CORINTHMIKO KÜNAO 13 - KETHOLESI KESAO N.T. (BSI)

¹ I tsüo vasüh-o nieko ce vozü. thübü kühopühri zhopo küna mori süh bayi moyoshü.

² I niecie küvo cie phoma küvako mu kükreko ri tarho sü mu tsü nieko zü ba kümo cie nieko tarho lasü zü, a küvoce süko yo azho veyi ho.

³ Kükrelamole nieko Khrista ayo dzüpoyo kütsü zhopo she nsa yo tsüla. Pü nieko yo ba kütsü thathi namo vele kushu no batsüla.

⁴ Hidzü pü thathi no mipo püpüh vüve, vele Jihova küku la rhüh tate. Hari thathi no püyo hü, vele nieko cie küvoce püzü no Jihova küku lü hü süto.

⁵ Nietho nie pesüte nie kümülü lü hü ba memo si. Nietho nie dojü süte, Khrista yo hü ba memo si? Nie uzholü hüyi ba mota motho!

⁶ A kümüri nie ha uzhomo kütsü ngoyi hotho siyo.

⁷ Ha Jihova cie niepo küshü thita mo kütola cho bayo, ha dojü kütsülü uzho kütsümi thiyi kütoo la mono niepo uzho thi hüyi küto lano, hatho küshümi thi ta zori.

⁸ Ha mhapühri thipüh küthoo mutsu tayi ndi, vele küthoo la mhathi zoto.

⁹ Ha thathi mu nie ku küba cie hanü bayo. Mu ha kücho sü niepo ve lotsüh küyio zo.

¹⁰ Süla I nieko chücie ba kümocie dzü hiko thosü zü, süo a küvoce apo Nyepoo küku kha atsü küsü nieko dzürhüva mole thi mütü sü kütoo püh nieko yo müchie ta mo kütola.

¹¹ Külalü, küzüko, vetsüzo voyi. Niecho kütso kümüziyi, adzü züyi, külürhü bayi, küzüve bayi; mu kükhrü Jihova künüo nieko zü bayi to.

¹² Kümüsa mbo püh huniehu külü süte.

¹³ Kümüsako mütü nie külü süho.

¹⁴ Nyepoo Jisu Khrista ngokümüzhie, Jihova kükhrü, mu Kümüsa Ropü krothoo po nieko mütü zü ba küyio thiyi te. Amen.