COLOSSAEKO 4 - KETHOLESI KESAO N.T. (BSI)

¹ Mi kemethamiko, ketü lü zhokhro kha thekümiko tsüte; neko Niepoo kemetha pü bati sekeba bi.

² Kecholü thisü ba zote (metüva hite) mu kethezü kha kesü fü mu la ba zote.

³ Kecho kethilü hako la sheri choba zote, side Jihova po cekha khripü hako tsüsü jü poyi keve thi ketola, Khrista ketekhri ti po ketola, mha süola atüpü pha püta.

⁴ Apo süo thi mese mengoyi ve ketola, I jüposü kezüce.

⁵ Ketsükevelü chota vote chozulü ketakola, pütü rhayi te.

⁶ Ne jüpolü menünu, kekhrü kene, thisü tate, metsapü va kesü, side neko mifü kho kesü po kezü seyi ve ketola.

⁷ I dipü bi ba sheri metü Tychicus kehala nekoce süto, pü ukekhrü sazü jüra mipü, mu yitholü kemelü kevepü, mu choyi kethi lü kezü keta Niepoo cetami pü.

⁸ I pü ketsü pü neko ce sü züho, mhaco süo la, püpo neko dipü biba sheri sesü ketola, side pü neko melü thomelu sü ketola.

⁹ Onesimus, usazüo kekhrü kemelü kene pü neko mipü zü vori to. Uni tavori de hice dipü thiba sheri neko ce posüto.

¹⁰ Aristarchus azü thejü thi kebao neko kelü süho, Marcus Barnabas lipü nu jü kha kesüko neko ngo keyi, mhace püta nekoce vori lize püzüyite.

¹¹ Mu Jisu, pü cüpü Justus kethio, pü yi kerü mipü. Hiko lebi azü mhathothi kebako zo, Jihova kederevü la, mu alü thomelu kebako.

¹² Epaphras, pü neko dolü mipü, Khrista choyi kethimi, neko kelü süho, pü kecholü püyhe thi keba mipü nekola; neko po mesatso mu zhochü de Niepoo medolü thayi ketola.

¹³ Kekrelamori I püju kevekesu metü seba, pü neko la pü rha thi tazo, mu Laodocea lü keba uko sheri. Mu Hierapolis lü kebako sheri. Luke, ukekhrü daru keseo, m Demas neko kelusü.

¹⁴ Laodicea, Nymphas lü keba kehuko sazüjürako kelü kesü, pü celü kehu kebako.

¹⁵ Neko lesitho kesü hio phri kesüce, neko dolü, Laodocea lü sheri phri süte, kehulü; sübi lesitho kesü phripü Laodocea lüri süte.

¹⁶ Archippus ce posüte, yitholü menuyite, no Niepoo celü ngokeyi thitso sü zote.

¹⁷ I Paul abe pü neko kelü süzüho, A phapü keta rekra sü zote, ngokemezhe po neko züba keyi thi. Amen.