TAITAS 3 - KARANU KABI SAMTAM

Kristenmei mah Jairali

¹ Ahnyiinii apum katiimei satei- chii teimaham kajum mei kang nkang matu tang karam, katam swimatu tang karam, sateichii kabi tha tiitang karam jangpii tiida kabui tiisii,

² mei kata hangninii phyiiryii kado tam mashyii kasu tiisii, nlenii lung manoi majung kabui tiisii sa- teichii meihang dakii lung kamanoi tei mangou kabui tiisii ahnyiigo tam maningpyiilo.

³ Dapokii ndounii nyiido kapang kamang, katam swikasu, dhiisii tat katu, kathaam kathaam pumzai mah kamarei ka-ntha ninado kasamou hang mah kikaleimei tiisii kem ninado kamaimhii kito nyii tiilung lungsii meihangpii nyiigo ngourousii ninado nyiinii ahnyiigo ngourousii leile.

⁴ Nlenii nyiigo keikapyiipii Bangpii Saraamah lung- syii kapyii ninado meigo lungkasyii tei gongpyii sek-kii,

⁵ nyiinii kasang kamajyii kito tiikabam tha kito makle, nlenii mpoumah lungsyii kapyii kito mpounii nyiigo nlai loisii kamanaamah dwi shyii kamatei ninado rangii kamatei mah tiiranu kapyii kito mpounii nyiigo keipyii takle.

⁶ Mpou mah jumage kapyii teipiinii tiimajyii tiimatui pyiisanii, kalui kaga karing doutanglesii nyiinii maning malumsii koikalei taiswisii nyiigo mahtou katoumei tiimatu tang karam jangpii,

⁷ nyiigo keikapyiipii Jisu Krista dato rangii kamatei gotei nyii phyiiryiikii Saraanii moisii rui mpatpyii takle.

⁸ Tam kalei ai kasangle, Saraago kamalum mei teinii kabi tha tiitang karam jangpii, ahnyiimah tinglang tei ahnyii roinapii jumatou kabui tiisii nangnii tiigatpii kaang aihang ai tam kapyii Inii mareile, aihang ai meihang jangpii bi kabui ninado liipat doukabui mareile.

⁹ Nlenii ka- mang sam kajyii katu, meilui meiha lungpat saroisam katam, n-girazyii katii, sateichii ajaiting- shang mah kaang kito ka n-gi katu, aihang kito nlek wolo; kadapokii aihang ai liipat gale ninado kadakle.

¹⁰ Tiikapak tiikapangmei teinii mei tiikasu katii kashyii kahong mei ninado mpoumah kem kama hangteinii mpou roinapii mpougo tiikamashyii meile katu tisii,

¹¹ tiiloi sulosii tam kakhat binii mak-kii nakii kashang taitonii ai kakum meigo njaloi sulo.

Kalui tiisii tam rali kapyii sam

¹² Artimas mak-kii Taichikas go Inii godakii lang magong sekchii, nangnii guda Nikopolis ki gong kabuita gong kalu tiilo, kadapokii satai tinglang ai teikito Inii bam tang takle katupii satto takle.

¹³ Samtak katiipii Zinas nei Apollos go samah kado tam kasu tiimatu kasu tiisii ahnyii mah mbuitat tang karam pwidi ki teikii pang kapou pyiilo.

¹⁴ Sateichii nyiimah mei hang teinii tikasu tiimatulak tang karam jangpii, pat kalak liit kalak kito tiiha tang karam jangpii kabi tha katii kiteikii nyiihang mah tinglang tei pyiirali matulo.

¹⁵ N-gu kaswisii kalei meihangnii n-go salam pyii leile. Kamalum kito nyiigo lungkasyii meigo nyiimah salam tei pyiilo. Saraamah jumage kapyii tei gonyii hang go kaswipyii matulo.