CORINTHMIKO KÜNAO 10 - KETHOLESI KESAO N.T. (BSI)

¹ I Paul Khrista zhoküve mu kümünü lü nieko ce poyo, nieko zü kübace mününui yo vele nieko zü bamo kütace nieko yo a dzü rüh tayo:

² I nieko ce choyo, süo apo nieko dülü küvoce apo a dzü rüh tamo küto mülü, I vo kütsü sa ha thinpho müdolü tatho no lüyo küzhoko yo poto küba bi.

³ Hatho thinpho zü hü baluri thümari zhoo bi thithüri thiyo mo.

⁴ Ha rinyie sühyo küzhoko ciedzüo rinyie bimo vele velotsühkütsü küku cohu ri dzürhüyiküve küku sühyo.

⁵ Sü püh mi mhalü kühopühri u thi kürükrü sü Jihova mhashe mütüyo küzhoko nüda, sino ulüdoko tüpüvo Khrista dzüzü lü süyo.

⁶ Nie dzüzü lü voyi kütasa dzüzü thi tsoyi mo kütako müjosü kütola ha küsüh pü bate.

⁷ Niemhü püh nie mhüdzülü küngoko pesü yi, kühopühri Khista zhü küta mülükhro yo tsüsa, sümi po hari Khrista zhü küta lüyi te.

⁸ Nyepoo apo nie thimüshüva mole nie phü müsü küsü küku kha atsü küsüo la I kümühari za tazori I münga tayi ho.

⁹ I lüsi thopüh nieko kücieküru küto la mo.

¹⁰ Uko po kütsü “pü lüsiko lü püdzü müshi mu kushu; vele mhütsu zotsü thathi mu püdzüpo mhapühri zo mo,” siyo

¹¹ Sümi po hi sheyi te, ha küdice lüsi lü po küsü bi ha küvoce ri sübin thizo to.

¹² Siyo hatho hathi mükre mori hapüh utho uchuhyo küzhomi zü kümüdeyo mo. Vele ukotho uko dolü kümüde mu huhu popüh kümüde süzi küzho uco she kümola.

¹³ Vele ha kümüha küyeyi ho, Jihova che hatsü küsü hapo pühvo nie tsono küsü pi kümühayi ho.

¹⁴ Ha niece vo kütsüce ta chuhküzü vori mo, mu ha Khrista dzüyiküveo püh niece vo küratho thizo.

¹⁵ Sino hatho hachuh küyie tamo, kükremi mhatho lano; vele ha kümüri nie kümülü po ve kühü mu nie dülü ha mhatho po ma müzho küchüyi,

¹⁶ Sino hapo dzüyiküveo po nie müchuh vo kükremi ceri voyi, süzino hapo mi mhathoko la kümüha tamo.

¹⁷ Kühopühri kümüha küzhoo Nyepoo la kümühayi te.

¹⁸ Thüma utho uchuh kütsüo yiyiyomo, vele Nyepoo püchuh küsüo uzho