METIU 26 - KARANU KABI SAMTAM

Jisugo gitang karam jangpii kajum

¹ Jisunii aihang ai tamsang sek-kii, mpounii mpou-boumei dakii tamle,

² “Leimik hangnatai kaakamaju mah takbai tei gonglei takle, sateichii meinah sapfii mpou gotei Krosh gamkii dhangsii gitang karam jangpiinii pyiitoi aitang takle katu gonyiinii tile.”

³ Teito Kaifas sii kalat Tingditupii ki nito Tingdimei ninado katingmei hangteinii gong ndwi wotakle.

⁴ Sateichii Jisugo makumpii jumsii mpougo gitoi tang karam jangpii kaswisii rashii njoi wotakle.

⁵ “Nlenii meimoi kak tito khoi nrung pat matu kasu tiisii, nyiinii ai ai takbai ki kak tiilak tang karamle, sii ahnyiinii tam takle.”

Jisugo Betani kito thao manuk kapyii

⁶ Aitoinii Jisunii Betani kito, mpara tiikalei Saimon ki nito bam kalei tinglang kak,

⁷ mpounii mah chii leibangpii, sapwimei hangni- nanii kuitupii katii rangrhiibung hangninii kikii thao katokryii poisii mpouda gongsii, mpoupeinii mpou phyii gamkii ruikaipyii takle.

⁸ Nlenii mpou boumeinii teitei ngou kalu kito samousupii tamle, “Kadajangpii ai ai tiikadak leipo?

⁹ Kadapokii kamanuk thao ai mai bisii joi takpokii, mah kagameigo pyii wobuile.”

¹⁰ Nlenii ahnyiinii tam kalei tei Jisunii tiwosii ahnyii dakii tamle, “Sapwi mpei aigo kadajangpii gonyiinii tiikamage leipo? Kadaponii mpoupeinii gujangpii tha kabi hangninii tiipyii takle.

¹¹ Kadapokii mah kagamei goteinii gonyiinii tinglang kaleita kaswisii leile, nlenii n-gunii gonyiinii tinglang kaleita kaswisii leilakle.

¹² Kadapokii gu gamkii ruikakai kamanuk thao ai mpoupeinii n-gu poi goi tang karam jangpii tiida pyiile.

¹³ Kabi rasam ai tam ralipyii tang karam sazyii pouryii bamlyii hang kiteikii, sapwi mpei ainii tiikabam teido mpoupeigo maningsii leitang karam jangpii tam mpat tangle.”

Judasnii Jisugo schoi-choikaipyii tang karam jangpii mazhiikalu

¹⁴ Teito keariisiinakhii kak kito hangninii, Judas Iskariot sii kalatpii teinii Tingdimeida maasii n-nhiile,

¹⁵ “Jisugo Inii gonyii dakii bailapyii leponii, gonyiinii n-gu kadapei pyii- tangpo?” Sateichii ahnyiinii mpougo sanahgyii pum tamrhii fiipyii takle.

¹⁶ Sateichii teisek piinii Jisugo schoi-choikapyii tang karam jangpii tinglang kabi tei fiitu takle.

Jisunii mpou-boumeigo kaswisii kaakamaju mah takbai kachii

¹⁷ Aitoinii ahee kaihai kasu tiirok hang-ngi karei leimik piinei boumei teinii Jisuda gongsii n-nhiile, “Nangnii kaakamaju mah takbai tei gojangpii kadakikii nyiigo tiikada matunyiipo?”

¹⁸ Mpounii tamle, “Namdi lungki mei hangninii datei tat liitsii, madhiikapyiipiinii tam leile, gumah tinglang tei gong takle, Inii gumah boumeigo kaswisii kaakamaju mah takbai tei gokito hang-ngi tanglesii tamlo.”

¹⁹ Sateichii Jisunii ahnyiigo katam takumpiinii boumei teinii tiiwo takle, sateichii kaakamaju mah takbai tei tiikada wotakle.

²⁰ Tingkhiilam liit sek-kii mpounii mpou boumei keariisiinakhiigo ka- swisii mah chiitang karam jangpii bam takle;

²¹ sateichii ahnyiinii mah chiikalei tinglang kak, Jisunii tamle, Inii gonyiigo kasangpii tam leile, gonyii kak kito mei hangninanii n-gu schoi choikaipyii tangle.

