ROMMEI 3 - KARANU KABI SAMTAM

¹ Teitii leponii Jehudimei mah ajhii kabi kadapei leipo? Makkii tiigyii kamalem mah mai kadapei leipo?

² Akaang hang kito hangkii leile, karei reisang kito Jehudimei dakii Saraanii mpoumah samtam tei kaipyii takle.

³ Kadaponii kangkanii malum suleponii kadapei pat tangpo? Ahnyii mah kamalum tang kasu teipiinii Saraago malum kamajyii tei samah kado kasu tiimalei tangpo?

⁴ Teisang teimakle, meihangnii kachuitu kado Saraanii kasang tei tangle, ryii kabam aitakumpii: “Gosam tam kito n-go tiimajyiipyii wokabui jangpii, sateichii n-go samtak katii ngam wokabui jangpii.”

⁵ Nlenii nyii mah tiikama teipiinii Saraa mah kasang gotei mangou leponii nyiinii kadapei tam tangpo? Rakarhii teipiinii powrui kalei Saraa ai kasang sutakpo? Inii meinah hangninii tiisii tam leile.

⁶ Teisang teimakle, kadapokii teitii leponii Saraanii sazyii pouryiigo kada takumpii samtak tiitangpo?

⁷ Nlenii gumah kasang kasupiinii kasang gotei tam mpatsii mpou mah pumtei kava tei tiimadi woleponii, n-gudo kadapei kaang jangpii aitoi katang kem katiimei lesii samtak tiileipo?

⁸ Kabi pat matu tang karam jangpii, nje kashyii tiilesii kadajang- pii nyiinii tam lakpo? Teitakumpii nyiinii tamlesii mei kangkanii n-gu choisii tamkai pyiile, ai kakum meigo tam mashyii majyiile.

Mei kado kasang kamajyii gale

⁹ Teitiileponii kadapeipo? Nyii ai ahnyii doito kisii bipo? Makle, kaang gale; kadapokii Grikmeido, Jehudi- meido meihang kem kangto leilesii nyiinii ndouto mangou takle.

¹⁰ Ryii kabam ai takumle: “Kasang kamajyii mei kado gale, gale, meikado gale;

¹¹ mei kado kasakai gale, Saraago kafiimei mei mei kado gale.

¹² Saraa dato meihang tat tutakle; ahnyii hang kaswisii tatma tutakle, kamajyii tei mei kado tiisutakle; mei hangninii kado gale.”

¹³ “Ahnyii mah karok teinii laat kabam roubam teile, ahnyii mah malyiipii kachui sam tamle” “Sanhii mah kara teipii ahnyii mah kiitai kangto leile.”

¹⁴ “Ahnyii mah mwi tei kasheeng sateichii kakaapii tokryiile.”

¹⁵ “Ahnyii-pipii azai tii mpat tang karam jangpii kapak maringle.

¹⁶ Kaga ninado kamage tei ahnyii mah pwidi hang kito leile,

¹⁷ sateichii kamajung pwidi tei ahnyiinii timakle.”

¹⁸ “Ahnyii mikjot kito Saraago kahing tei gale.”

¹⁹ Sateichii ajaitingshang kiteito tam kalei hang teipii mwihang go makat tang karam jangpii sateichii sazyii pouryii hang go Saraa doito samtak tiimatu tang karam jangpii ajaitingshang kangto nkangsii lung kaleimei hang dakii tam leile katu tei aitoinii nyiinii titakle.

²⁰ Kadaponii ajatingshang mah atha teipiinii mpou mikjot kito meigo kado tiima- jyiipyii lakle, kadaponii ajaiting- shang paito kem katu tei tigongle.

Kada takumpii Saraanii nyiigo tiimajyii pyiipo

²¹ Nlenii aitoi ajaitingshang haisupii Saraa dato tiimajyii kapyii tei mangoupyii takle, teitei ajaiting- shang teipii ninado Lungkaka- lingmei hangnii sakchyii pyiile,

²² Saraanii meinahgo tiimajyii pyiile ahnyiinii kamalum Jisu Krista paikito, Krista go kamalum mei hang go Saraanii ai tiipyiile, kadaponii samah kado tam kaki gale;

²³ Kadaponii meihang kem tiitakle ninado Saraa mah keikapyii kaleini teito dhiisii tutakle.

²⁴ Nlenii Jisu Krista dato kalei kaleikapyii paikito mpou mah jumage kapyii teipii ahnyiigo matapii tiimajyiipyii takle.

^25-26 Saraanii Ahgo pyiile, kadaponii kamalum paikito meinah mah kem tei mpounii karatsii taikapyii teipii meinah mah kem tei tiimateipyii matu tang karam jangpii Saraanii ai tiipyiile, mpoumah kasang kamajyii tei tiimangou tang karam jangpii. Tinglang kareiki mpoumah leh kati teipii meinah mah kem hangtei fiiseisu takle, nlenii aitoi tinglang kinii mpounii ahnyii mah kem hangtei fiisii leile, mpoumah kasang kamajyii tei tiimangou tang karam jangpii. Aitiisii Saraanii mpousek ai kasang kamajyiile sateichii mpounii Jisugo kamalum meihang go tiimajyii pyiile katu tei mangoule.

²⁷ Teitii leponii nyiinii detdi kabui kaang kadapei leipo? Samah kado gale, sateichii ai ai kadapei kaang jangpiiniipo? Nyiinii ajaitingshangnii katam kaswi jangpiipo? Makle, nlenii nyiinii kamalum jangpiiniile.

²⁸ Kadaponii ajaitingshang mah atha tei haisupiinii mei hangniniigo tiimajyii pyiilesii nyiinii malumle.

²⁹ Mak-kii Saraa ai Jehudimei mah Saraa roiniipo? Mpou ai lui kakimei hang mah Saraado makpo? Nle, lui kakimei hang mahdole.

³⁰ Saraanii hangniniile, tei taiswisii tiigyii malem kaleimeigo ahnyii mah kamalum kito sateichii tiigyii malem kasumeigo ahnyii mah kamalum paikito mpounii tiimajyii pyiitangle.

³¹ Teitiileponii ajaitingshang gotei kamalum aipii nyiinii tiitoi aitakpo? Tiisang tiitoi- makle, nlenii ajaitingshang gotei tiisangting leile.