ROMMEI 9 - KARANU KABI SAMTAM

Isrelmeinii malum kasu jangpii Polnii kamage katu

¹ Inii Krista zeikito kasang tei tam leile. I-choimakle; kabi kashyii tikabui gulung teinii n-gu rangii kamatei zeikito sakchyii tiileile.

² Katunii, Inii gulungto hangkapii kamage sateichii taksupii katchii tei doule,

³ kadaponii pum zai tai swisii gutat gureng, gu kangsanamei kaang jangpii gupum sek ai Saraanii kasheeng doutang karam sateichii Krista dato n-nou ai tang karam tei Inii maningwo buile.

⁴ Ahnyii teinii Isrelmei teile; makot kalei nah sapfiimei katii, pumtei kava, sat tang karam samtam hang, ajaitingshang kapyii, kasang kamata, sateichii riishii tiikabam hangtei ahnyii mahle;

⁵ Ahnyii teinii Hebrumei peipao dato lung humle, sateichii meinah hangninii tiisii Krista tei, ahnyii mah atat areng kitole, kalei kaga hang pyiiryiito apum tiikalei Saraago tei kalui gasii tam matoi matulo. Amen.

⁶ Nlenii Saraamah samtam tei samah kado kasu takum tutakle, katu mamakle, kadapokii Isrelmei dato lung kahum ahnyii hangtei Isrelmei makle.

⁷ Sateichii Abraham dato lung kahum ahnyii hangtei mpou nahmei makle; Saraanii Abra- ham dakii tamle “Inii n-go riishii tiipyii kabam godato lung kahum gotaa gonahmei tei nangnii Isak paito doutangle.”

⁸ Ainii tam katunii pum zai mah nahmei teinii Saraa mah nahmei makle, nlenii riishii tiipyii kabam nahmei gotei kasang taa nahmai lesii poileile.

⁹ Kadapokii riishii tiipyii kabam teinii tam kabam tei aile. “Ai kakum tinglangki Inii nlaigong tangle, sateichii Sarahnii nah sapfiimei hangninii doutangle.”

¹⁰ Sateichii teiroi lakle, nlenii Rebika goda hangninanii, katunii nyiipfii nyiipao Isaknii, moi mpung malu wosekchii,

¹¹ kadaponii nahmei tei lung kasunakii sateichii mah kata kabi mak-kii kashyii hangninii kado tiikasunakii kalai mpat kalu tai swisii Saraa mah kamaning kito tatjou matu tang karam jangpii katunii, tha hang jangpii supii, nlenii mpounii lat kapyii jangpii,

¹² Rebika dakii tamle “Sung katingmeinii tai- karhiimei nga nga tangle.”

¹³ Aitiisii ryii kabam takumpii, “Inii Jakobgo lungsyiitakle, nlenii Isou gonii Inii ngourou takle.”

¹⁴ Teitiileponii nyiinii kadapei tam tangpo? Saraa pyiiryiito kaku ka-nraang leipo? Teisang teimakle.

¹⁵ Kadaponii mpounii Moses dakii tamle, “Inii jumagepyii kanyiimei kata hangniniigo Inii jumage pyii- tangle sateichii Inii lungsyii kanyii- mei kata hangniniigo Inii lungsyii tangle.”

¹⁶ Teipiinii mahlyii hang ai meinahnii kamaning kamarei mak- kii tiikajyii pungkajyii pyiiryii bam makle, nlenii Saraa mah jumage kapyii pyiiryiito roinii leile.

¹⁷ Ka- daponii kabi rasamnii Pharo dakii tamle, “Inii n-go gumah teimaham mangou matu tang karam jangpii sateichii guzei ai sazyii pouryii hang kikii tamroi matu tang karam jangpii aisek jangpii Inii n-go poi matupyii takle.”

¹⁸ Teipiinii mpounii kamaning kamareimei hang go jumage pyiile, sateichii mpounii kamaning kamarei mei lungtei tiimatei pyiile.

Saraa mah rakarhii sateichii jumage kapyii

¹⁹ Teitiileponii nangnii gudakii tam tangle, “Kadajangpii mpounii kama tei rei fiileipo? Kadapokii mpoumah kamaning kamarei gotei tanii mazhii kasu tiiwo tangpo?”

²⁰ Nlenii Saraago khela kalei, amei- nah, nang tapo? Tiikabam mah apot teinii tiikapyiipii dakii: “Nangnii n-gu dajangpii aitiisii tiipyiiposii tam tangpo?”

²¹ Mak-kii alikharakipii teinii tiigang kangkii kito njai hang- niniigo tha kahung jangpii sateichii njai hangninii gotei tha kamalaa jangpii litei tiitang karam jangpii tii- gang pyiiryiito mpoumah teimaham leimakpo?

²² Sateichii Saraanii tiipyii kabam tei kasangle, mpounii mpoumah ra- karhii tei mangounyii takle, sateichii mpoumah teimaham tei matinyii takle, Nlenii tiimaga katu dou kamajyiimei gotei mpounii hangkapii lumsii lehpyiile.

²³ Mpoumah pumtei kava doumatu tang karam jangpii mpounii ndouto reipii tiidapyii kabam, mpoumah jumage kapyii doutang karam nyiihang pyiiryiikii mpoumah kani pumtei kava rui ka-mpat teido mpounii mangounyii takle.

²⁴ Ka- daponii mpounii lat kalu mei tei nyiile, Jehudimei hang kak kito roinii makle nlenii lui kaki kakimei hang kak kitodole.

²⁵ Mpounii Hosia mah larek kito katam tei aile: “Gumei kasumei gotei Inii ‘gumei sii lat tangle.’ Sateichii Inii lungsyii kasu sazyii gotei nii ‘gumah lungsyii kaki sii lat tangle.’ ”

²⁶ “Sateichii ‘gonyii gumei makle’ sii ahnyii dakii katam bamni sek teito ahnyiigo ring kalei ‘Saraa mah nah sapfiimei sii lat tangle.’ ”

²⁷ Sateichii Isaiyanii Isrelmei kaang kito saa mpatle: “Isrelmeinah mah meilui tei dwijai ki kangneng takum kado, masak kalei njai chengnakii gotei roinii keipyii tangle.

²⁸ Kadaponii Abangpiinii sazyii pou- ryii meigo kaswisii mpounii mpoumah kamashak tang karam hangtei kalangsii tiitang takle.”

²⁹ Sateichii Isaiyanii ndouto reipii tam kabam takumpii, “Abangpiinii nyiigo taa nahmei masakdek suleponii, nyii ai Sodom takumpii leitang takle, sateichii Gomarago njoi lei tang takle.”

Isrelmei jangpii kariita

³⁰ Teitii leponii nyiinii kadapei tam tangpo? Kasang kamajyii fiikasu luikakimei hangteinii kasang ka- majyii katunii, kamalum kito kasang kamajyii tei doutakle;

³¹ nlenii kasang kamajyii mah ajaitingshang go kaba kalei Isrelmei teinii teimah ajaitingshang gotei tiimatui tiima- sangpei wolak kiile,

³² kadapei jangpiiniipo? Kadapodinchii kamalum paito ahnyiinii kasang kamajyii gotei fiimakle, nlenii tha kito teigotei baa- kalei takumpiinii baaleile, ahnyiinii kuitu pi kapaswi pyiiryiito pasuiwo takle;

³³ aitiisii ryii kabam takumpiinii, “Julo Sijon kikii pi pasui tang karam kuitu ninado ahnyiigo tiikou tang karam kuitu kadi Inii kaibamle, sateichii mpougo kamalum mei gotei nrou matu lakle.”