²² Teito ahnyii tei hangkapii lung magesii, “I-de Bangpii?” Sii hangninii nsangnsangpii adoi doi tiisii mpougo n-nhiitakle.

²³ Mpounii khekalatle, “Kok kikii n-gu kaswisii bah toukakai ah teinii n-gu schoi-choikai tangle.

²⁴ Mpou- mah kaang kito ryii kabam tei takumpii, meinah sapfii mpou teinii tai tangle, nlenii meinah sapfii mpougo schoi choi kakai ah teinii kadaziikapiinii kamage tang takpo? Mei teipou jangpiinanii nuto lung- sang lung m-mang kasu teiniipou ah jangpii bibwi tangle.”

²⁵ Mpougo schoi-choikakaipii Judas teinii tamle, “I-de madhii- kapyiipii!” Jisunii mpou dakii tamle, “Nangnii tam mpat takle.”

Bangpii mah takbai

²⁶ Aitoinii ahnyiinii mah chii leibangpii Jisunii tiirok tei poi wotakle, sateichii satoi pyiitakle, sateichii mpoumah boumei dakii pyiisanii tamle, “Poisii chiilo, ai ai gupumle.”

²⁷ Sateichii mpounii peek hang- ninii poi wotakle sateichii mpounii hakalang pyii kaleitai, mpounii ahnyii dakii pyiisanii tamle, “Go- nyiihang ai ai saklo.”

²⁸ “Kadapokii ai ai kem kito kaleipyii tang karam mei hangka jangpiinii majou mang kapyii sat tang karam karanu samtam mah gumah zai teile.

²⁹ Gu pfii mah sagong sazyii kito Inii gonyiigo kaswisii kasatai sak njoi tang karam leimik gong kasuta katang tei, ai darkha haam mah riiti ki aito Inii sakloilak takle.”

³⁰ Sateichii ahnyiinii lhii hangninii tiikalei-tai, ahnyiinii Olip zang gam tat tutakle.

Pitarnii mazhii kalak sam Jisunii reipii katam

³¹ Teito Jisunii ahnyii dakii tamle, “Tingnei tinghum sek-kii gonyii hangnii n-gu toisii pakga tangle, kadapokii aitiisii ryiibamle, ‘Inii Jaokakoipii gotei girang aitangle, sateichii jaokoi mah Jao hang tei pak marou maruk tutangle,’

³² Nlenii Inii ringkhii katutai, Inii gonyiidoi reisii Galiliki mang tangle.”

³³ Pitar-nii mpou dakii saa mpatle, “Mei kakimei hangnii n-go toi aichiido, Inii n-go toisang toilakle.”

³⁴ Jisunii mpou dakii tamle, “Inii godakii kasangpii tam leile, tingnei tinghum sek-kii, ruigang kong kasunakii, nangnii n-gu mazhiilak tumkii tangle.”

³⁵ Pitar-nii mpou dakii tamle, “Inii n-go kaswisii taitang karam pat tuchiido Inii n-go mazhii kasu tei tiisang tiilakle,” sateichii boumei hang teiniido tei takumpii njoisii tam takle.

Jisunii Getsamani kito kariita

³⁶ Jisunii ahnyiigo kaswisii Getsamanisii kalat bam hangniniiki tat tutakle, sateichii mpounii mpou- mah boumei dakii tamle, “Inii ailu kito maasii riita kalei tinglang kak, gonyii aikito bamlo.”

³⁷ Sateichii Jisunii mpougo kaswisii Pitar nei Zebedi nah sapfiimei hangnago pang wosii, mpounii hangkapii swi kamagesii lung lungnyii lunghoutu takle.

³⁸ Teito mpounii ahnyii dakii tamle, “I lung kamage katupii taine leitakle, aikito bamlo sateichii n-gu kaswisii mik raksii koilo.”

³⁹ Sateichii mpounii adoilam pang chengniikii tatpatsii mpounii sazyii- kii mpou-ju poi masuksii riitale. “Gu Pfii, mazhii leponii peek ai gudato poitoi seilo; teitii kido gumah kamaning kamazhii tei sulo, nlenii nangnii kamaning kamazhii teilo.”

