ROMMEI 6 - KARANU KABI SAMTAM

Krista dato karanu tiilung

¹ Teitii leponii nyiinii kadapei tam tangpo? Saraa mah jumage kapyii tei moibubui matu tang karam jangpii nyiinii kem kito leihum tangpo?

² Teisang teimakle! Kem lamto taikalei nyiinii teikito kisii thaangsii kada takumpiinii lungwo tangpo?

³ Krista Jisu dakii dwi mpum kalumei nyiihangnii mpou mah katai kikii dwi mpum aitakle katu gonyiinii timakpo?

⁴ Teijang- piinii nyii ai dwi mpum kalu teipii mpougo kaswisii katai kiteikii poigoi aitakle, kadaponii Apfii mah pumtei kava teipii Kristago katai kito ringkhii matu kalu takumpii, nyiiniido karanu tiilung kiteito tatwo kabui jangpii.

⁵ Kadapokii nyiinii mpoumah katai kito mpougo kaswisii hangninii tiiwo leponii, mpoumah ringkakhii kitodo nyiinii madousupii hangninii tiitangle.

⁶ Kem katiipum tei tiimaga tang karam jangpii, sateichii kem kito kabangnah tiisii mbamlak tang karam jangpii nyii mah kaham mei tei mpougo kaswisii Krosh gamkii gi aitakle katu tei nyiinii tile.

⁷ Kadapochiinii taikalei ah goteinii kem mah teimaham kiteito mpat aitakle.

⁸ Nlenii nyiinii Kristago kaswisii tai takle leponii, nyiiniido mpougo kaswisii ringtangle katu tei nyiinii malumle;

⁹ kadaponii katai kito ringkhii kalu Krista tei taisang tailoi lak takle; katai teinii mpougo apum tiiloi lak takle katu tei nyiinii tile.

¹⁰ Kadaponii meihang jangpiinii binii mpounii katai tei kem lamto taipyiile, nlenii mpounii ringkalei karing tei mpounii Saraa lamto ring leile.

¹¹ Teijangpiinii gonyiido gonyii roinapiinii kem lamto taitakle, nlenii Saraa lamto Krista Jisu dato ring leilesii maning tang karamle.

¹² Teijangpiinii gonyiinii kem mah kamarei tei swilak tang karam jangpii, gakabui gonyii pumgo kem teinii sagong takumpii magong matu sulo;

¹³ sateichii gonyii gonyiimah pum pot, njaihang tei kashyii kahong mah beitui takumpii kem kikii pyii aisulo; nlenii gonyiimah pumsek tei katai kito pang nlaigong kapyiimei takumpii, sateichii gonyiimah pumpot mah njai hangtei kasang kamajyii mah beitui takumpiinii pyiilo.

¹⁴ Kadapokii kem teinii gonyii pyiiryiito apum tiilakle, dapochiinii gonyiinii ajaitingshang Kang nkang- sii bam makle, nlenii jumage kapyii kangto bamle.

Kasang kamajyiimah kabangnah

¹⁵ Teitii leponii kadapeipo? Nyiinii ajaitingshang kang nkang supiinii jumage kapyii mah kangto kabam jangpiinii nyiinii kem tiitangpo? Teisang teimakle!

¹⁶ Kataini majang- tatsii kalei kem mah kado, mak-kii kasang kamajyiini majangtatsii kalei, katam kaswimah kado, katam switang karam jangpii gonyii pumsekpiinii, kabangnah takumpii pyii ai kalei kak, gonyii ai gonyiinii katam swi kalei hangninii mah kabangnah kasang takle katu tei gonyiinii timakde?

¹⁷ Nlenii Saraago halangle kadaponii tinglang hang- niniiki gonyiinii kem mah kabang- nah tiisii leikido gonyiigo ralikapyii kito doukalu kasang gotei gonyii lung matum madumpii gonyiinii swi wotakle.

¹⁸ Gonyiigo kem kito laat mpatpyii takle ninado kasang kamajyii mah kabangnah tiitakle.

¹⁹ Gonyii pum pot kasui jangpiinii meinah mah tingshang rali kito Inii gonyii go tamleile, kadaponii ting- lang hangniniiki gonyiinii gonyiimah pumpot njai hangtei matei kasu kikii, sateichii kisii kem kikii pyii kalei takumpiinii, aitoinii gonyii mah pumpot njai hangtei tiimatei tang karam jangpii kasang kamajyii kikii pyii ailo.

²⁰ Gonyiinii kem mah kabangnah tiisii kalei tinglang kak teinii, gonyii aigo kasang kamajyii kito laat mpat aitakle.

²¹ Nlenii aitoinii gonyiinii ka-nrou tha tiikalei hang kiteito gonyiinii kadapei liipat dou wopo? Teihang mah kito doukalu teinii katai teile.

²² Nlenii aitoinii gonyiigo kem kito laat mpatpyiisii Saraa mah kabang- nah tiikalu kito, gonyiinii doukalat kalu teinii tiimatei kapyii teile. Sateichii teikito dou kalu teinii, kalui kaga karing tiilung teile.

²³ Kada- pokii kem mah katiimai teinii kataile, nlenii nyii Bangpii Krista Jisu zei kito Saraanii matapii kapyii luha teinii kalui kaga karing tiilung teile.