ROMMEI 12 - KARANU KABI SAMTAM

Saraa tha katii kito lungtang karam tiilung

¹ Teijangpiinii, he kangsanamei, gonyiinii gonyii pum hang go karing, kamatei sateichii Saraago tiikaranga kakarat pot hangninii takumpii pyiitoi matu tang karam jangpii, Inii Saraa mah lungset kati mah paito gonyiigo khang leile; ai ai gonyii mah rangii mah kamata teile,

² Sazyii pouryii mei mah ajairali gotei poisulo, nlenii Saraanii kama- ning kamarei kabi sateichii lukai kamajyii sateichii bikamatui tei gonyii tikabui tiisii gonyii lung kali katu teipii tiikali ailo.

³ Sateichii Saraamah jumage kapyii luha tei gudakii pyii kabam jangpii Inii gonyii hang dakii tam leile, gonyiinii maning tang karam sung kisii gonyiinii gonyii roiniipii maning sagoiki sulo, nlenii gonyii- mah kamaning kito lungmanoilo, sateichii Saraanii gonyiigo pyii kabam kamalum taiswisii gonyii roinapiinii samtak tiilo.

⁴ Kadapokii apum hangninii ki apum mah njai tei hangkii leile, sateichii pum njaihang teinii tiitang karam tha tei njoi makle;

⁵ teitakumpii nyii ai mei amoikado nyiihang Krista dato apum hangniniile, sateichii apum mah njai hangteinii apum kikii poi kamathok kabam takumpii nyiihangdo hang- ninanii hangninii dakii poi kamathok bamtakle.

⁶ Sateichii nyii dakii pyii kabam jumage kapyii taiswisii ka- taam kataam luha douwo kalu Saraa sam tam ka-mpat kado, nyiimah kamalum taiswisii tam mpatle;

⁷ anga kanga mah leponii, nyiinii ngatang karamle; meigo karali mah leponii, nyiinii rali tang karamle;

⁸ Meigo lung tiimaring tang karam mah leponii, nyiinii teitei tiitang karamle, meigo njaipyii kaleimei hangteiniido kamathii katu gasii tiitang karamle; apum tiitang karam mah teimaham kajum meihang teinii, teisii tha tiitang karamle, meigo lungsyii kapyii tha tiikamangou mei teiniido, nta ntasii tiitang karamle.

⁹ Lungkasyii tei matwisii kasang tang karamle, kashyii gotei nraanglo, kabi tei tiigatpii jumlo;

¹⁰ ki kalung mpung lungkasyii takumpii kangsanamei hangni hangninago kalungsyiilo; sateichii hangninanii hangniniigo adzyii roulo.

¹¹ Tha teisii tiilo sateichii mahatshyii sulo, lung matum madum pyiisii Saraa nga ngalo;

¹² gonyii mah maning kamalum kito rangalo, kamage kalak kito leh wolo; kariita kito taksulo.

¹³ Kamateimei hang mah bitang karam jangpii pyiilo; siisang meigo nta ntasii lukeilo.

¹⁴ Gonyiigo kaset kalak kapyii meigo satoi pyiilo. Ahnyiigo satoi pyiilo sateichii sheeng sulo.

¹⁵ Ranga kaleimeigo kaswisii rangalo; hat kaleimeigo kaswisii hatlo,

¹⁶ hang- ninanii hangniniigo masambisii lunglo; detdi sulo, nlenii kasana- meigo njasii kaswilo; goroinapii kasakaipii lesii maningsulo.

¹⁷ Meigo kado kashyii jangpii kashyii tei rui kalei sulo, meihang mik doito kabi tha jangpii reipii swi masaklo.

¹⁸ Mazhii kabuita gonyiinii meihang go kaswisii majungsii lunglo.

¹⁹ Lungkasyiimei, gonyii karapii apow karuisulo, nlenii Saraa mah rakarhii kiteikii kaidek ailo; kadaponii aitiisii ryiibam takle; “Pow ruitang karam teinii gumahle; Inii ruitangle, Abangpiinii tamle.”

²⁰ “Nlenii n-go ngou karoumeinii moi mazyii leponii mpougo pyii chiilo; mpounii dwi saryiileponii, pyiisaklo; kadaponii tei kakum tiikapyii teipii nangnii mpou phyiiryiikii shong kalei michiikang dungkai pyiitangle.

²¹ Kashyii teinii ngam malu sulo, nlenii kabi teipii kashyii gotei ngam malulo.