü tsü dipüh ba? Mori küve mu küzüni dipüh kükrorhü tsü ba?

¹⁵ Khrista mu küciedzüo ni dipüh küdzürhü tsü ba? Mori kümülüo mu mülükümoo ni dipüh kümha tsü ba?

¹⁶ Mu Nyepoo kürüshüce mu thürümharhece ni dipüh dzükho ba? Kükrelamole uko rhü küta Jihova rüshüce tsüla, süo Jihova potsü “I uko lübato mu uko dülü tato mu I uko Jihova thito mu uko a thüma thito.”

¹⁷ Süla uko dülü tapari tate, sino nie kreyi tate, Nyepoo sino poyo, mu nie müsakümoko ni hite si tsüsa I n züyi to,

¹⁸ Mu I nieko Po thiyi to, mu nieko anu mu anupüko thiyi to, Nyepoo kürükrüthoo sino poyo.