COLOSSAEKO 3 - KETHOLESI KESAO N.T. (BSI)

¹ Mhace neko Khrista zü rhü süta lize, mesoyo keta zhüko phute, sülü Khrista Jihova po uzalaco ba ketao.

² Ne kelü (ne mhatho) ko mesoyo ketakola thite, mu cejülü keta zhüko mori.

³ Kekrelamori neko satate, mu nekerhüro Khrista yo no Jihova celü kevapü metate;

⁴ Khrista uko kehüo mhüngo thi kevori ce, süce neko sheri zapozale kethilü mimhüngo thi tato.

⁵ Süla nethi nepho mesa vate, cejülü kebace, keregü kerezhü, mesa kemo, thizü kemo kethiko, ukethükeho mhakesu kethi, keregü, kemeho, süko therü marhe kereshü zo tila.

⁶ Mha süko la Jihova lüda jüzü kemo nuneko vota.

⁷ Nekori pütühu sülü ta, mu sülü hü.

⁸ Vele tsühi neko süko khave, thelü kereda, lekhu mi nümo kethi, Niepoo Po merho ti, mesakemo rethi, neko talü.

⁹ Hunehu yo kemeda pohi, pü mhatholü thüma kevüo khi kevala.

¹⁰ Mu thüma kesa thite, pü uthi kesü hü thi kesa lülü keyi mhaselü.

¹¹ Greek miri kremo, mori Jewmi sheri, yi kerü mori yirü kemo sheri, barbarian, Scythian mi, thejümi mu ukekha kedimi sheri kekreho; vele Khrista yo metü kemhate, mu metülü.

¹² Jihova keda keyi bi khi bemene yite, mesa mu kekhrüko, uralü phi kemezheko, ketsükeve, ulü kemeko kemo, menü nu, shügüsühe.

¹³ Hunehu la mhalü ti, hunehu kejova, mhace thüma hu mi metsu ti ba lize, Khrista ne kejo va kesübi, sübi neko hunehu yo thi süte.

¹⁴ Mhasüko metü pi kevaphi ti kekhrü, phakesapü vetsü tso keyi.

¹⁵ Jihova celü thelü kereyi po ne melülü ba yite, neko cüpü sülü sükeyi la, themo püte, mu ne mi meza saite.

¹⁶ Khrista jüpo nelü hü yite ketsü keve nephiti, metha mu hunehu tarho, tsale mu lithi rüpü tsaleko ne melülü kekhrü ba de tsale thipü Niepoo ce süte.

¹⁷ Ne mhatho mori jülü she dipü thi sheri Jisu zalü thi zote, kethezü pü Jihova tsüte, pü u Po zoti la.

¹⁸ Micemi neko nenopu neko khro tayite, Niepoo celü süo pü zotila.

¹⁹ Mi nopu neko, necemi neko khrüyi te, mu uko metsu khu mezü ta hite.

²⁰ Natsiko mha metülü nekrü neko jüzü thite, kekrelamori Niepoo hio pünü zo tila.

²¹ Mipo neko ne nuneko lüva kereda hite, molize uko umelü thepu mo tato.

²² Mi thekümiko mha metülü ne niepomi füzü thiyi te, uthi upho zhorele bi, umhüngoce lebi mo, thüma nü medo kethiko bita mode, vele umelü pü lebi khi, Jihova mpe tilü.

²³ Ne mhakehopü thi sheri, nenüde thite, Niepoo lano zitilü, mu thüma lano zi mode.

²⁴ Niepoo celü zhokhro kalü ngoyi keto seba ketabi, kekrelamori neko Niepoo Khrista choyi thiba.

²⁵ Vele kekri keti mhatho kethiko kekri tilü mhangoyi to; mu thüma celü thechuthero ngoyi ho.