ROMMEI 8 - KARANU KABI SAMTAM

Rangii kamatei kito kalung tiilung

¹ Teijangpiinii aitoinii Krista Jisudato kaleimeihang go tam kamashyii tei gatakle.

² Kadaponii Krista Jisu dato kalei karing mah rangii mah ajaitingshang teipiinii n-gu kem sateichii katai mah ajaitingshang kiteito laat mpatpyii takle.

³ Kadapokii apum azainii kasui taiswisii ajaitingshangnii tiipei kalak tei Saraanii tiipyii takle: Saraanii mpounah sapfii mpou gotei kem katii pum zai mah jaitalui kito sateichii kem jangpii m-mang pyiisanii pum kito kalei kem gotei tam mashyii aitakle,

⁴ dapochiinii apum azai tai swisupiinii, rangii mah tai swisii tat kalei nyiidakii ajaitingshang mah kasang kamajyii tei nyii dato madou gong matu tang karam jangpiile.

⁵ Kadapochiinii apum azai tai kaswimei teinii apum azai mah gotei maningle, nlenii rangii tai kaswimei teinii rangii mah gotei maningle.

⁶ Kadapokii apum azai mah kamaning tei kataile, nlenii rangii mah kamaning teinii karing ninado kamajung teile.

⁷ Teijangpii- nii apum azai mah kamaning teinii Saraa go ngou karoumeile; kadaponii teitei Saraa mah ajaitingshang kang nkang makle sateichii nkangdo nkangpei wolakle;

⁸ sateichii pum zai kito kaleimei teinii Saraago adzyii karanga tiipei wolakle.

⁹ Nlenii Saraa mah rangii teinii gonyii dato leileponii, gonyiinii apumzai kito bam makle, rangii dato leile, Nlenii mei kata hangniniida Krista mah rangii tei galeponii ahteinii mpoumah makle.

¹⁰ Nlenii Kristanii gonyii dato lei lepochiinii kem jangpiinii gonyii pum tei tai kido gonyii rangii tei kasang kamajyii jangpii ring leile.

¹¹ Sateichii Jisugo katai kito tiimaring kapyii mpoumah rangii teinii gonyii dato leileponii, Krista Jisugo katai kito tiimaring kapyii mpou teinii gonyii dato kalei mah rangii paito gonyii mah taiga kabui pumhang godo karing tei pyii tangle.

¹² Teitiileponii kangsanamei, nyiinii apum azaitai swisii ringtang karam jangpii apum azai mah pow punglei makle;

¹³ kadapokii gonyiinii apum azai tai swisii lungleponii, gonyii taitangle; nlenii rangii paito gonyiinii apum azai mah tha hangtei tai malei aileponii gonyiinii ringtangle.

¹⁴ Kadapokii Saraa mah rangiinii chyiitatsii kalei hangteinii Saraa mah nah sapfiimeile.

¹⁵ Kadaponii gonyii dakii Saraanii pyii kabam rangii teinii gonyiigo kabangnah tiimatu makle sateichii hingmatu makle, nlenii rangii teinii gonyiigo Saraa mah nahmei tiimatupyii takle, sateichii rangii mah teimaham teipii nyiinii Saraa dakii saa mpatle “Abba, Katunii Pfii-o.”

¹⁶ Nyii hang Saraa mah nahmeile katu rangii sekpiinii nyii mah rangii go sakchyii kapyii teile.

¹⁷ Sateichii Saraa nahmeile ponii mahtou katoumeido takle, mpougo kaswisii nyiinii pumtei kava tei dou njoitang karam jangpii Kristago kaswisii nyii kamage kalak pung njoi leponii, Saraa mahtou katoumei sateichii mpougo njoisii mahtou katoumei takle.

Gong tang karam kasagoi

¹⁸ Dapodinchii aitoi tinglang mah kamage kalak leh kalei tei nyiidakii mangou tang karam pumtei kava gotei nda tiipei lakle katu tei Inii maningle.

¹⁹ Kadaponii baichem hangnii Saraa mah nahmeihang gotei mangou tang karam gotei saryiisii koisii bamle.

²⁰ Kadaponii baichem hangnii alot kasu kang nkang kalei ai mpou mpoumah kamaning piinii makle, nlenii teigotei maning kama- lum kang nkang matu katu mpou mah kamaning kitole.

²¹ Kadapokii baichem hang teinado thamsii ramtang karam kito laat mpatpyii tangle, sateichii Saraa nahmeinii araangra katii pumtei kava tei doutangle.

