PHILIMON 1 - KARANU KABI SAMTAM

¹ Krista jangpiinii kabang kilungto kalei Pol ninado nyii kangsanapii Timothi dato– Nyii kangpii ninado nyiigo njoisii tha tiikalei Philemon.

² Sateichii gokito gong kadousii kalei charsh ninado nyii taipwi Aphiya ninado nyiigo njoisii Saryii tiikalei Archipas dakii.

³ Nyii pfii Saraa ninado Bangpii Jisu Kristanii jumage kapyii ninado kamajung tei gonyiigo pyii matulo.

Philemon mah lungkasyii ninado kamalum

⁴ Kangsanapii Philemon, Inii kariita tatei Inii n-go maningsii gu Saraa go Inii hakalang tei pyiile.

⁵ Kadapokii Saraamah meihang jangpii nangnii lungkasyii kabam ninado Bangpii Jisugo nangnii kamalum kabam tei Inii shiitakle.

⁶ Gumah kariita teinii kamalum meihang tiisii nyiinii n-go nja katu aipiinii Kristago njasii hangninii tiikalu nyiimah tiilung kito doukalu satoi hangmah kaang kito tuksii kati tei poigong matutang karam aile,

⁷ lungkasyii, kangsanapii gomah lungkasyii teipiinii n-gu hangkapii ka-nta ninado lung tiikamadi tei pung gongpyii takle; Saraamah meihangmah lung hangtei nangnii tii ntapyii takle.

Onesimas jangpiinii kakhang

⁸ Kaang aijangpii tiikamajyii tha tei tiimatu tang karam jangpii, godakii kakhatsii tam tang karam tei Krista zeikito Inii madupii tiiwo buile.

⁹ Nlenii aitungpii Inii n-go lungkasyii jangpii aikakum mei tiisii kalei tingkalei ninado Krista Jisu- mah kaang kito aitoi bangkabam mei hangninii tiisii kalei Pol Inii khangleile.

¹⁰ Inii kabang kilungto lungkalu gunah sapfii mpou Onesimas mah kaang kito Inii n-go khangleile.

¹¹ Tinglang hangninii kinii mpou ai gojangpiinii samah kado kabi tei gasii leile, nlenii aitoinii gojangpii- niido, gujangpiiniido kabi tei tiitakle.

¹² Mpoupum sekgo katunii, gumah rangii sek tiisii kalei mpougo, godakii Inii lang magongloi leile.

¹³ Mpounii gotung tiisii kabi rasam mah kaang kito bangkabam tinglang kak gumah nga nga matutang karam jangpii n-gu kaswisii mpougo kaibam nyiile.

¹⁴ Nlenii Inii n-go tanchyii- piinii n-gu tiiha matunyii makle, nlenii gomah kamaning kamazhii piinii teitei Inii n-go tiimatunyiile, teipiinii nangnii mazhii kasuta Inii samah kado tiiroule.

¹⁵ Onesimasnii godato tinglang shangniikii tat katu ai tinglang ka- leita nangnii mpougo douloi wokabui jangpiinii kido malahle;

¹⁶ Aitoinii kikaleimei hangninii takumloi supii- nii, kikaleimei sung kaki lungkasyii kangsanapii hangninii tiisii routiisii gudato, nlenii godatonii pumzai kitodo, Bangpii zai kitodo, kadazii- kapii kisii lungkasyii tei tiitakpo.

¹⁷ Teijangpii nangnii n-gu go kangpiilesii maningleponii, nangnii n-gu lukaipyii tang karam takum- piinii mpougo lukaipyiilo.

¹⁸ Mpounii n-go tiima bamleponii mak-kii gopow punglei leponii, teitei guphyiiryiikii ryii kaiseilo.

¹⁹ Pol Inii ai gubah sek- piinii ryiile. Inii powtei rui kaleipyii tangle. Gopum katangdo gupow pungleile, nlenii Inii godakii teitei tam nyiimakle.

²⁰ Teipiinii gusanapii tiikaha khangkalei ai Bangpii zeikito lungsyiisii n-gu tiiseilo, Krista zei kito sanapii hangninii tiisii tii-ntapyiilo.

²¹ Gomah katam kaswi kito maning kamalum tei leisii Inii katam sungdo kisii nangnii tiipyii tangle katu tei Inii godakii ryiileile.

²² Sa- teichii gujangpiinii ki shang hang- ninii tiikadalo, kadapokii gonyiihang mah kariita tei Saraanii khepyii tangle ninado n-gu ai gonyii dakii pyiiloi tangle katu ai Inii maning malumle.

Kaluimah salam kapyii

²³ Krista Jisu jangpii n-gu kaswi- sii bangkabam Ipaprosnii gonyiigo salam pyiileile;

²⁴ Sateichii n-gu njoisii tiikaleimei, Mark Aristarkas, Demas ninado Luk ahnyiiniido Salam pyiileile.

²⁵ Bangpii Jisu Krista mah jumage kapyii tei gonyii hang phyiiryiikii kaswipyii matulo.