ROMMEI 4 - KARANU KABI SAMTAM

Abrahamnii nda tiikamangou

¹ Satiileponii apum azaitai swisii nyii pao Abrahamnii dou kalu tei kaang kito nyiinii kada lesii tam tangpo?

² Kadaponii mpougo atha kito tiimajyii pyii takleponii; mpounii det tiikamajyii akaangleile, nlenii Saraa doitonii makle.

³ Kabi rasam kito tamle, “Abrahamnii Saraago ma- lumle, sateichii mpoumah kamalum jangpii Saraanii mpougo kasang kamajyiipii lesii lukai pyiile.”

⁴ Amei kata hangninanii atha katii jangpiinii mpoumah katiimai tei pyii leile. Nlenii teitei luha kapyii hangninii lesii poi leimakle; teiteinii mpounii hee kalule.

⁵ Sateichii atha tiikasupii nlenii Saraago tikasu meigo tiimajyii kapyii mpougo kamalumpii mah kamalum teinii kasang kamajyiilesii lukai pyiitakle.

⁶ Atha haisupiinii Saraanii kasang kama- jyiilesii lukai kapyiimei tei sadoi bile, Devit sekpiiniido katam ai takumle.

⁷ “Ahnyii mah kakui kama maga kapyii sateichii ahnyii mah kem gom kabai kapyii ahnyii tei sadoi bile;

⁸ bangpiinii kem fiipyii lak tang karam mei tei sadoi bile.”

⁹ Satoi ai tiigyii malem kalei mei jangpii roiniipo, mak-kii tiigyii malem kasumei pyiiryii kiidopo? Kadaponii nyiinii tamle, Abraham go mpoumah kamalum tei kasang kamajyii lesii lukai pyiitakle.

¹⁰ Teitiileponii kada takumpii tei- tei mpougo lukai pyiitakpo? Mpougo tiigyii malem kasu doito takmanii mak-kii atainiipo? tiigyii malem kaleitainii makle, nlenii mpougo tiigyii malem kasu douto takle.

¹¹ Atainii mpougo tiigyii kamalem sateichii mpoumah tiigyii kamalem teinii, mpoumah kamalum jangpii mpougo tiigyii malem kasu- nato Saraanii kasang kamajyiipii lesii lukai kapyii mah tiikamangou siiti hangninii tiisii mangoule. Teijangpii tiigyii malem kasunato Saraa go ka- malum mei sateichii mpounii kasang kamajyii meilesii lukai kalumei hang mah Apfii tei mpougo tiimatu tang karam jangpiile:

¹² Mpounii tiigyii malem kaleimei mah Apfii teile, katunii tiigyii kamalem pyiiryiito kisii, nyii pfii Abrahamnii tiigyii malem kasu douto kamalum tiilung lung kalei takumpii lungkaleimei mahdole.

Saraamah riishii ai kamalum paikito doule

¹³ Kadaponii Abraham sateichii mpoutaa mpounahmeigo sazyii pouryii ai ahnyiinii mahtou toutang lesii riishii tiikapyii tei ajaitingshang paito gongmakle, nlenii kamalum mah kasang kamajyii paito gongle.

¹⁴ Kadaponii ajaitingshang go kaswi- mei teinii mahtou tei tou woleponii, kamalum tei kadak aitakle, sateichii riishii tiikabam tei samah kado kasu hangninii tiimalei aitakle.

¹⁵ Ka- daponii ajaitingshang teipii rakarhii tei tii-mpatle, nlenii ajaitingshang kaga niteinii kem kama teido gale.

¹⁶ Teijangpiinii kamalum tai swile, kadapokii riishii tiikabam tei lungsyii kati kito gong tang karam jangpii sateichii mpoutaa mpounah meihang dakii madousupii pyiitang karam jangpii ajaitingshang tai kaswi meigo roina makle, nlenii Abraham mah kamalum njai poihaisii kalei meigodo pyiitang karam jangpiile, kadapokii mpounii nyiihang mah rangii mah Apfii teile.

¹⁷ Abrahamnii kamalum, kataigo tiimaring kapyii sateichii mpoumah kakhatsam teipii kamarong hangtei tii-mpat kapyii Saraa mah mikjot kito riishii tii kapyii tei bitakle: kabi rasam kito katam takumpii, “Inii n-go lui hangkii mah pfii tiipyii takle.”

¹⁸ Mpounii kamalum kito malum kalak gotei malum wole, lui hangkii mah pfii tiitang karam jangpii, kabi rasam kito katam takumpii, “Gotaa gonahmei tei sageiti zyiikii tangle.”

¹⁹ Teidou tei mpou tingkum Haikii kakum tingtakle, nlenii kataimei takumpii kabam mpoupum gotei mpounii maningsii mak-kii mpou nou Sarahnii Saraaniiga tei maning gongsii mpounii mpoumah kamalum tei nkiitu makle.

²⁰ Nlenii Saraanii riishii tiipyii kabam gotei malum kasu tiisupii mpoumah kamalum teinii mpougo toisupii, mpoumah ka- malum teipii mpougo atei mahampii tokryii pyiile, sateichii mpounii Saraago tam matoile.

²¹ Sateichii Saraanii riishii tiipyii kabam tei tiido tiipyii builesii mpou lung kito sat tosii kamalum tei tei buibui tutakle.

²² Teijangpiinii Abraham go, “Mpou- mah kamalum jangpii kasang kamajyii piilesii Saraanii lukai pyiile.”

²³ “Nlenii mpougo kasang kamajyii piilesii lukai kalu samkangtei mpou jangpii roina ryiibam makle.”

²⁴ Nlenii nyii Bangpii Jisugo katai kito tiimaring kapyiipiigo kamalum meihang, kasang kamajyii meilesii lukai pyii tang karam nyiimei hang jangpiiniido ryiibamle.

²⁵ Jisu go nyii kem jangpii gitoi takle, sateichii nyiigo tiimajyii pyii tang karam jangpii tiimaring pyii takle.