⁴⁰ Teito mpounii boumei datei nlai kagong tinglang kak, ahnyiinii zyiisii kalei tei doutakle; sateichii mpounii Pitar dakii tamle, “Gonyii n-gu kaswisii pung hangninii aitiisii mik raksii bampei wolak takpo?

⁴¹ Gonyiinii kahemki liit kasu tiisii mik raklo sateichii riitalo; rangiinii mazhiinyiile, nlenii pumzainii suile.”

⁴² Nlailoisii hangna kashang tiisii mpounii tatpatsii riita takle “Gu pfii, peek ai Inii sak kasuta gudato ma- jutu wolak leponii, gomah kamaning kamazhii tei tiimatulo.”

⁴³ Sateichii mpounii nlaigongle sateichii ahnyii- nii zyiikalei tei doutakle, kadapokii ahnyii mik tei masui takle.

⁴⁴ Nlailoisii Jisunii ahnyiigo toisii tat tutakle, ninado samkang nu-njoi- hang tei tamsii, hangtum kashang tiisii riita takle.

⁴⁵ Teito mpounii mpou boumeida nlaigongsii tamle, “Gonyii rei zyiisii sateichii ntaksii leide rei? Julo, meinah sapfii mpou gotei kakui kama mei bah kikii pyiitoi aitang karam tinglang tei gong takle.

⁴⁶ Gungkhii wolo, nje tat tule, julo, n-gu schoi-choikakai mei tei aiki leitakle.”

Jisugo kajum

⁴⁷ Mpounii sam tam leibangpii, keariisiinakhii kak kito hangninii, Judas tei gongtakle, sateichii Ting- dimei ninado katingmei hang dato saryiikhang ninado tingrang poikalei meimoi teinii mpougo kaswi leile.

⁴⁸ Aitoinii schoi-choikakai mei teinii ahnyii dakii tiikamangou siiti hang- ninii pyiisii tamle, “Inii kamatwum mei teile; ahgo jum wolo.”

⁴⁹ Sateichii mpounii Jisuda tat majyiitok pisii tamle, “Kamajung tei gudato lei matulo Pumpii!” Sii tamsii mpounii Jisugo matwum takle.

⁵⁰ Jisunii mpou dakii tamle, “Kangpiiwo, nang kadajangpii aiki gongleipo?” Teito ahnyiinii patsii Jisu gamkii bah kaisii mpougo jum wotakle.

⁵¹ Sateichii julo, Jisugo kaswi kalei mei hangninanii mpou bah hampat mpou mah saryii-kang tei jok mpatsii Tingditupii ki kaleimei hangninii mah khoi tei tat ndang aitakle.

⁵² Teito Jisunii mpou dakii tamle, “Gomah saryiikhang tei mpoubam kikii kai ailo, kadapokii saryiikang kapoimei hang teinii saryiikang kito taitangle;

⁵³ Inii gu pfii dato khang leponii, mpounii n-gu tiihasek tangle katu gonyii timakpo? Mpounii sating gamlui mah saryiimei thang thang sung kisii moisii m-mangpyiisii n-gu keipyii tangle.

⁵⁴ Nlenii teitiileponii, ai pat tang karamle sii tam kalei kabi rasam tei kada takumpii gongsang wotangpo?”

⁵⁵ Teitinglang ki Jisunii meimoi dakii tamle, “Karagamei hangninii go jumtang karam takumpiinii saryiikhang ninado tingrang hangtei kaswisii n-gu jumtang karam jangpii gonyiinii tatpat leitakpo? Sating kata Inii Saraa kamaning kilungto ralipyiisii bamlei kido gonyiinii n-gu jum makle.

⁵⁶ Nlenii Lungkakaling- meinii kabi rasam hang kikii ryii- kabam tei gongsang matutang karam jangpii aihang ai pat takle.” Teito boumeihang teinii mpougo toisii pakga takle.

Samtak katii atingmeihang doi Jisugo pangkakhii

⁵⁷ Sateichii Jisugo kajum mei teinii Ajaitingshang kati ojamei ninado katingmei hangnii ndwi kalei, Tingditupii Kaifas dakii mpougo pangkhii takle.

