ROMMEI 11 - KARANU KABI SAMTAM

Isrelmei pyiiryiikii Saraanii lungsyii kapyii

¹ Teitii leponii Inii n-nhii leile, Saraanii mpou mah mei gotei rat toi aitakpo? Teisang teimakle, kadaponii Inii Isrelmei Abraham mah tatreng, Benjamin mah sadungle.

² Saraanii ndouto reipii tikalu mpoumah meigo rat toipyii makle. Ilaijah mah kaang kito kabi rasam teinii kadapei tampo katu gonyiinii timakde? Katunii mpounii Saraa dato Isrelmei pyiiryiikii khangle.

³ “Bangpii gomah lungkakaling meigo ahnyiinii gitoi aitakle, ahnyiinii gomah pyiikatoibam hangtei tiitoi aitakle, sateichii I roinii masak takle, sateichii ahnyiinii n-gu fiisii leile.”

⁴ Nlenii mpoudakii Saraanii khela kapyii tei kadalesii tampo? “Bal dakii nkwimang kok kum kasumei tang sana tei Inii Gujangpii kaibam takle.”

⁵ Teitakumpiinii aitoido jumage kapyiipii kalei kalu taiswisii masak kapyii njai hangninii leile.

⁶ Nlenii ai ai jumage kapyii paitole, lepochiinii, ai ai nlailoisii tha kito sutakle; suleponii jumage kapyii tei jumage kapyiiloi sutakle.

⁷ Teitii leponii kadapeipo? Isrel- meinii fiikalei tei dousutakle; nlenii kalai kalumei hangteinii teitei doutakle, nlenii masak kalei mei teinii lung teitakle;

⁸ ryii kabam ai takumpii, “Saraanii ahnyii dakii swi kakamyii mah rangii hangninii katunii, ngouwo kalak mik, shiiwo kalak koi, tei tingnei katangpii pyii takle.”

⁹ Sateikii Devitnii tamle, “Ahnyiimah hang-ngi kito ahnyiigo jum malulo, sateichii maai malulo; ahnyiigo kou matulo, sateichii ahnyiigo tiikamage matulo;

¹⁰ ahnyiinii ngouwo kalak tiisii ahnyii mik tei myii matulo; sateichii kamage kalak teipii ahnyii pou tinglang kaleita n-gui matulo.”

¹¹ Teipiinii Inii n-nhii leile, koutang karam jangpii ahnyiinii pi pasui takpo? Teisang teimakle. Nlenii ahnyiimah kakui kama paito kalei kapyii karing tei lui kakimei hangda gong takle. Isrelmeigo maimhii matu tang karam jangpii.

¹² Sateichii Jehudimei mah kakui kama teipii sazyii pouryiikii kani tei pung gongle sateichii ahnyiimah rangii kasui teipii luikakimei hang dakii kani tei pung gong lepochiinii Jehudimei kalei kaga hangtei poi ndwi leponii satoi tei kadaziikapii diki tangpo?

Luikakimei mah kalei kapyii karing

¹³ Aitoinii lui kakimei gonyii dakii Inii tam leile, kadapochiinii Inii lui kakimei mah tiilamlwi kapyiimei hangninii tiisii, Inii tiikalei gumah atha ai sadzyii ngariit tiile.

¹⁴ Mazhiileponii gupum guzai lamto n-gu njoisii kalei Jehudimei gotei tii maimhii pyiisanii ahnyii mei cheng- niikiigo keiwo tang karam jangpii- niile.

¹⁵ Kadaponii ahnyiigo rat toi kalei teipii sazyii pouryii mah kakubiloi kalu tei lepochiinii ahnyii go lukai kalu teipii katai kito ringkhii kalu teisupii kadapei tangpo?

¹⁶ Sateichii ryiikabam thoknui kang kito pyiitoi kalei njai karei tei matei leponii thoknui kang hangtei mateile; sateichii tingmaa teinii matei leponii tingkaa hang teido mateile.

¹⁷ Nlenii tingkaa kangkanii tuiga leponii sateichii nangnii Saraa- mah sungchyiibang tiisii ahnyii kak-kii n-go masetkai pyiisii sung- chyiibang mah njai tei ahnyii go kaswisii nangnii dou njoisii leileponii.

