ROMMEI 1 - KARANU KABI SAMTAM

Salam katii sam

¹ Jisu Krista ki kalaipii, tiilamlwi kapyiimei hangninii tiisii lat kalu, Saraa mah kabi rasam jangpii kalaikalu Polnii,

² kabi rasam ainii mpou nah sapfii mpou mah akaang kito kamatei kabi rasam kikii lungkakalingmei paito ndou karei kito pyii tang lesii riishii tiikabam teile.

³ Nah sapfii mpou teinii Devit mah atat areng kito lungle;

⁴ sateichii kamateimah rangii reng lamgpangto mpounii katai kito ringkhii kalu kito teimaham go kaswisii Saraa nahle katu tei mangoupyii takle, teitei nyii Bangpii Jisu Kristale;

⁵ Mpou paito nyiinii mpou zei jangpii lui hang kak kito kamalum mah katam switang karam kalungset tei doutakle sateichii tiilamlwi kapyiimei mah bam tei doutakle,

⁶ Sateichii ahnyii kak ki teito Jisu Krista mah tiitang karam jangpii lat kalu gonyiidole.

⁷ Rom kito kalei, Saraanii lung- kasyii meihang kamateimei tiimatu tang karam jangpii lat kalumei hang go nyii Pfii Saraa sateichii Bangpii Jisu Kristanii jumage kapyii Sateichii kamajung tei gonyiigo pyii matulo.

Hakalang mah kariita

⁸ Karei reisang kito Jisu Krista paito gu Saraa go Inii hakalang tamle, kadaponii gonyiimah kamalum tei sazyii pouryii hangnii shiilei takle.

⁹ Kadaponii tinglang kaleita gumah kariita hang kito gonyii jangpii Inii taksupii maningsii leile katu tei mpou Nah sapfii mpou mah kabi rasam kito gu rangii haisii Inii anga nga kalei Saraanii gumah sakchyiile;

¹⁰ katunii, ‘Saraa mah ka- maning kito Inii tinglang hangninii ki gonyiida roigongwo kabui jangpii Inii riita khangsii bamle.

¹¹ Kada- ponii gonyiigo tiisangting pyii tang karam jangpii, rangii mah satoi tei gonyii dakii pyiitang karam jangpii gonyiigo Inii kadounyiile;

¹² katunii, aile nyii hangni hangninii mah kamalum teipiinii gonyii mahdo gumahdo gonyii kak kito n-go n-gu lung tiimadi pyii tang karam jangpiile.

¹³ Inii gonyiigo ai timatu nyiile, kangsanamei katunii, Inii gonyiida gongnyiisii leile. (Nlenii aitoi katangpii n-gu dangsii bamle) gonyii kak kito sateichii lui kakimeihang kak kitodo Inii lu rachet tang karam jangpii,

¹⁴ Grikmei datodo lui kakimei datodo kasakaimei datodo swikagamei datodo Inii apow pung leile:

¹⁵ Teijangpii Inii ngam kabui- tanii Rom kito kalei gonyii dakiido kabi rasam tei tam rali pyii nyiisii bamle.

Kabi rasam mah teimaham

¹⁶ Kadaponii Inii kabi rasam jangpii ka-nrou gale; kadapochiinii teitei kamalum mei hangnii keikapyii karing doutang karam Saraa mah teimahamle; karei kito Jehudimei go sateichii Grikmei godole.

¹⁷ Kada- ponii aikikii kamalum kito kamalum jangpii Saraa mah kasang kamajyii tei mangoupyii takle, aitiisii ryii kabam takumpiinii “Kasang kamajyii meinii kamalum kito ringtangle.”

Lui kakimei mah kashyii

¹⁸ Kadaponii malum kasumei sateichii kashyii kahong tha tiisii kasang go namsii kaleimeigo Saraa mah rakarhii tei sating gamto mangou pyiitakle.

¹⁹ Kadapokii Saraa mah kaang kito tikabui tei ahnyii dakii pyiibam takle, kadaponii Saraanii ahnyiigo mangou pyii takle.

²⁰ Sa- raanii sazyii pouryii tii mpat kalu sekto mpoumah ngoupeiwo kalak ajaitalui, katunii mpoumah kalui kaga teimaham sateichii matei kabi ajaitalui tei tii-mpat kabam amah- lyiihang kito tiigatpii ngousii titakle, Teipiinii ahnyiigo mpatpyii tang karam gale;

²¹ Kadapochiinii ahnyiinii Saraago tikido mpougo Saraa lesii sadzyii ngariit tiimakle, mak-kii mpougo hakalangdo tam makle, nlenii ahnyiimah swi kamaning tei maning kadak aitakle, sateichii ahnyii mah kamang switei myii takle.

²² Ahnyii roinapiinii kasakai- pii lesii tam mpatsii mang tutakle,

²³ sateichii gatutang karam meinah mah akhiinahpii, mak-kii ruinah mak-kii kounah mak-kii moipii chyii- karhiisii katat kounah hang teipii gakalak Saraa mah pumtei kava gotei kahekle.

²⁴ Teijangpiinii ahnyii kak kito ahnyii pum tei adzyii ka. nrou gamatu tang karam jangpii, Saraanii ahnyii go ahnyii mah lungswi teinii kamarei ka nta kiteikii hongmatu tang karam jangpii mpatpyii takle;

²⁵ kadapokii ahnyiinii Saraamah kasang gotei kachoipii kaheksii tiika- pyii Bangpii mah atungkapii mpounii tiikalu baichem gotei matado mata tutakle, angado ngatu takle; tiika- pyiipii Abangpiigo kalui gasii tam matoilo Amen.

²⁶ Akaang aijangpii Saraanii ah- nyiigo hangkeng kaga maning marei kikii mpatpyii takle. Ahnyii noumei teinii ameinah jai tingshang katii gotei ajaitingshang kasu kikii kadat kaitakle.

²⁷ Sateichii ajai aitakumpii sapfiimei teinado sapwimeigo ajai taiswisii kaswi katu tei toisii ahnyii maning marei teipii hangninanii hangniniigo misung takumpii sungsii sapfiimei karapii ka-nrou tha tei kaswisii tiitakle, sateichii ahnyiimah kama mah doutang karam riiti tei ahnyii roinapii mpou mpou gamto doutakle.

²⁸ Kadaponii ahnyiinii Saraa mah kasang swikati tei lung kikii kaibam kasu jangpii Saraanii swilat kashyii kahong kikii sateichii ajai tingshang kashyii kikii kai aitakle.

²⁹ Ahnyii teinii kashyii kahong, ajaitingshang kashyii, lukanyii, kamaimhii, kama- lung piinii katokryii, meigo kagi, n-girazyiipii, kachuipii, kakaloupii, kasampeipii.

³⁰ Saraago ngou karou- pii, kashyiitha poi ka-mpatmei, pwi pfiinii katam swikasu,

³¹ Swikaga, riishii tiikapakmei, mei lungkasyii kaga, lungsyiiti kasupii tokryiile.

³² Aikatii tha tiisii kaleimei teinii tai majyiile katu tei mei aimeinii Saraamah kakhatsam tei tisii teitei katii roisupiinii tei tha katii meihang godo mazhii pyii takle.