CORINTHMIKO KÜNAO 5 - KETHOLESI KESAO N.T. (BSI)

¹ Ha shebate, cedzü hilü thümoo ce tsü hü küba hio nrhüh ta zori, ha Jihova ce ha ce püh ba, süo thübe püh thimo mu küchothe tüyo ba küto ce.

² Tsü kühü hilü ha mühimülo no tüyo ce sü po ha whuyi küto münyü yo.

³ Süo püh whuyi kütasa ha müchüh sa mo tato.

⁴ Süla dzükhüce hilü kühü tüce ha mühimülo yo, süo rhüva kütolü mo vele ha whu sayi kütola, sino ditayi kühoo po katayi küve hio müzoyi tato.

⁵ Hiolü ha rüde thiküsüo sü Jihova zo, Pü Ropüo hetü püh thi hatsü ve.

⁶ Süla ha thüpu swu bayo, ha thümo ce hiolü kübace Nyepoo zü kümücu bayo tsü she.

⁷ Ha küngoo lü mono kümülü lü tayo.

⁸ Thümo hio khava no Nyepoo zü bata nsa pü tsü ha thüpu shu bayo.

⁹ Süla ha ce hio lü bari mori Pü nü thiyi ton thühe thiyo.

¹⁰ Kükrelamole u mütü Khrista mi kütsoküto bao mhüdzülü tha mütu zoto mu sülü u kühopühri mhatho küve ri küshü ri uzho ngoyito.

¹¹ Süla Nyepoo khri kümükrü she küyi bi miri hüyo, vele Jihova no ha rüle she mveyo, mu nieri nielülü ha she mve batho tsü mülüyo.

¹² Ha nie mhüdzülü hathohachu la nsa mo, vele niepo hala thüchu püyi nsa yo, sino niepo mi u mülülü mono chozu utho uchuyoküzhoko mhüdzülü thaka thiyi küto la.

¹³ Ha nyotata ri süo Nyepoo la zo, mücie bari süo nieko la zo.

¹⁴ Süo Khrista kükhrüo tho ha hü zü ta kütala, süla ha lütüyi küta mipüh no mütüsühlü sa küva la, süla mütüko sate.

¹⁵ Pü mütüko sühlü save, sino rhü ta kütako po utho ula hü mono ula sa mu rhüyi kütao ceco hüyi küto la.

¹⁶ Süla ha tsü mipühri thümoo ceco she tamote, ha thadzü Khrista ri thümoo ceco she vele tsüno sübi mote.

¹⁷ Süla thüma kühopühri Khrista yo bata tsüsa püh kühü küsa te, mha küvüko dite mu hie mütü küsatsüte.

¹⁸ Mu hiko mütü Jihova celü vori, Pü Khrista yo uzü küzüveyi te, mu vetho küthi yitho kha hatsü sü;

¹⁹ Süo Khrista yolü Jihova cedzüo zü vetho thiyi, sino uko küjoko püh uko müjomo no vetho dzüyio püh uko tsüsüte.

²⁰ Süla ha Khrista sühlümi te, sino Nyepoo no hayo nie cüyo. Ha Khrista sühlü thi niepo Jihova zü vetho thiyi no cüyo.

²¹ Uko la küphoma she kümoo thipüh phoma ve, süo uko po püyo Nyepo Jihova mhüdzülü mathoyi küto la.