¹⁸ Tingkaa hang pyiiryiito nryiisii det disulo nangnii detdi leponii, maninglo katunii, tingmaago rung kalei tei nang makle, nlenii tingmaanii n-go rung leile.

¹⁹ Nangnii tam tangle, “N-gu masetkaipyii tang karam jangpii tingkaa tuitakle.”

²⁰ Teitei kasangle, ahnyii tei malum kasu jangpii tuiga takle, nlenii nangnii gomah kamalum paito sat leile, teipiinii detdi tusulo, nlenii hinglo;

²¹ kadaponii Saraanii nuto mpoumah tingkaa hang gotei keipyii suleponii, mpounii n-godo keipyii lakle.

²² Teijangpiinii Saraa mah lungkasyii ninado mpou sam kahung tei julo kou kalei meilamkii mpou sam kahung tei pyiile, nlenii nangnii Saraamah lungkasyii kiteito taksupii leileponii, golamkii mpou- mah lungkasyii teitangle; suleponii n-godo that ndangtoi tangle.

²³ Sa- teichii kakimei teiniido ahnyiimah malum kasuki teito taksupii lei suleponii ahnyii godo masetkaipyii aitangle, kadaponii ahnyiigo nlailoisii masetkai pyii kabui mah teimaham tei Saraada leile.

²⁴ Kadapokii n-go nuto Saraamah sungchyiibang kito tat mpat tosii meinii makot kalei kabi sungchyii bang kikii nuto mpou- tchii supii masetkaipyii leponii, nuto mpoumah katu tingkaa hang aigo, ahnyii mah sungchyii bang gam sek kiteikii, kadaziikapii kisii masetkai- pyii tangpo?

Saraa mah lungsyii kati meihang pyiiryii

²⁵ Kangsanamei, gonyiinii gonyii roinapii kasakaipii lesii maning matu lak tang karam jangpii kamakum sam ai Inii gonyiigo timatu nyiile. Katunii, luikakimei kalei kaga hangnii Saraada gongliit kasuta lungkatei ai Isrelmei pyiiryii gongtakle.

²⁶ Sateichii ai takumpiinii Isrelmei hang go keipyii tangle, ryii kabam aitakumpii: “Kaleikapyiipii teinii Siyon kito gong tangle, mpounii Jakob taa nahmei mah kakui kama hangtei poitoipyii tangle.”

²⁷ “Sateichii Inii ahnyiimah kem tei poitoipyii takle sekchii, Inii ahnyiigo kaswisii tiitang karam gumah sat tang karam samtam tei aitangle.”

²⁸ Kabi rasam mah kaang kito ahnyiinii gonyii mah kaang jangpii Saraago ngou karoumeile. Nlenii kalai kalu mah kaang kito ahnyii peipaomei mah kaang jangpii ahnyii ai lungkasyii meile.

²⁹ Kadapokii Saraanii kalai kalu ninado satoi toikapyiimei mah kaang kito mpou switei kalimakle.

³⁰ Kadapokii tuka- lei tinglang hangniniiki Saraanii katam tei gonyiinii swimakle, nlenii aitoinii ahnyiimah katam swikasu teipiinii gonyiinii lungsyii kati tei doutakle,

³¹ Teitakumpii gonyii dakii mangou kalei lungsyii kati tei ahnyiiniido aitoi lungsyii kati tei doumatu tang karam jangpii ahnyii aido aitoi katam swisutakle.

³² Ka- daponii Saraanii kalei kaga hang phyiiryiikii mpoumah lungsyii kati tei mangou tang karam jangpii mpounii kalei kaga hang go katam swikasu tiisii nam aitakle.

Saraa go tam kamatoi

³³ Saraa mah kani kahii hang ai kadaziikapii dipo! mpou mah swirek kabi ninado maati tei kadaziikapii tukpo! mpoumah samtak sateichii mpoumah pwidi tei tanii fiiwo buipo!

³⁴ “Bangpiimah swi kamaning tei tanii tipo? mak-kii mpougo tanii tam ralipyii wobuipo?”

³⁵ “Mak-kii mpou dakii reipii pyii takpokii mpou dato nlailoisii doutang karam mei ta leipo?”

³⁶ Kadapokii Saraanii amahlyii hang tiipyiile, sateichii amahlyiihang ai mpou dato sateichii mpou paito sateichii mpou jangpii ring leile. Saraago kalui gasii tam matoi matulo. Amen.