METIU 9 - KARANU KABI SAMTAM

Pumpei kateimei hangniniigo Jisunii tii mbi kapyii

¹ Sateichii Mpounii malyii hang- niniiki liit totakle, sateichii dwijai tei kaa maju wosii mpoumah namdiki nlaitu takle.

² Sateichii julo, pumpei taisii kalei mei hangniniigo ahnyiinii zyiigamkii kai wosii mpouda poigong takle; sateichii Jisunii ahnyiimah kamalum tei ngou wosii, pumpei taisii kaleipii dateikii tamle, “Gunah Sapfii mpou nta tulo; gokem hangtei kaleipyii takle.”

³ Sateichii julo, Ajaitingshang kati ojamei kangkanii, “Ai sapfii mpou ai Saraago tam mashyii leile” sii ahnyii karapii tamle.

⁴ Sateichii Jisunii ahnyii lungtei tiwosii tamle, “Gonyiinii gonyii lung kito dajangpii kashyii lung pung leipo?

⁵ Kadapokii ‘go kem hangtei kaleipyii takle’ katunei, ‘gungtusii tat tulo,’ katu ai kadapiinii mala buipo?”

⁶ Nlenii meinah sapfii mpou teinii sazyii pouryiito kem tiimaga kabui teimaham leile katu tei gonyiinii titang karam jangpii (teitinglang ki pum pei taisii kaleipii dateikii tamle,) “Gungtu wolo, gomah zyii poimakhiisii goki tat tulo.”

⁷ Sateichii mpounii gungtusii kilam tat tutakle.

⁸ Meimoi teinii mpougo ngou wosii hing takle, sateichii meinah dakii tei kakum teimaham pyiisii kalei Saraago ahnyiinii tam matoile.

Jisunii Metiu-go kalat

⁹ Sateichii Jisunii teibam kiteito aitiisii tatjou pikii, Metiu sii kalat sapfiimei hangninii ha kahamei Srat ki bam kalei tei ngou wosii, Jisunii mpou dakii tamle, “Gutai swi wolo” teito mpounii gungtu sat-tosii mpou tai swi wotakle.

¹⁰ Sateichii aitiisii pat takle, mpounii kilungto mah chii tang karam jangpii bam leibangpii, julo, aha-kahamei ninado kem katiimei hangkii gongsii Jisu ninado mpou boumeigo kaswisii bam takle.

¹¹ Sateichii Farasismei teinii ai ngou wosii, mpou boumei dakii tamle, “Gonyiimah Madhiikapyiipii ainii aha kahamei ninado kem katiimei hang go dajangpii kaswisii chii njoi leipo?”

¹² Nlenii mpouniiteitei shii wosii tamle, “Ra kagameinii peimhii meigo fiilei makle, nlenii rakani meinii peimhiimeigo fiileile.

¹³ ‘Inii lungset kati go mareile, sateichii kakarat go marei makle’ katu ai kadapei gopo katu gonyiinii maa-rali wolo, kadapokii Inii kasang kamajyiimeigo lat tang karam jangpii gongmakle, nlenii kem katiimei jangpiile.”

Malot karyii mah kaang kito

¹⁴ Teito Jon mah boumei teinii mpouda gongsii tamle, “Nyiinii satei- chii Farasismei hangnii malot ryiisii kalei, sateichii go boumeinanii malot ryii kasu ai kadajangpiipo?”

¹⁵ Jisunii ahnyiigo khekalatle, “Nou tiitang karampii teinii myii kapangki gonghaisii kalei meigo kaswisii bam kaleitatei ahnyiinii swi mage wobuipo?” Ahnyii kak kito nou tiitang karampii gotei poitoi tang karam tinglang leimik tei gong tangle, satei- chii teito ahnyiinii malotryii tangle.

¹⁶ “Meikaniido pei kaham kikii pei kasatai makotkai leimakle, kadapo- kii makot kakai peira teinii pei gotei chyii wosii kisiipou hakbui tule.

¹⁷ Sateichii jou kasatai tei tiigyii bung kaham kikii kai makle; kaileponii tiigyii bung tei pak tangle, sateichii joutei long gale sateichi tiigyii bung hang teido tiimaga ai leile; nlenii gonyiinii jou kasatai tei tiigyii bung kasatai kikii kai leile sateichii hangna gotei tiigatpii bisii kaibam leile.”