²² Nah kalungki tiikalei takumpiinii aitoi katangpii baichem hang teinii katchii teipii nrungsii bamle katu tei nyiinii tile.

²³ Sateichii nrung kalei tei teiroi makle, nlenii rangiimah atikarei dousii kalei nyii pum sekpiiniido mpoumah sapfiimei tiipyii matu tang karam, katunii, nyii pumgo kalei pyii matu tang karam jangpii koisii kalei kak, nyiilungto nyii pum sekpiiniido nrungsii bamle.

²⁴ Kadaponii maning kamalum kito nyiigo keipyii takle. Aitoinii mikpii ngou kaleigo maning kamalum teinii maning kamalum su- takle, kadapokii Ahnii ngousii kalei gotei tanii malum leipo?

²⁵ Nlenii nyiinii ngou kasu gotei maning malum leponii teigotei nyiinii lehsii koileile.

²⁶ Teitakumpii nyiimah kasuihang kito rangiinii nyiigo tiihale; kada- pokii nyiinii kada takumpii riita kajyiipo katu tei nyiinii timakle, nlenii mwipiinii tampei kalak tiisii kamagesii rangii sekpiiniido nyii jangpiinii Saraa dato riita khang- pyiisii leile.

²⁷ Sateichii meinah lunghang go jusii kaleipii teinii rangii mah kamaning lungswi teido tile. Kadaponii Saraanii kamaning kamarei tai swisii rangiinii kamateimei hang jangpii khang- pyiisii bamle.

²⁸ Sateichii Saraanii mpougo lungkasyiimei hang dakii katunii, mpounii tiimatu kanyii kamaning kamarei kalei tai swisii lat kalumei dakii bitang karam jangpii tha hang kaswisii tiipyiile katu nyiinii tile.

²⁹ Kadaponii mpounii reipii juti kalumeigo mpou nah sapfii mpou- mah jaitalui gotei njoi matu tang karam jangpii ndouto reipii tiikada aitakle. Nah sapfii mpou teinii kangsanamei hang kak kito manaa karei tei tiimatu tang karam jangpiile.

³⁰ Sateichii mpounii ndouto reipii tiida kabam gotei latdo latpyii takle. Lat kalumei gotei tiido tiima- jyii pyiitakle, sateichii tiimajyiipyii kaleimei gotei mpounii pumtei kavado pyiitakle.

Saraamah lungkasyii Krista Jisu dato

³¹ Teitii leponii akaang aihang aikito nyiinii kadapei tam tangpo? Saraa ai nyii jangpii leponii, nyiigo mazhiilak tang karam ta leipo?

³² Mpou nah sapfii mpougodo masak supiinii nyii jangpii pyiitoi kalei mpou teinii meinah sapfii mpou gotei kaswisii mahlyii hangdo nyii dakii kada takumpiinii pyiilak tangpo?

³³ Saraanii kalai kalumei pyiiryiikii tanii sam tam mashyii tangpo? Tiimajyii kapyii tei Saraale.

³⁴ Tanii tam mashyii tangpo? Taikapyii satei- chii teipyiiryiito katai kito ringkhiisii Saraamah bah ajiilamto bamsii nyiihang jangpii riita khangpyiisii kalei krista Jisu teipo?

³⁵ Krista mah lungkasyii kito nyiigo tanii chyii- kapak wotangpo? Kamage kalak teinii manii, mak-kii kamage kamarhii teinii manii, mak-kii tiimaset tiimalak katu teinii manii, mak-kii tak kateeng teinii manii, mak-kii peimani kaga teinii manii, mak-kii sadoi kashyii teinii manii, mak-kii saryiikhang teiniipo?

³⁶ Aitiisii ryii kabam takumpii, “Gojangpii nyiigo tingna majang gitakle; gitang karam jaonah takumpiinii nyiigo poile.”

³⁷ Teitii kido akaang aihang kito nyiigo lungsyii kapyiipii paito nyiinii kangam kito kisii kangam teile.

³⁸ Kadaponii Inii malumle katunii, katainiido karingniido, sating gam- luinado, apum katiimei niikado, aitoi tinglangmah niikado, natei gongtang karam mah niikado, teimaham niikado,

³⁹ kasagoinii kado, kathok- nii kado baichem hang kito mah kata hangninii kaniido, nyii Bangpii Krista Jisu dato kalei Saraamah lungkasyii ki teito nyiigo chyii kapakpei wolakle.