⁵⁸ Nlenii Tingditupii mah Sagongki kajang katang tei Pitar-nii kak dhiihaisii mpou-tai swiwotakle, sateichii mpounii sa- gongki kalungtei liit tosii, kalui katang tei kada takumpii pat tangpo katu jutang karam jangpii mpounii saryii kakoimeigo kaswisii bam takle.

⁵⁹ Aitoinii tingdimei ninado katingmei hangteinii Jisugo gitang karam jangpii kama tei fiile; sateichii kasang kasu sakchyii kapyiimei hangkanii gong kido; ahnyiinii samah kado doumakle.

⁶⁰ Kalui luisang kito mei hangkanii patsii tamle,

⁶¹ “Inii Saraa kamaningki ai tiimagasii teitei leimik hangtum lung kikii tiimakhii wobuile, sii mei aipounii tamle.”

⁶² Teito Tingditupii teinii gungtu satsii Jisu dakii tamle, “Nang mah kado khelak takpo? Go phyiiryiikii mei aimei ainii pyiikalei sakchyii ai kadapeipo?”

⁶³ Nlenii Jisunii malhii sutakle sateichii Tingditupii teinii mpou dakii tamle, “Saraa nah sapfii mpou Krista tei nangle katu, nang makle katu nyii dakii tam matutang karam jangpii karing Saraa zei kito Inii n-go riishii n-nhii leile.”

⁶⁴ Jisunii mpou dakii tamle, “Nangnii tam takle, nlenii Inii gonyii dakii tam leile, tinglang aitaito meinah sapfii mpou teinii teimaham kadi kathang mah bah ajiilamto kabam ninado sating gam mah kamong gamto kagong tei gonyiinii ngou tangle.”

⁶⁵ Teito Tingditupii teinii mpou mah pei tei hetriitsii tamle, “Mpounii Saraago tam mashyii aitakle, aidoito kisii nyiinii sakchyii kadajangpii marei leipo? Julo, mpounii Saraago tam kamashyii tei gonyiinii shiitakle;

⁶⁶ gonyiinii kadapei maningpo?” Ahnyiinii khekalatle, “Mpougo gimajyiile.”

⁶⁷ Teito ahnyiinii mpou-ju kikii poktai maswikai pyiitakle sateichii mpougo dat takle; sateichii kakimei hangnii mpougo kaphyiisanii tamle,

⁶⁸ “He, Krista, tanii n-go dat leipo? Nyii dakii tam mpatpyiilo.”

Jisugo Pitar-nii mazhii kasu

⁶⁹ Sateichii Pitarnii sagongki kajangto bam kalei tinglang kak, kikalei sapwimei ralhiimeinah hangni- nanii mpouda patsii tamle, “Nangdo Galiliki Jisugo kaswisii leile.”

⁷⁰ Nlenii mpounii ahnyiihang doiteito mazhii supanii tamle, “Nangnii tam kalei tei Inii timakle.”

⁷¹ Sateichii mpounii Sagong mah ki kajang kamwi tat kapat tinglang kak kikalei sapwimei kaki hangninanii mpougo ngou wosii, mpoupeinii dato sat kalei mei dakii tamle, “Sapfii mpou ai Nazaret ki Jisugo kaswi leile.”

⁷² Sateichii “Meigotei timakle,” katupii riishii kapoi tei njasii mpou- nii nlailoisii mazhii sutakle.

⁷³ Tinglang shangnakii sousek-kii dato sat kaleimei ahnyii teinii patsii Pitar dakii tamle, “Kasangpii nangdo ahnyii kak kito hangniniile, kada- pokii gomah gosamtam teinii n-go matisii leile.”

⁷⁴ Teitinglangki mei gotei ‘Inii timakle’ sii mpouroinapii mpougo sheengsii ninado riishii jumtu takle, sateichii teitinglang sek-kii ruigang tei kong takle.

⁷⁵ “Ruigangnii kong kasunakii nangnii n-gu hangtum kashang tiisii mazhiilakle, sii Jisunii tam kabam samtei Pitarnii maning gong takle.” Teito mpounii saba tatpatsii lung hungsii hatle.