ROMMEI 16 - KARANU KABI SAMTAM

Salam kapyii

¹ Kenkriya charsh kito Saraa nga ngakaleipei nyii taipwi Phoibigo gonyiinii kamateimei takumpii Bangpii zei kito lukai pyii matu tang karam jangpii Inii gonyii dakii tamleile;

² sateichii mpoupeinii gonyii dato mpoupei jangpii bitang karam tha tiikaha kata kara khang- leponii, gonyiinii mpoupeigo tiihalo, kadapochiinii mpoupei ai meihangkii jangpii sateichii gujangpiinado tiihasii kalei mei hangniniile.

³ Krista Jisudato n-gu kaswisii tha tiisii kalei Prescilla nei Akuila go Salam pyii leile;

⁴ kataigo hingsupii, gumah karing jangpii kagung joikapyii ahnyii dakii, I-roi supiinii luikakimei mah charsh hangniido hakalang tei pyii leile.

⁵ Ahnyii kilungto kalei charsh godo salam pyii leile, Asia kito Krista go lukai karei rei sang gumah lungkasyii akangpii Ipinetago salam pyii leile.

⁶ Gonyii kak kito teisii tha tiikapyiipei Meri go salam pyii leile.

⁷ Gutat gureng kito kapatmei sateichii kabang kito n-gu kaswisii bam kaleimei Andronikas nei Junias go salam pyii leile. Ahnyii teinii tiilamlwi kapyiimei hang kak kito Jutisii sateichii gudoito reisii Krista dato kaleimeile.

⁸ Bangpii zei kito gumah lung- kasyii Ampliyatas go salam pyiileile.

⁹ Krista zeikito nyiigo njoisii tha tiikaleimei Orbanas sateichii gumah lungkasyii Stakisgo salam pyiileile.

¹⁰ Krista zei kito mazhiipyii kalei, Apehlisgo salam pyii leile, Aristbulas ki kalung mpung kito kaleimeihang go salam pyii leile.

¹¹ Gutat gureng kito kapat Herodiyon go salam pyiileile Narsissas ki kalung mpung kito kaleimei hang go Bangpii zei kito salam pyii leile.

¹² Bangpii zeikito tha tiisii kalei- mei pwi Triphina ninado Triphosago salam pyiileile. Abangpii zei kito teisii tha tiikapyiipei lungkasyii Parsis go salam pyii leile.

¹³ Bangpii Jangpii kalei kalu Rufas go sateichii mpou pwido gu pwido tiisii kalei pwigo salam pyii leile.

¹⁴ Asinkritas go, phlegon go Harms go pattrobas go Harmas go sateichii ahnyiigo kaswisii bam kaleimei kangsanamei hang go salam pyiileile.

¹⁵ Philolo- gasgo, Juliyago, Nerios ninado mpou taipwigo sateichii Olimpasgo sateichii ahnyiigo kaswisii bam kalei kama- teimei hang go salam pyiileile.

¹⁶ Kamatei lungkasyii mah kama- twum teipii hangninanii hangniniigo salam tiilo Krista mah charsh hangnii gonyiigo salam pyiileile.

Kalui tiisii tam rali kapyii

¹⁷ Kangsanamei, Inii gonyii dato khangleile, gonyiinii doukalu samtam gotei kaswisupii malatpii tiikapak tiikapang katii sateichii sadoi ka- shyii tiikakai ahnyii gotei ju tiwolo, sateichii ahnyii dateito mpaa wolo.

¹⁸ Kadaponii tei kakum mei teinii nyii Bangpii Krista nga ngamakle, nlenii ahnyii mah chiikanyii lukanyii jangpiiniile, sateichii ahnyii mah samlat kabi ninado tam kati teipii mei kabimei lungtei choisii hemle.

¹⁹ Kadapokii gonyiimah katam kaswi tei meihangnii titakle; teijangpiinii Inii gonyiimah kaang kito ntale, nlenii gonyiinii kabi lamto kasakai, sateichii kashyii lamto kama gasii lungkatu ai Inii mareile.

²⁰ Teitii- leponii kamajung mah Saraa teinii seitan gotei kalangsii gonyii pi kang- kii koumang biitnai matu tangle. Nyii Bangpii Jisu Krista mah jumage kapyii tei gonyiigo kaswipyii matulo.

²¹ N-gu njoisii tha tiisii kalei Timothi sateichii gutat gureng kito kapat Lusiyas, Jason sateichii Sosi- patar-niido gonyiigo salam pyiileile.

²² Chiti ai karyiipii Tertios, Inii Bangpii zei kito gonyiigo salam pyii leile.

²³ N-gu sateichii charsh hang go ki karhiini pyiisii kalei Gaiyasnii gonyiigo salam pyiileile, Namdi mah Sana kajumpii Irastas ninado nyii sanapii Kowartasnii gonyiigo salam pyiileile.

²⁴ Nyii Bangpii Jisu Kris- tamah jumage kapyii teipii gonyii hang go kaswi pyii matulo.

Kalui tiisii kariita sateichii tam kamatoi

²⁵ Aitoinii gumah kabi rasam taiswisii sateichii kamakum sam mati mangoupyiisii Jisu Krista mah kaang kito tam rali kapyii taiswisii, gonyiigo tiisangting pyiiwo kabui mpoudakii Inii gonyiigo pyii leile.

²⁶ Tingkum tinglang katangkii ka- makum sam tei kabaisii kai kabam tei aitoinii matimangou pyii takle, sateichii Saraamah lungkakalingmei mah ryiikabam paikito kalui kaga Saraamah kakhatsam taiswisii luihang dakii kamalum mah katam switang karam jangpii mati mangoupyii takle.

²⁷ Hangninii roinii kalei kamatei Saraa dakii Jisu Krista paito, kalui gasii tam matoi matulo. Amen.