ROMMEI 13 - KARANU KABI SAMTAM

Apum katii teimaham kajum mei kang nkang tang karam

¹ Meihangnii apum katii teima- ham kajum mei kang nkang matulo; kadaponii Saraa dato supiinii apum katii teimaham kajum mei gale; sateichii ringsii kalei apum katii teimaham kajum mei hangtei Saraanii kaibam takle.

² Teijang- piinii apum katii teimaham kajum meigo mazhii kasu tha katiimei teinii Saraanii kalai kabam gotei mazhii sutakle, sateichii mazhii kasumei tei ahnyii phyiiryiikii samtak katii tei doutangle.

³ Kadaponii apum katiimei teinii kabi tha katii kito tiimahing makle, nlenii kashyii tha kitole sateichii nangnii apum katiimah teimaham kito kabam mei gotei hinglakpo? Kabi tei tiilo; teitii leponii apum katiimei dato nangnii tam kamatoi tei doutangle:

⁴ Kada- ponii mpounii gomah bitang karam jangpii Saraa nga nga leile, Nlenii nang kashyii tha tiileponii, hinglo; kadaponii mpounii poi kalei saryii- khang tei matapii poimakle; kadaponii Saraa nga kanga kashyii tha katiimei pyiiryiikii mpoumah rakarhii jangpii tha tiimatu tang karam jangpiile.

⁵ Teijangpii Saraa mah rakarhii kito nlek tang karam jangpii roisupii, kabi kashyii titang karam lungswi jangpii gonyiinii apum katiimei kang nkang tang karamle.

⁶ Kadaponii ai kaang jangpii gonyiinii ahado pyii leile, kadapokii ahnyiinii tha ai jangpii taksupii lungliitsii Saraa nga kangamei tiileile.

⁷ Pyii kamajyii meihang dakii pyiilo; aha pyii kamajyiimei dakii aha tei pyiilo, sazyii ha pyii kamajyiimei dakii sazyii ha tei pyiilo, adzyii-nrou kamajyiimeigo adzyii nroulo, sadzyii ngariit tiikamajyii meigo tei sadzyii ngariit tiilo.

Hangninanii hangninii jangpii tiikamajyii tha

⁸ Hangninanii hangniniigo lung- kasyii mah pow teisupiinii mei mah kado, mah hangninii kado pow pungsii leisulo; kadaponii mpouki tiinaniipameigo lungkasyiimei teinii ajaitingshang gotei gongmatwi ma- tule.

⁹ Kadapokii “Nangnii mashung maha lakle, nangnii meigo gilakle, nangnii raga lakle, nangnii lunyii lakle,” sii, ajaitingshang kito katam sateichii ajaitingshang kaki leile- ponii, “Nangnii goki tiinaniipameigo nangnii goroinapii n-go lungkasyii takumpii lungsyii tang karamle,” katu sam hangtei aikikii poi nja aitakle.

¹⁰ Lungkasyii teipii mpouki tiinaniipameigo kashyii tiilei makle; teijangpiinii kalungsyii katu teipii ajaitingshang go gongmatwi matule.

¹¹ Aidoito kisii aitoi kadapei ting- langpo katu gonyiinii tile, katunii, aitoi zyiisii kalei kito gungkhii tang karam tinglangle; kadaponii nyiinii ndou malum kalu tinglang doito kisii nyiijangpii aitoinii kalei kapyii karing tei nabui bui leitakle.

¹² Tinghum tei tat tutakle, tingna tei nagong leitakle; teijangpiinii kamyii mah tha hangtei nyiinii rat toisii kava mah saryiinat tei kaiwode.

¹³ Nyiinii kavaki tat kalei takumpii tat majyiile; ajai kasu sateichii jou sak kapiinhii, kashyii kahong tha katii, sateichii ngou kashyii tha katii, n-gee razyii kapat sateichii kamai- mhii tei tiisude,

¹⁴ nlenii gonyiinii pei bakalei takumpii Jisu Kristago bawolo, sateichii apum azaimah kamaning kamarei tiitang karam jangpii tiikada sulo.