ROMMEI 14 - KARANU KABI SAMTAM

Gosanapiigo samtak tiisulo

¹ Kamalum kito kasuimeigo lukaipyiilo, nlenii mpoumah kamaning gotei samtak tiitang karam jangpii makle.

² Kamalum kito kasui mei teinii sagei hiinhii roinii chii kalei kak, mah kata kara hang chii katu mazhiile katumei hangninii mah kamalum tei leile.

³ Kachiipii teinii chii kasupii gotei maning kamala tei tiimatu sulo, sateichii chiikasupii teinii kachiipii gotei samtak tiimatu sulo, kadaponii Saraanii ahgo lukaipyii aitakle.

⁴ Mei kaki hangninii mah kikaleimeigo samtak tiikalei nang tapo? Mpounii sat tang karam mak-kii koutang karam tei mpoumah apumpii teinii kamaningpii sat tangle, sateichii mpounii sat tangle kadaponii apumpii teinii mpougo sat matuwo buile.

⁵ Mei hangninanii leimik hangninii gosung leimik hangniniigo bibwilesii maningle; mei kaki hangninanii leimik hang njoiham lesii maningle, Meihangnii mpou mpou lung kito tiigatpii tisii sat matulo.

⁶ Leimikgo ryii kaleimei teinii Bangpii jangpii tiiziile, kadaponii mpounii Saraago hakalang pyii kalei taiswisii sateichii chiikasupii teinii Bangpii jangpii chiisupii Saraago hakalang pyiile.

⁷ Kadaponii nyii meikado mpou roinii jangpii ringmakle, sateichii mei kado mpou roinii jangpii taimakle.

⁸ Kadaponii nyiinii ring kado Bangpii jangpii ringle, sateichii nyiinii tai kado Abangpii jangpii taile.

⁹ Kadaponii Kristanii katai ninado karing hangna mah Bangpii tiitang karam jangpii, aikaang kito mpounii taido taipyii takle, sateichii ringdo ringkhiipyii takle.

¹⁰ Kadajangpii gosanapii phyiiryiikii nangnii sam- tak tiileipo? mak-kii kadajangpii nangnii gosanapiigo mala leipo? Kadaponii nyiihang Saraa mah samtak katii bam doito sat tangle.

¹¹ Kadaponii aitiisii ryiibamle: “Inii ring kalei taiswisii, Abangpiinii tamle, liikok hang teinii gudoito kok kum tangle, sateichii mahlyii hangteinii Saraago tam matoi tangle.”

¹² Teipiinii nyii meihangnii Saraa dakii mpou mpoumah atha tei Saraa doikii pyiitangle.

Gosanapiigo tiikou sulo

¹³ Teijangpii nyiinii hangninanii hangniniigo nlailoisii samtak tiisude; Nlenii taisungnii mpou sanapii mah pwidi kikii pi pashui matu tang karam jangpii mak-kii kou matu tang karam jangpii, pwidi kadang pot hangninii kado kaisang kailakle katupii lung sat tolo.

¹⁴ Mah apot roinapiinii mateikasu samah kado gale, katu Inii tido tile, Bangpii Jisumah paikito malumdo malumle; nlenii matei maklesii kamaningmei jangpiinii teitei matei sutakle.

¹⁵ Kadaponii nangnii kachii pot teipiinii gosanapiigo rajam matu leponii, nangnii lungkasyii kiteito tat sutakle, Kristanii mpoutung tiisii taipyii kalei ahgo, gomah kachii kasak pot teipiinii tiimaga aisulo.

¹⁶ Gonyiimah kabi gotei tam mashyii matusulo.

¹⁷ Kadaponii Saraa mah sating sazyii teinii kachii kasak tei makle, nlenii rangii kamatei kito kasang kamajyii, kamajung sateichii ka-nta teile;

¹⁸ teipiinii Krista nga ngakaleimei hangtei Saraa doito lukai kamajyii sateichii meiniido kamazhii teile.

¹⁹ Teijangpiinii tiikamajung satei- chii hangninanii hangniniigo tiimadi tiimathang tang karam tha taitei swisii tatde.

²⁰ Kachiipot jangpii Saraamah tha tei tiimaga sulo, mah pot hang mateile, nlenii mpounii chii kalei pot teipii mei kakimeigo kou matu katu tei mei kata hangninii jangpiinii kamale.

²¹ Kamyii kachii teipii, mak-kii jou kasak teipii, mak-kii mah kata kara hangninii katii teipii gosanapiigo pi pashui matu katu samah kado tiikasu bile.

²² Gomah kamalum kalei tei Saraa gonei kak kito bam matulo: Mpounii mazhiipyii kalei kiteito mpou roinapii mpougo samtak tiikasu ahtei sadoi bile.

²³ Nlenii maning kariirhiimei teinii chii leponii, kama lwikai takle, kadaponii teitei kamalum kito tiimakle; kadapokii kamalum kito kasu hangteinii kemle.