ROMMEI 2 - KARANU KABI SAMTAM

Saraa mah samtak katii

¹ Teijangpii he samtak katii meihang n-go magapyii tang karam gale; kadaponii nangnii meigo samtak tiisanii ahnyiinii katii tei nangniido tiikalei kito nangnii goroinapii tiima aitakle,

² sateichii aikakum tha tiisii kaleimei phyii- ryiikii Saraa mah samtak katii tei madousupii gongle katu tei nyiinii tile.

³ Sateichii aikakum tha tiisii kaleimeigo samtak katiimei sateichii nangniido teitha tei tiisii tiisii kalei, he ameinah nangnii Saraa mah samtak katii kiteito nlek wobui lesii maning leipo?

⁴ Makkii Saraa mah ajai kabipii n-go lung kali matu tang karam kikii chyiitat pyiile katu tei tisupiinii mpou mah lung kasyiimah koikati, sateichii leh kati hang gotei nangnii maning mala leipo?

⁵ Nlenii golung katei sateichii lung kalinyii kasu teipii Saraa mah rakarhii sateichii kasang kamajyii samtak katii piinei mangou tang karam kak gopum sek jangpii rakarhii tei nangnii goroinapii poi nkom bam takle.

⁶ Kadaponii mpounii meihang go mpou mpou mah atha taiswisii alangh pyiitangle.

⁷ Mei kangkanii tha kabi tei tiisii tiisii pumtei kava go sadzyii ngariit katiigo, sateichii gakalak karing go fiisii bamle. Ahnyii dateikii Saraanii kalui kaga karing tei pyii tangle.

⁸ Sateichii mei kangkanii mpou jangpii roinii fiisii kasang kamajyii gotei mazhii supii kama tai swi kanyiimei gotei Sa- raanii ahnyii phyiiryiikii mpoumah rakarhii ninado ngou kahing tei rui mpat tangle.

⁹ Kashyii kahong tha katiimeihang go kamage kalak tei gongtangle, karei reisang kito Jehudimei jangpii sateichii lui kaki kakimei jangpiido.

¹⁰ Nlenii karei reisang kito Jehudimei dakii satei- chii Grikmei godo tha kabi katiimei hang dakii pumtei kava, sadzyii ngariit katii sateichii kamajung tei tangle.

¹¹ Kadaponii Saraanii meiju jumakle.

¹² Ajai tingshang gasii kama tiikaleimei hangteinii ajaitingshang haisupii gatu tangle; sateichii ajai- tingshang kangto kem tiikalei meihang gotei ajaitingsang teipiinii samtak tiitangle.

¹³ Kadaponii ajai- tingshang gotei shii kalumei teinii Saraa doito kasang kamajyii tei makle, nlenii ajaitingsang taiswisii atha katiimei gotei tiimajyii pyiitangle.

¹⁴ Lui kakimei teinii ajaitingshang tei gale; nlenii ajai- tingshangnii kadapei tiiloziipo katu tei ahnyii lungswi kamaning kati teipii tiitusekkii teitei ahnyii mah ajaitingshang takle, ahnyiinii ah- nyiimah ajaitingshang tei gakido.

¹⁵ Kadapokii ahnyiinii ahnyii lung kikii ryiikai kabam ajaitingshang mah atha tei mangoule, sateichii ahnyiimah kasang mak-kii kama tei lungswi niido sakchyii pyiile, sateichii ahnyii swi tei hangni hangniniigo katheisii ahnyiigo kama lwikai pyiile, mak-kii ahnyii go dang pyiile.

¹⁶ Samtak katii piinei leimik gumah kabi rasam taiswisii Saraanii Jisu Krista paito ameinah mah kama- kum hang gotei samtak tiitangle.

Jehudimei sateichii ajaitingshang

¹⁷ Nlenii nangnii goroinapii Jehu- dimeile katu azei tei latsii leileponii ajaitingshang gotei bhangsii leile- ponii Saraa dato leile katu det katii tei leileponii.

¹⁸ Mpou mah kamaning tei tileponii ajaitingshang kiteito ralikalu teipii kisii kabi ngamlesii maning leponii.

¹⁹ Sateichii ajai ting- shang kito swikati sateichii kasang mah ajai tei nangnii dou wosii mik kachet meigo kasangpii chyiikatat- mei hangninii leponii kamyii kito kaleimei jangpii kava hangniniile leponii,

²⁰ swi kagameigo tiika- majyiimei hangniniile leponii, Anah meigo madhiikapyiimei hangninii leponii.

²¹ Teitiileponii mei kakimeigo madhiipyiisii kalei nang goroinapii n-go rali lakpo? Raga sulosii tam ralipyiisii kalei nang ragaleipo?

²² Sapwimeigo mashung maha sulo sii katampii nang sapwimeigo mashung maha leipo? Ating atugo ka-nraangpii nang sara dato ragaleipo?

²³ Ajaitingshang kito det katiipii nangnii ajaitingshang tei tii- paksii Saraago sadzyii ngariit tiikasu tiileipo?

²⁴ Kadaponii ryii kabam takumpii, “Gonyii jangpii luikaki katiimei kak kito Saraa zeigo tam mashyiisii bamtakle.”

²⁵ Kadaponii nangnii ajaiting- shang go kaswimei tiisii leileponii tiigyii kamalem tei mai lei kasangle; nlenii nangnii ajaitingshang tei tiikapak mei tiisii leileponii Gomah tiigyii malem kabam tei tiigyii malem kasu ndat tutakle.

²⁶ Teijangpiinii tiigyii malem kasumeinii ajaiting- shang kito katam tei tiisii ryiisii leileponii mpoumah tiigyii malem kasu tei tiigyii malem kalei takumpii poilakpo?

²⁷ Sateichii tiigyii malem kasumeinii ajaitingshang tei tiima- sangsii leileponii larek kikii ryii kabam ajaitingshang sateichii tiigyii malem kalei tei godato leikido ajaitingshang go tiipaksii kalei n-go mpounii samtak tiilakpo?

²⁸ Kada- pokii apoupii Jehudimei katii teinii Jehudimei makle, sateichii apum kito apoumah tiigyii kamalem teinii tiigyii malem makle.

²⁹ Nlenii alungto Jehudimei katii teipii Jehu- dimeile sateichii ryiikabam agekpii supiinii rangiipii alungmah tiigyii kamalem, teipii kasang tiigyii kama- lemle mpougo tam kamatoi teinii meinah dato makle, nlenii Saraa datole.