Kadimei hangninii kinah sapwi mpei ninado Jisu peikaa kadengpei

¹⁸ Jisunii aihang ai ahnyii dakii tam leibangpii, Julo, Jehudimei ki apum katiimei hangninanii mpouda gong mpou doito kok-kumsii tamle, “Gunah sapwi mpei aitoi sek-kii taitakle; nlenii gong mpoupei phyii- ryiikii gobah poikai seilo, sateichii mpoupeinii ring wotangle.”

¹⁹ Jisunii tusat tosii mpou bou- meigo kaswisii mpou-tai swi wotakle.

²⁰ Sateichii julo, tingkum kearii- siinakhii zai humsii kalei sapwimei hangninanii mpou-taito tatpi, mpou mah peikaa tei dengtakle.

²¹ Kada- pokii ‘Inii mpou pei-kaa deng wolepo- nii, Inii biwobuile’ sii mpoupeinii maningle.

²² Teito Jisunii nryiigong mpou- peigo ngou wosii tamle, “Gunah sapwi mpei nta tulo, gomah kamalum teipiinii n-go tii mbipyii takle.” Sateichii teisek-kii sapwi mpei tei biwo takle.

²³ Sateichii Jisunii Jehudimei ki apum katiipii ki kalung tei tat kaliit tinglang kak, katai mah lhii katiimei ninado koi nrung kamoi hangtei ngou wosii tamle,

²⁴ “Meihangnii tatmarai seilo; kadapokii nah sapwi mpei ai taimakle, nlenii ziitziile,” sateichii ahnyiinii mpougo hoksii nuile.

²⁵ Sateichii meihangnii tatmarai kalei tai, mpounii kilung tei tatliitsii mpou pei bah tei jum wotakle, sateichii nah sapwi mpei tei ringkhii takle.

²⁶ Sateichii teimah tingha tei bamlyii hangki shiigong takle.

Jisunii mik kachetmei hangna go tii mbi kapyii

²⁷ Sateichii teikito Jisunii aitiisii tat kagong kak, mik kachetmei hangnanii, “He Devit nah Sapfii mpou, nyiigo lungsyii pyiilo” sii saa sii saa sii mpou tai swi wotakle.

²⁸ Sateichii mpounii ki kalung tei liit sek-kii, mik kachetmei teinii mpouda pat takle, sateichii Jisunii ah nei dakii tamle, “Inii ai ai tiiwo buile katu gonei malum makpo?” Mpoupiinanii mpou dakii tamle, “Nle, Bangpii.”

²⁹ Teitinglangki mpounii ah nei hangna mah mik tei dengpyiisanii tamle, “Gonei mah kamalum taiswisii bimatulo.”

³⁰ Sateichii mpoupiina mah mik tei rak wotakle, “Sateichii julo mei dakiido ai tam mati sulo” sii Jisunii mpoupiina dakii teisii ka- khatpyii takle.

³¹ Nlenii mpoupiinanii maasii mpou mah tingha tei teiki bam hang kikii tamtat tutakle.

Jisunii lat kagamei hangniniigo tii mbikapyii

³² Sateichii mpoupiinanii aitiisii tat tu katu kak, julo, sara kashyiinii kaswi kalei lat kagamei hangniniigo mpoudakii pang gong takle.

³³ Sateichii sara kashyii tei baatoi ai sek-kii, lat kagapii teinii lat pat takle; teito meihang teinii sung gasii tamle, “Isrelmei kak kito aikakum ai mahdou kado ngou makle.”

³⁴ Nlenii Farasismei teinii “Sara kashyii sagong mah teimaham kito mpounii sara kashyiigo baatoile” sii tam takle.

Jisunii meigo lungsyii kapyii

³⁵ Sateichii Jisunii Ndwibam hang kiteito ralipyiisii, Sagong sazyii mah kabi rasam tam ralipyiisii, sateichii ara katchii hang tei tii- mbipyiisii nam ninado namdi hangki tat gong takle.

³⁶ Mpounii meimoi gotei ngou wosek-kii, mpounii ahnyii gotei lungsyii takle, kadapokii ahnyii tei koikapyii kaga Jaonah mei takumpii, lungnaangsii ninado shangtaisii bam takle.

³⁷ Teipiinii mpounii mpou boumei dakii tamle, “Rachet tang karam hangkii leile, nlenii rachetpyii tang karam mei moimakle.”

³⁸ Teijangpii mpou mah rachet tang karam lu kiteikii tha katiimei lang magong matutang karam jangpii karachet mah Bangpii dakii riita khanglo.