CORINTHMIKO KÜNAO 1 - KETHOLESI KESAO N.T. (BSI)

¹ Paul, Jihova müdolü Jisu Khrista apostle, mu uzüo Timothy ni püh Jihova kühu Corinth lü küba mu Achaia lü küba kümüsako mütü cie küsü:

² ngokümüzhie mu thülükümünü Poo Jihova mu Nuo Jisu Khrista cielü küvoo po nieko zü ba küyio thiyite.

³ Jihova pothüchuh-o püyite, u Nyepo Jisu Khrista Po, ngokümüzhie Po mu thokümülu mütü Poo,

⁴ Pü ha müzhie mütülü halü thomülu sü, sino hari müzhie kühopühri kübami lü thomüluyi yo, Jihova thokümülu püh halü thomülu küsüo süh no.

⁵ Ha Khrista la müzhie ri ngoyiyo küzho bi, Khristaeno thokümülu ri kha ha tsü yo.

⁶ Mu ha kümüzhieyi ri süo nie po thülükülu mu külaküyi ngoyi kütola, mu ha thokümülu ngoyi zorei süo niepo tho kümülu ngoyi kütola, süo nieri ha müzhie bi kümüzhieküyilü sügüsühe yi tsüsa.

⁷ Mu ha kümüri nieko mütü zoyito, kükrelamole nie hazü kümüzhieyo küzho bi hazü künüri ngoyito tsüla.

⁸ Süla ha küzüko Asia lü kümüzhie kütsü hayo küvo niepo shiemo bansa mo, süo müdeyi kündi pü thizo, mu rhüyiküto ri lü mota zo:

⁹ ha hatho hayolü küsa zhokhro kha ha tsü kütsü lüta; kükrelamole ha thipüh hapo hatho ha mülüta mono Jihova küsami rei thi mürhüyi yo küzhoo münguyi kütola;

¹⁰ Pü tüsüh kürüh hilü ha süphrayi mu ha külasü mu Pü hisari küsalü u külasüto.

¹¹ Süla nieri hazü kükhoyo no küchothi yi tsüsa ngokümüzhie püh güu küsü la mi kükro ha sühlü kümüza poto.

¹² Ha künüo sü hihi, halü thori ha zhopo thiküba ha uzhotü mu müsamüzi no ciedzü hio mu nieko mhüdzülü müku no ciedzü mhashieo mo vele Niepoo ngokümüzhie püh nieko zü hü küba la.

¹³ Ha thopüh nie kütsü mha kükre mo, vele nie phri mu shieyi küveko zo, süla nie shie mütsüyi küto müri yo.

¹⁴ Nie hayolü hu shieküyi la Niepoo Jisu zho nha nie hala nienü to mu hari niela hanüyi to.

¹⁵ I hi shietü kütsüla hidzü nieko cie vo müra kütsü lüsü, sino nieko po künü kürükri ngoyi kütola.

¹⁶ I Macedonia lü küvoce nieko püthü mu Macedonia lü la nieko ce vo mu Judea lü küvoce nieko po a cho phi tsü lüh.

¹⁷ I siton lü kütsüce I lü kürüjo me? Mori I thipho müdo züno to, mo simo?

¹⁸ Vele Jihova no dzütho tsü bino, hadzü püh niecie küsüto mori mo simo,

¹⁹ ri Silvanus mu Timothy hako püh niecie zhopo thiküsüo Jihova Nuo, Jisu Khrista, yolü pütü mütülü to sitsüo zo.

²⁰ Kükrelamole Jihova po küsüko pü oh siyo süla ha Amen sipüh Jihova zapozaleo yo süyo.

²¹ Pü Khrista yolü uko thi kümütü sü mu ha kütsü püh niecie sü;

²² Püh hayo soma vüve mu hetü ropüri kha ha mülülü süve.

²³ I Jihova za cüpüh a zhopo thiyo süo I tsüo va Corinth lü vori mo küta nieko la küve zo.

²⁴ Ha nie kümülümho kükha te sitsüo mo vele nie künü po kroyi kütola nie kükhrühi mi zo, kükrelamole nie kümülü lü tha mütü kübala.